Jisamu 31:1-24
Kuli mukulwane wavaka-kwimba. Samu yaNdavichi.
31 Ove Yehova, ami ngunachinyina muli ove.+Kanda navangwivwisa sonyiko.+Ngupululule mwomwo yakwoloka chove.+
2 Tengeleka matwitwi ove* kuli ami.Twaya washiwashi ungupululule.+Pwako upili yami yakukola,Uchihela chami chakukola mangana ungulwile.+
3 Mwomwo ove yove lilolwa lyami, yove chihela chami chakukola.+Naungutwaminyina nakungutetekela+ mwomwo yalijina lyove.+
4 Naungusomona mulyoji lize vanangutela mukusweka,+Mwomwo ove yove chihela chami chakukola.+
5 Nanguseza shipilitu yami mumavoko ove.+Unangusokola ove Yehova Kalunga wamuchano.*+
6 Ngwahunga vaze veji kulemesanga tuponya vamokomoko,Oloze ami ngwafwelela Yehova.
7 Nanguwahilila chikuma mwomwo yazangi yove yakwilila,Mwomwo unamono luyando lwami.+Unatachikiza nawa kulyonyinga chami.
8 Kawanguhanyine mumavoko amuka-kole wamiko.Unangwimika muchihela chakukingiwa.*
9 Ove Yehova ngwivwile uselewa mwomwo nguli nakuyanda.Kulyonyinga chinalingisa meso ami afuvalale+ nakuzeyesa mujimba wami wosena.*+
10 Kuyoya chami chinazale nachinyengo,+Myaka yakuyoya chami nawa yinazale nakulishimwoka.+Ngolo jami jili nakukuma mwomwo yakuhengesa chami.Vifuwa vyami vili nakuzeya.+
11 Vaka-kole jami+ vosena vali nakungutoleka,Chikumanyi vaze ngwatunga navo.Kaha venyembo jami nawa vali nakunguchikima woma.Nge vanangumono haweluka, veji kunguchinanga.+
12 Vananguliula, vananguvulyama kwijiva nge ngunafu.Ngunapu ngana mwachitenga chakufwa.
13 Ngunevu mangwavo amavulu avyuma vyavipi,
Ngocho woma unangukwate.+Omu veji kulikungululanga nakungutwama punga,Veji kujinanga kungujiha.+
14 Oloze ove Yehova, ami ngwakufwelela.+Ngunambe ngwami: “Ove yove Kalunga kami.”+
15 Kuyoya chami chili mumavoko ove.Ngupululule mumavoko avaka-kole jami nakuli vaze vali nakunguyanjisa.+
16 Ngwivwile uselewa ami ngamba yove.+Ngulwile mwomwo yazangi yove yakwilila.
17 Ove Yehova, kanda naungwechelela vangwivwise sonyi omu nangukusanyikako.+Vaka-kuhuka vavevwise sonyi.+Vavaholese kulu muFuka.*+
18 Mivumbo yakuhanjika makuli yihole kulu,+Mivumbo yize yeji kufulililanga vaka-kwoloka mujila yakulivwimba nakasautu.
19 Kuwaha chove omwo chavula!+Unachilamina vaze vakwivwa woma,+Kaha unachisolwela vaze veji kuchinyinanga muli ove kumeso avatu vosena.+
20 Nauvasweka kuchihela chakuhengama chize chili kwakamwihi nayove+Mangana uvakinge kuvyuma vanajinyi vatu.Nauvasweka muchiswamo choveMangana uvakinge kuvikokojola.*+
21 Vamwalisenga Yehova,Mwomwo nangusolwela zangi yakwilila+ mujila yakukomwesa munganda yize vanahake muchingombela.+
22 Ngwalizakaminyine nakwamba ngwami:“Navangunongesela kumeso ove.”+Oloze ove wevwile kulembelela chami omu ngwakulembelelele ungukafwe.+
23 Zangenunga Yehova, enu vaka-kulonga muvosena.+Yehova eji kukinganga vatu vakushishika,+Oloze eji kuzangamisanga mwamunene weshowo alivwimba.+
24 Enu muvosena muli nakuvandamina Yehova,+Pwenunga vakumika, kaha michima yenu yizamenga mbe.+
Kwinyikila Chamwishi
^ Chipwe “Nongama wivwilile.”
^ Chipwe “Kalunga wakushishika.”
^ Chipwe “muchihela chachinene.”
^ Chipwe “mwono wami nalijimo lyami.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Hepe., “kuvikokojola vyamalimi.”
