Jisamu 86:1-17
Kulomba chaNdavichi.
86 Ove Yehova, tengeleka matwitwi ove* nakungukumbulula,Mwomwo ngunakalikiza kaha nawa ngunahutu.+
2 Kinga mwono wami mwomwo ngwapwa nguwakushishika.+Lwila ami ngamba yove uze akufwelela,Mwomwo ove yove Kalunga kami.+
3 Ove Yehova, ngwivwile uselewa,+Mwomwo ngweji kukusanyikanga lwola lwosena.+
4 Ove Yehova, lingisa ami ngamba yove* nguwahilile,Mwomwo ngweji kulombanga* kuli ove.
5 Mwomwo ove Yehova wapwa uwamwaza,+ kaha weji kukonekelanga.+Weji kusololanga zangi yove yakwilila yayinene kuli vosena vaze veji kukusanyikanga.+
6 Ove Yehova, ivwilila kukulomba chami.Tengeleka matwitwi ove kukulembelela chami ngunakulembelela ungukafwe.+
7 Nangukusanyika halikumbi lyaluyando,+Mwomwo naungukumbulula.+
8 Ove Yehova, kakweshi kalunga weka apwa nge oveko,+Kakweshi milimo yalifwana namilimo yoveko.+
9 Ove Yehova, vaka-mafuchi vosena vaze watengeleNaveza nakulifukula kumeso ove,+Kaha navatohwesa lijina lyove.+
10 Mwomwo ove wapwa uwamunene, kaha weji kulinganga vyuma vyakukomwesa.+Ove yove Kalunga uka wove kaha.+
11 Ove Yehova, ngunangule jila yove.+Nangutambuka mumuchano wove.+Ngukafwe ngupwenga namuchima umwe mangana ngwivwenga lijina lyove woma.+
12 Ove Yehova Kalunga kami, nangukwalisa namuchima wami wosena,+Nangutohwesanga lijina lyove haya myaka yosena,
13 Mwomwo unangusolwela zangi yove yakwilila yayinene,Kaha unalwili mwono wami muFuka.*+
14 Ove Kalunga, vatu vakazamuzamu vali nakungunyemukila.+Lizavu lyavatu vaukenya lili nakungutondatonda lingujihe,Vatu kana kavakuvumbikako.*+
15 Oloze ove Yehova, ove wapwa uKalunga wakeke nakutetela,*Wakushipwokela kukwata utenu, wazangi yakwilila, wakushishika.*+
16 Ngutale nakungwivwila uselewa.+Nguhane ami ngamba yove ngolo jove,+Ngulwile ami mwanandungo yove wapwevo.
17 Ngusolwele chinjikizo* chakuwaha choveMangana vaze vanguhunga vachimone nakwivwa sonyi.Mwomwo ove Yehova, yove muka-kungukafwa, yove muka-kunguvendejeka.
Kwinyikila Chamwishi
^ Chipwe “nongama wivwilile.”
^ Chipwe “lingisa mwono wangamba yove.”
^ Chipwe “ngweji kuzundulanga mwono wami.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Chipwe “kavakuhaka kumeso avoko.”
^ Chipwe “nakukokweza.”
^ Chipwe “wamuchano.”
^ Chipwe “unjiho.”