Jisamu 35:1-28
Samu yaNdavichi.
35 Ove Yehova, nguhakwile hachihande chami nguli nacho navaze vanangwimanyina nakole.+Lwako navaze vali nakulwa nayami.+
2 Mbata mukingo* wove nakepwe yove yayinene,+Kaha katuka ungukinge.+
3 Mbata likunga lyove nangimbu yove* mangana ulwenga navaze vali nakunguhangasana.+Hanjika kuli ami* ngwove: “Ami yami ulwilo wove.”+
4 Vaze vali nakunguzomba vavevwise sonyi nakuvenyisa.+Kaha vaze vali nakungutwama punga ngwavo vangujihe vakinduluke nasonyi.
5 Vapwenga nge muzungu uze uli nakupekumuka napeho.Kangelo kaYehova nawa avahange.+
6 Mujila yavo mupwenga milima kaha nawa musenene,Omu kangelo kaYehova mwavahangasana.
7 Mwomwo vanangutela lyoji mukusweka chakuzeneka mulonga.Kaha vanangufulila wina chakuzeneka mulonga.
8 Lupi luvawane mukukasumuna.Vafwenga halyoji lyavo vanate vavene mukuswama.Vaholokele muwina vanafulu nakunonga.+
9 Oloze ami* nanguwahililanga muli Yehova.Nangulisambanga mwomwo yavilinga vyenyi vyaulwilo.
10 Nanguhanjika namuchima wami wosena ngwami:“Ove Yehova, iyaze apwa nge yove?Weji kupulululanga vaka-kukalikiza kuli vaka-ngolo,+Weji kupulululanga vaka-kukalikiza navaka-kuhutwa kuli vaze veji kupupanga vyuma vyavo.”+
11 Vinjiho vamakuli veji kwizanga kuli ami,+Nakunguhulisa vyuma vize kangwatachikijileko.
12 Veji kungushishishilangamo upi havyuma vyamwaza ngweji kulinganga,+Nakungulingisa ngulishone.
13 Oloze omu vavijile, ami ngwavwalile chikeleyi.Ngwaliyanjishile* mwomwo yakulijilika kulya,Kahomu kulomba chami chakindulukile chakuzeneka kuchikumbulula,*
14 Ngwatambukilenga nakulila kwijiva nge ngunafwisa sepa lyami chipwe ndumbwami.Ngwanongaminenga nakulishona kwijiva nge mutu uze ali nakulila naye.
15 Oloze vakiko vawahililile nakulikungulwila hamwe omu ngwahukanyine.Valikungulwile hamwe nakunguswaminyina mangana vangujihe.Vangutanyine tanyutanyu, kaha kavaholele kuluko.
16 Vaka-kuzamukila Kalunga veji kungutolekanga,*Veji kungungenjungilanga kumazo.+
17 Ove Yehova, nauvatalijizanga palanga nakumwaka uka?+Ngupululule* kuli ava vali nakungufumbukila,+Pululula mwono wami kuvamyevu javandumba mwomwo waulemu.+
18 Kaha nangukusakwililanga muchikungulwilo chachinene.+Nangukwalisanga hamazavu avatu vavavulu.
19 Vaze vapwa vaka-kole jami chakuzeneka mulonga kanda nauvechelela valisambile hali amiko.Vaze vanguhunga chakuzeneka mulonga+ kanda nauvechelela vanguhende hakulinyachila nameso avoko.+
20 Mwomwo kaveshi kuhanjika navakwavo mukuundako,Oloze veji kujinanga kulinga mwamupi kuvatu vakuunda mulifuchi.+
21 Veji kwasamanga mutunwa twavo nakunguvangijikila,Veji kwambanga ngwavo: “Ewa! Ewa! Tunalimwena nameso etu.”
22 Ove Yehova, ove unalimwena, kanda nauhola kuluko.+Ove Yehova, kanda nawimanyina hahasuku nayamiko.+
23 Tona, katuka mangana unguhakwile,Ove Kalunga kami Yehova, nguhakwile hachihande chami.
24 Ove Yehova Kalunga kami, nguhakwile kweseka nakwoloka chove.+Kanda nauvechelela valisambile hali amiko.
25 Kanda navakalyamba ngwavo: “Ewa! Omu mukiko twasakanga.”Kanda navakamba ngwavo: “Tunamuminyi lyehi.”+
26 Vosena vaze veji kulisambilanga havihuli vyamiVavevwise sonyi nakuvasaula.Vaze vali nakulivwimbila hali ami vavevwise sonyi nakuvenyisa.
27 Oloze vaze veji kwivwilanga kuwaha kwoloka chami vatwenga jingunda.Vahanjikenga lika ngwavo:“Vamutohwesenga Yehova, ou eji kwivwanga kuwaha nge ngamba yenyi ali mukuunda.”+
28 Lilimi lyami nalihanjikanga hakwoloka chove,+Nakukwalisanga makumbi osena.+
Kwinyikila Chamwishi
^ Jikepwe jajindende jize vambachilenga vaka-kwasa mata amanana.
^ Chipwe “nangimbu yove yauvela kuvali.”
^ Chipwe “kumwono wami.”
^ Chipwe “mwono wami.”
^ Chipwe “Ngwayanjishile mwono wami.”
^ Chipwe “chakindulukile hatulo yami.”
^ Chipwe pamo, “Vaze vazeneka kwivwa Kalunga woma veji kungutolekelanga hambolo.”
^ Chipwe “Pululula mwono wami.”
