Jisamu 78:1-72
-
Kuzakama chaKalunga nakuzeneka lufwelelo chavaIsalele
Masakile* yaAsafwe.+
78 Enu vatu jami, ivwililenu kujishimbi* jami.Tengelekenu matwitwi enu kumazu amukanwa kami.
2 Nangulokolola mukanwa kami nakuta chishimo.Nangulumbununa tushimutwiji twakushikulu.+
3 Vyuma twevwa nakutachikiza,Vize vatulweza masetu,+
4 Katweshi kuviswekela vana vetuko.Natwambulila chisemunwino chili nakwiza+Vyuma vyakutela kwalisa alingile Yehova, nangolo jenyi nawa.+Natwambulula vyuma vyakukomwesa alingile.+
5 Ahakile mazu akwanukisa muli Yakova,Nakuhaka nawa jishimbi muli Isalele.Ahanyine lushimbi vakakuluka jetuValweze vana vavo vyuma kanevi,+
6 Mangana chisemunwino nachikavangizaho,Vana vavo vaze navasemuka, vakavitachikize.+Kaha navakiko nawa vakavyambulule kuli vana vavo.+
7 Ngocho navakafwelela Kalunga.Kaveshi kukavulyama milimo yaKalungako,+Oloze navakalamanga jishimbi jenyi.+
8 Kaveshi kukapwa nge vakakuluka javo,Chisemunwino chakunjinjavala, chakulikanga,+Chisemunwino chize chahonene kupwa namuchima wakuzama,*+Nakuhona nawa kupwa namuchima wakushishika kuli Kalungako.
9 VaEfwalime valipakachile mata amanana,Oloze vasumine kupoko halikumbi lyajita.
10 Kavalamine chivwasano chaKalungako,+Vakanyine kulama jishimbi jenyi.+
11 Vavulyamine nawa vyuma alingile,+Vyuma vyakukomwesa vize avasolwelele.+
12 Alingile vyuma vyakukomwesa kumeso avakakuluka javo+Mulifuchi lyaEjipitu, mungalila yaZowane.+
13 Apulile kalungalwiji mangana vahite,Kaha alingishile meya emane hwo nge mbango.+
14 Avatwaminyinyine nalivwi namusana,Kaha naufuku avatwaminyinyine nakumunyika chakakahya.+
15 Apulile malolwa mupamboNakuvahana meya amavulu vanwenga kwijiva nge vali nakunwa meya ahakajinga.+
16 Alowele meya amavulu kumalolwaNakulingisa meya ahite nge tulwiji.+
17 Oloze valingilenga lika shili kuli ikiyeHakulikanga kuli Ou Wakulitulaho Chikuma mulikundu.+
18 Vesekele Kalunga mumichima yavo+Hakumutatwokesa avahane vyakulya vize vafwililile.*
19 Ngocho vafulilile Kalunga,Nakwamba ngwavo: “Kutala Kalunga nahase kutuhana vyakulya muno mupambo nyi?”+
20 Talenu! Avetele kulilolwa,Ngocho meya ambwambumukile, kaha tulwiji vazalile.+Oloze vambile ngwavo: “Kutala nahase kutuhana vyakulyaChipwe kuhana etu vatu jenyi nyama nyi?”+
21 Omu Yehova avevwile, apihililile.+Kaha kakahya+ kepukilile Yakova,Akwachilile Isalele matoto+
22 Mwomwo kavafwelelele Kalungako.+Kavafwelelele ngwavo mwahasa kuvalwilako.
23 Ngocho ahanjikile kumelu amavwi,Kaha asokolwele vikolo vyamwilu.
24 Avanokeselele mana mangana valyenga.Avahanyine kulya chamanona chamwilu.+
25 Vatu valile kulya chavaka-ngolo.*+Avahanyine kulya chachivulu mangana vekute.+
26 Ahuhwishile peho yakumututuko,Ahuhwishile nawa peho yakusulo nangolo jenyi.+
27 Kaha avanokeselele nyama yayivulu kwijiva nge lukungu,Avanokeselele tujila vavavulu kwijiva nge usekeseke wakungenge yakalungalwiji.
28 Aholwelele tujila mukachi kachilombo chenyi,Kujimbalaka jenyi josena jingulwishi.
29 Kaha valile nakwikuchila.Avahanyine vize vasakile.+
30 Oloze shimbu kanda valyenga nakwikuta,Shimbu vyalingile vyakulya vichili mutunwa twavo,
31 Utenu waKalunga wejile hali vakiko.+Kaha ajihile vindume javo.+Anongesele vakweze javaIsalele.
32 Oloze valingile lika jishili chamokomoko navyumevi,+Kaha kavafwelelelele mumilimo yenyi yakukomwesako.+
33 Ngocho akumishile makumbi akuyoya chavo kwijiva nge peho yakuhwima,+Akumishile nawa myaka yakuyoya chavo nawoma.
34 Oloze omu avajihilenga, vamutondelenga.+Vakindulukilenga nakutondatonda Kalunga.
35 Vanukilenga ngwavo Kalunga ikiye Lilolwa lyavo,+Ngwavo, Kalunga Ou Wakulitulaho Chikuma ikiye Muka-kuvasokola.*+
36 Oloze vamumbembejekelenga natunwa twavo,Vamwongelenga namalimi avo.
37 Michima yavo kayashishikile kuli ikiyeko.+Kaha kavalamine chivwasano chenyiko.+
38 Oloze avevwililenga keke,+Avakonekelelenga* kuhenga chavo, kaha kavanongeseleko.+Apewilenga matoto enyi+Mukutela kukwata utenu chikuma.
