Jisamu 74:1-23
Masakile* yaAsafwe.+
74 Ove Kalunga, mwomwo ika unatumbilila haya myaka yosena?+Mwomwo ika unakwachila matoto utanga wamikoko vakuulilo wove?+
2 Anuka vatu* vaze wahetele kushikulu,+Muyachi uze wasokwele kupwa uswana wove.+Anuka Pili yaZeyone yize unatwamenga.+
3 Yako kuchihela chize vananongesa ndolokoto.+Muka-kole nanongesa vyuma vyosena muchihela chajila.+
4 Vaka-kole jove valikuwilile muchihela chove chakuliwanyina.*+Vajikile vinjikizo vyavo kuze.
5 Vapwile nge malunga vaze vapakwilenga livunda najingimbu.
6 Vapazwojwele vyuma vyakwola vyamuchihela chajila vyosena+ najingimbu natupachiso twafwelu.
7 Vochele chihela chove chajila.+Valumbilishile tavanaku yize yapwile nalijina lyove hakuyilindumwina hamavu.
8 Vakiko navana vavo vanambe mumichima yavo ngwavo:“Vihela vyaKalunga vyakuliwanyina* vyamulifuchi vyosena vavyoche.”
9 Katweshi nakumona vinjikizoko.Kakweshi cheka kapolofwetoko,Kaha nawa muli etu kamweshi naumwe natachikiza oho nahakumina vyuma kanako.
10 Ove Kalunga, vaka-kole jove navakutolekanga palanga nakumwaka uka?+Uno vaka-kole jove navasaulanga lijina lyove haya myaka yosena tahi?+
11 Mwomwo ika unakonekela lika livoko lyove lyachilyo?+Lyolole uvanongese.
12 Oloze Kalunga ikiye Mwangana wami putu kushikulu,Ikiye eji kulinganga vilinga vyaulwilo hamavu.+
13 Ove wavundwile kalungalwiji nangolo jove.+Wachikile mitwe yatunyama vavanene vamukalungalwiji.
14 Wachikile mitwe yavaLevyatane.*Kaha wayihanyine vatu vaze vatwama mumakundu vayilye.
15 Watuvile tuselwoke navana vatulwiji.+Womishile tulwiji vaze vapwilenga lika nameya.+
16 Musana naufuku vyosena vyapwa vyove.Yove wahakileko kumunyika nalikumbi.+
17 Yove wapulile jingiza jamavu josena.+Yove wahakileko ngonde yavula nangonde yachishika.+
18 Ove Yehova, anuka kutoleka vali nakukutoleka vaka-kole jove,Anuka omu vileya vali nakusaula lijina lyove.+
19 Kanda nauhana tutela twove kuvisumako.Kanda nauvulyama vatu jove vakukalikiza haya myaka yosenako.
20 Anuka chivwasano walikashile navo,Mwomwo vihela vyamilima vyahamavu vinazale naulyanyi lika.
21 Vaze vanahombo kanda navavevwisa sonyiko.+Vaka-kukalikiza navaka-kuhutwa valisenga lijina lyove.+
22 Ove Kalunga, katuka, lihakwile hachihande chove.Anuka omu vileya vali nakukutoleka lwola lwosena.+
23 Kanda nauvulyama vyuma vali nakuhanjika vaka-kole joveko.Liuya lyavaze valikanga kuli ove lili nakukanduka mwilu lwola lwosena.
Kwinyikila Chamwishi
^ Tala Mukana waMazu.
^ Hepe., “lizavu lyove.”
^ Chipwe “muchihela chove chakukungulukila.”
^ Chipwe “Vihela veji kulemeselanga Kalunga.”
^ Tala Mukana waMazu.
