Jisamu 72:1-20
Mwaso wakuvuluka Solomone.
72 Ove Kalunga, hana mwangana jishimbi jove,Hana mwanamwangana kwoloka chove.+
2 Mwangana ahakwile vatu jove mukwoloka,Ahakwile nawa vatu jove vakukalikiza nachiyulo.+
3 Jipili jajinene jinehe kuunda kuvatu,Kaha jipili jajindende nawa jinehe kwoloka.
4 Ahakwile* vaka-kukalikiza,Alwile vana vavaka-kuhutwa,Kaha achike vaka-kulyapula vakwavo.+
5 Navakakwivwanga woma chikalu likumbi kulili,Chikalu nawa kakweji kwaliHachisemunwino hichisemunwino.+
6 Mwakapwa nge vula yize nayinokela havijinji vyamwila,Nge mamata avula aze nawazovesa mavu.+
7 Mumakumbi enyi, vaka-kwoloka navakafukilanga,*+Kaha nakukapwa kuunda chamwenemwene+ palanga nomu mwakalinga kakweji wauchiko.
8 Mwakayulanga kufuma kukalungalwiji nakuheta kukalungalwiji mukwavo,Kufuma kuKalwiji* nakuheta kusongosongo yamavu.+
9 Vaze vatwama mulikundu navakalifukula kuli ikiye,Kaha vaka-kole jenyi navakalesa lukungu.+
10 Vamyangana vakuTalashishe, navava vakumatungu navakamuhana milambu.+Vamyangana vakuSheva, navava vakuSeva navakamuhana mawana.+
11 Vamyangana vosena navakalifukula kuli ikiye.Kaha vaka-mafuchi vosena navakamuzachilanga.
12 Mwomwo mwakapululula vaka-kuhutwa vaze vali nakutwa kawelele,Navaka-kukalikiza navaze vazeneka mutu wakuvakafwa.
13 Mwakevwila keke vaka-kukalikiza navaka-kuhutwa,Mwakalwila myono yavaka-kuhutwa.
14 Mwakavapululula* kuluyanjisa nakuulyanyi,Kaha manyinga avo nawakapwa amalemu kumeso enyi.
15 Ayoyenga lika, kaha vamuhanenga ulu wakuSheva.+Vamulombelengako lwola lwosena,Vamukisulenga makumbi osena.
16 Hamavu nahakapwanga mbuto jamanona jakulisala.+Hajipili hosena nahakapwanga mbuto jamanona jajivulu.Jimbuto jenyi najikafukilanga ngana mwajimbuto jakuLevanone,+Kaha vatu mujinganda navakafukilanga ngana mwavyuma vyakusoka hamavu.+
17 Lijina lyenyi lipwengako lika haya myaka yosena,+Kaha lifumakane lika chikalu likumbi kulili.Vatu vavakisulenga kuhichila muli ikiye.+Vaka-mafuchi vosena vamwambenga ngwavo apwa wakuwahilila.
18 Vamwalisenga Yehova Kalunga, ou Kalunga kaIsalele,+Ou eji kulinganga vyuma vyakukomwesa.+
19 Lijina lyenyi lyaupahu valyalisenga haya myaka yosena,+Kaha upahu wenyi uzale hamavu hosena.+Amene, Amene.
20 Aha hakiko hakumina kulomba chaNdavichi, mwanaYese.+
Kwinyikila Chamwishi
^ Hepe., “Ayule.”
^ Hepe., “navakasokanga.”
^ Ikiye Yufwalate.
^ Chipwe “Mwakasokola myono yavo.”
