Jisamu 42:1-11
Kuli mukulwane wavaka-kwimba. Masakile* yavana vaKola.+
42 Nganomu kapaji eji kutondatondanga tulwiji vameya,Mukiko nawa ngweji* kukutondatondanga ove Kalunga.
2 Ngweji kwivwanga lipwila* lyakusakasaka Kalunga, ou Kalunga wakuyoya.+Likumbi muka nangukeza nakusoloka kumeso aKalunga?+
3 Masoji ami anapu kulya chami namusana naufuku.Vatu vali nakungutoleka lwola lwosena ngwavo: “Kalunga kove ali kulihi?”+
4 Ngweji kwanukanga vyuma vyakunyima, ngocho ngweji kuhingununanga mwono* wami,Mwomwo ngwatambukilenga nalizavu.Ngwatambukilenga navo hamwe chindende chindende hakuya kuzuvo yaKalunga.Twapwilenga nakulikuwa nakusakwilila,Kwijiva nge lizavu lize lili nakulinga chiwanyino.+
5 Ngunahombela ikaze?+Ngunalizakamina ikaze?Nanguvandaminanga Kalunga,+Mwomwo nangukamwalisa cheka hakupwa Mulwilo wami Wamunene.+
6 Ngunahombo ove Kalunga kami.+Shikaho ngweji kukwanukilanga+Mulifuchi lyaYotau, nahajipili jaHelemone,NahaPili yaMizale.*
7 Kajinga umwe eji kusanyikanga kajinga mukwavoHakuvuma chajipola jove.Makimba ove amanene anangufwiki.+
8 Yehova mwangusolwela zangi yenyi yakwilila namusana,Kaha nangumwimbila mwaso naufuku, mwaso wakulomba kuli Kalunga wakuyoya chami.+
9 Nangwamba kuli Kalunga ou apwa lilolwa lyami ngwami:“Unanguvulyamina ika?+Ikaze nangutambukila nakulinyenga hakunguyanjisa kuli muka-kole?”+
10 Vaka-kole jami veji kungukinjilanga* nakungutoleka.Veji kungutolekanga lwola lwosena ngwavo: “Kalunga kove ali kulihi?”+
11 Ngunahombela ikaze?Ngunalizakamina ikaze?Nanguvandaminanga Kalunga,+Mwomwo nangukamwalisa cheka hakupwa Mulwilo wami Wamunene kaha nawa Kalunga kami.+
Kwinyikila Chamwishi
^ Tala Mukana waMazu.
^ Chipwe “Mukiko nawa mwono wami weji.”
^ Chipwe “Mwono wami weji kwivwanga lipwila.”
^ Tala Mukana waMazu.
^ Chipwe “Nahapili yayindende.”
^ Chipwe pamo, “veji kuchikanga vifuwa vyami.”