Jisamu 22:1-31
Kuli mukulwane wavaka-kwimba. Mwaso wakwamba ngwavo, “Kapaji waChihwevo Halungulungu Lyakucha.” Samu yaNdavichi.
22 Ove Kalunga kami, ove Kalunga kami, mwomwo ika unangusezela?+Mwomwo ika unemanyina kwakusuku nakuzeneka kungulwila,Chipwe kwivwa mikemo yami?+
2 Ove Kalunga kami, ngweji kukusanyikanga namusana, oloze kaweshi kungukumbululako.+Naufuku nawa ngweji kukusanyikanga lika.
3 Oloze ove wapwa uwajila,+Veji kukwalisanga kuli Isalele.
4 Masetu vakufwelelele,+Vakufwelelele, kaha ove wavapululwilenga lika.+
5 Vatwile kawelele kuli ove, kaha wavalwilile.Vakufwelelele, kaha kawavevwishile sonyiko.+
6 Oloze ami ngumusangunya kaha, kangweshi ngumutuko,Vatu veji kungutolekanga* nakungulumbilisa.+
7 Vosena vaze veji kungumonanga, veji kunguhendanga.+Veji kumbwendulanga kutunwa twavo, kaha veji kunyengesanga mitwe yavo,+ nakwamba ngwavo:
8 “Alihanyine kuli Yehova. Ngocho mwechenu amupululule.Mwechenu amulwile mwomwo amuzanga.”+
9 Mwomwo ove yove wangulowele mujimo lyamama,+Yove wangulingishile ngupwenga nguwakukingiwa halwola ngwapwile nakwamwa kumavele amama.
10 Kufuma vene hakusemuka chami vanguhanyine kuli ove ungulame,*Kaha unapunga uKalunga kami kufuma vene halwola ngwapwile mujimo lyamama.
11 Kanda nawimana hahasuku nayamiko, mwomwo luyando luli hakamwihi,+Ami kangweshi namuka-kungukafwa wekako.+
12 Vakuji javangombe vavavulu vanangujingilika,+Vakuji javangombe vangolo vakuMbashane vanangujingilika.+
13 Vanangwasamina mutunwa twavo+Ngana mwandumba wakutahwoka ali nakutanya kanyama wamukoka.+
14 Vanangumwange nge meya,Kaha vifuwa vyami vinasepunuka.Muchima wami unapu nge sela,+Uli nakuyengunuka mutulo yami.+
15 Ngolo jami jinakumu, kaha ngunapu nge chizanda,+Lilimi lyami linakakachila kuushishinya wami,+Kaha uli nakungutwala kulukungu lwakufwa.+
16 Vatuwa vanangujingilika,+Vanangujingilika nge lizavu lyavaka-kulinga mwamupi,+Vanangukwate kumavoko nakumahinji nge ndumba.+
17 Ngunahase kulava vifuwa vyami vyosena,+Vali nakungutala nakungushishika.
18 Vali nakulipangila mwavomwavo uvwalo wami,Kaha vali nakuzachisa tutachikijilo hakulipangila uvwalo wami.+
19 Oloze ove Yehova, kanda nawimanyina hahasukuko,+Ove yove ngolo jami, anguhwisako ungukafwe.+
20 Ngulwile* kupoko yamukwale,Lwila mwono wami waulemu kuvyala* vyavatuwa.+
21 Ngulwile kutunwa twavandumba+ nakujimbinga javangombe vamuchipapa,Ngukumbulule, ngulwile.
22 Nanguvambulila vandumbwami lijina lyove,+Nangukwalisanga mukachi kachikungulwilo.+
23 Enu mwevwa Yehova woma, mwalisenu!Enu vana* vaYakova muvosena, mutohwesenu!+Enu vana* vaIsalele muvosena, mwivwenu woma!
24 Mwomwo kalumbilishile chipwe kuhunga ukalu wamutu uze vali nakuyanjisako.+Kaliswekele kuli ikiyeko.+Amwivwile omu atwile kawelele kuli ikiye.+
25 Nangukwalisanga muchikungulwilo chachinene,+Nangutesamo jishiko jami kumeso avaze vakwivwa woma.
26 Vavavwovu navalyanga nakwikuta,+Vaze vali nakutondatonda Yehova navamwalisanga.+Livwisenunga kuwaha kuyoya* haya myaka yosena.
27 Vatu vakumavu kwosena navakanuka Yehova nakukinduluka kuli ikiye,Jitanga javaka-mafuchi josena najikalifukula kumeso enyi.+
28 Mwomwo wangana wapwa waYehova,+Kaha eji kuyulanga vaka-mafuchi.
29 Vaka-luheto* vahamavu vosena navakalya, kaha navakalifukula,Vosena vaze vali nakuya kulukungu navakafukama kumeso enyi,Kaha naumwe wauchi mwakayovola mwono wenyi.
30 Vaka-tanga* yavo navakamuzachilanga,Kaha chisemunwino nachikakavangizaho navakachilweza vyaYehova.
31 Navakeza nakwambulula vyakwoloka chenyi,Navakalweza vatu vaze navakasemuka vyuma nalingi Kalunga.
Kwinyikila Chamwishi
^ Chipwe “kungusaulanga.”
^ Hepe., “vangumbilile hali ove.”
^ Chipwe “Lwila mwono wami.”
^ Hepe., “kumavoko.”
^ Hepe., “mbuto.”
^ Hepe., “mbuto.”
^ Hepe., “Michima yenu yiyoyenga.”
^ Hepe., “Vatu vakununa.”
^ Hepe., “Mbuto.”