39 Mwomwo anukilenga ngwenyi vanapu vatu kaha,*+Vanapu peho yize yeji kuhitanga chakuzeneka kukinduluka.*
40 Valikangilenga kuli ikiye mapapa kakavulu mupambo,+Vamwivwishilenga kumuchima kukola mulikundu.+
41 Vesekelenga Kalunga mapapa kakavulu,+Kaha vanyengetesele* Ou Wajila waIsalele.
42 Kavanukile ngolo* jenyiko,Kavanukile likumbi lize avapululwile* kuli vaka-kole javoko,+
43 Omu asolwele vinjikizo vyenyi muEjipitu+Navyuma vyakukomwesa mungalila yaZowane,
44 Nomu alumwine meya amutupila twaNyile nakupwa manyinga,+Numba vatu vahone kunwa meya amutulwiji twavo.
45 Atumine mayongomena avikesu mangana vavalye,+Navizunda mangana vavanongese.+
46 Ahanyine jimbuto javo kumavongolo,Ahanyine vyuma vakilikichile kuvambimba makumbi.+
47 Enyekele mivinyo yavoNamisukumole yavo navula yamalolwa.+
48 Ajihile tunyama twavo vakumbata viteli navula yamalolwa,+Ajihile vimuna javo namiveso.*
49 Avasolwelele utenu wenyi,Namatoto enyi, nakulundundu yenyi, nakuvamwenesa luyando.Atumine mazavu avangelo vavanehele vihuli.
50 Awahishilile utenu wenyi jila.Kavevwilile keke kuvajihako.Kaha avanehelelele musongo wachihita.
51 Hakukuminyina ajihile vatwatwa vosena muEjipitu,+Vaze vapwile kuputuka changolo javo jakusema mujimbalaka jaHame.
52 Kaha alowele vatu jenyi kwijiva nge mikoko,Avatwaminyinyine mupambo kwijiva nge utanga.+
53 Avatwaminyinyine nakuvakinga,Ngocho kavevwile womako.+Kalungalwiji afwikile vaka-kole javo.+
54 Kaha avatwalile kungalila yenyi yajila,+Ngalila yajipili yize ahetele nalivoko lyenyi lyachilyo.+
55 Ahangile vaka-mafuchi eka kumeso avo.+Avapulilile uswana wavo namukole wakupimisa.+Kaha atwamishile miyachi yavaIsalele hamembo avo.+
56 Oloze vesekelenga lika Kalunga Ou Wakulitulaho Chikuma nakulikanga kuli ikiye.+Kavahakile muchima kumazu enyi akuvanukisako.+
57 Ngocho vapyapumukile, kaha vapwile vaka-kutangisa ngana mwavakakuluka javo.+Vatu kana kavavafweleleleko ngana mwauta wamanana wakumbwembwela.+
58 Vamwivwishilenga lika kupihya kumuchima navihela vyavo vyakulunduka vyakulemesela,+Vamusowangijile* natuponya twavo vakusonga.+
59 Kalunga amwene vyuma kana, kaha apihililile,+Ngocho akanyine Isalele.
60 Kaha asuvililile tavanaku yakuShilo,+Mbalaka yize atwaminengamo yize yapwile muli vatu.+
61 Echelelele chinjikizo changolo jenyi chiyenga muufunge.Echelelele luvaji lwenyi lupwenga mumavoko avaka-kole jenyi.+
62 Ahanyine vatu jenyi kupoko yamukwale,+Kaha apihililile nauswana wenyi.
63 Kakahya kochele vakweze jenyi,Kaha vajike jenyi vamapwevo kavavembilile mwaso wakuvasombwesa numba umweko.*
64 Vapilishitu jenyi valindumukile kupoko yamukwale,+Kaha mapwevo javo kavalilileko.+
65 Jino Yehova ahindukile kutulo,+Nganomu mwahinduka chindume+ uze anwanga vinyo vyavivulu.
66 Ahangile vaka-kole jenyi,+Kaha avevwishile sonyi haya myaka yosena.
67 Akanyine mbalaka yaYosefwe.Kasakwile muyachi waEfwalimeko.
68 Oloze asakwile muyachi waYuta,+Pili yaZeyone yize azanga.+
69 Alingishile chihela chenyi chajila chipwengangako haya myaka yosena ngana mwamelu,+Ngana mwamavu aze azamisa haya myaka yosena.+
70 Asakwile ngamba yenyi Ndavichi,+Nakumufumisa kulimba lyamikoko,+
71 Amufumishile kumulimo wakufunga mikoko vavihwevo vakwamwisa.Amutongwele kupwa kafunga wakufunga Yakova, vatu jenyi,+Wakufunga Isalele, uswana wenyi.+
72 Avafungilenga namuchima wakulonga,+Kaha avatwaminyinyinenga namavoko akunangakana.+
Kwinyikila Chamwishi
^ Tala Mukana waMazu.
^ Chipwe “kujindongi.”
^ Hepe., “namuchima wakuhona kulizanga.”
^ Chipwe “vyakulya vyamyono yavo.”
^ Chipwe “chavangelo.”
^ Chipwe “Muka-kuvalingila Sambanjinga.”
^ Hepe., “Afwikilenga.”
^ Hepe., “vatu vakwechi mijimba.”
^ Chipwe pamo, “Vanapu shipilitu yize yeji kuyanga, kaha kayeshi kukindulukako.”
^ Chipwe “vevwishile kukola.”
^ Hepe., “livoko.”
^ Hepe., “avasokwele.”
^ Chipwe pamo, “nachishikashika.”
^ Chipwe “Vamwivwishile lisungu.”
^ Hepe., “Kaha vajike jenyi vamapwevo kavavalishileko.”
