Jisamu 89:1-52
Masakile* yakaEzela Etane.+
89 Nangwimba vyazangi yaYehova yakwilila haya myaka yosena.Kanwa kami nakajimbula vyakushishika chove kuvisemunwino vyosena.
2 Mwomwo ngunambe ngwami: “Zangi yove yakwilila nayipwangako lika* haya myaka yosena.+Kaha kushishika chove unachizamisa mumelu.”
3 Ove wambile ngwove: “Ngunashiki lushiko ou ngwasakula.+Ngunalishingi kuli ngamba yami Ndavichi ngwami:+
4 ‘Nanguzamisa vaka-tanga* yove+ haya myaka yosena,Nangutunga litanda lyove lipwengangako havisemunwino vyosena.’ ”+ (Sela)
5 Ove Yehova, melu eji kwalisanga milimo yove yakukomwesa,Chikungulwilo chavaka-kujila cheji kwalisanga kushishika chove.
6 Mwomwo iyaze nahase kulyesekesa naYehova mumelu?+Iyaze hali vana vaKalunga+ afwana nge Yehova?
7 Kalunga vamwivwa woma halizavu lyavaka-kujila.+Apwa wamunene kaha nawa wakwivwisa woma kuli vaze vamujingilika vosena.+
8 Ove Yehova Kalunga wamayongomena,Ove Ya,*+ iyaze atwama nangolo ngana mwayove?Wapwa uwakushishika muvyuma vyosena.+
9 Weji kutulisanga kunganjanga chakalungalwiji.+Weji kuunjisanga makimba akalungalwiji.+
10 Lahave+ unamuchiki ngana mwamutu uze vanajihi.+Vaka-kole jove unavamwange nalivoko lyove lyangolo.+
11 Melu apwa ove, mavu nawa apwa ove.+Unazamisa mavu navyosena vyatwamaho.+
12 Yove wahakileko note nasulo.Tavole+ naHelemone+ vyeji kwalisanga lijina lyove nakuwahilila.
13 Livoko lyove lyapwa lyangolo,+Livoko lyove lyapwa lyakujikiza,+Livoko lyove lyachilyo valizezula.+
14 Litanda lyove valitungila hakwoloka nachiyulo.+Zangi yakwilila nakushishika vyatwama kumeso ove.+
15 Vawahilila vaze vatachikiza kulikuwa.+Ove Yehova, vatu kana veji kutambukanga mumumunyi wakumeso ove.
16 Veji kuwahililanga lwola lwosena mwomwo yalijina lyove,Veji kuvazezulanga mwomwo yakwoloka chove.
17 Mwomwo ove yove upahu wangolo javo.+Ngolo* jetu veji kujizezulanga mwomwo yakutwivwila uselewa kuli ove.+
18 Kepwe yetu yafuma kuli Yehova,Mwangana wetu afuma kuli Ou Wajila waIsalele.+
19 Halwola luze, wahanjikile kuli vatu jove vakushishika muchakumwenesa ngwove:“Ngunahane chindume ngolo.+Ngunazezula ou vanasakula hali vatu.+
20 Ngunawane ngamba yami Ndavichi.+Ngunamuwavisa namaji ami ajila.+
21 Livoko lyami nalimuzamisa,+Livoko lyami nalimujikijisa.
22 Kakweshi muka-kole mwakatambula mulambu kuli ikiyeko,Kaha kakweshi muka-kuhenga mwakamuyanjisako.+
23 Vaka-kole jenyi nangukavachikila kumeso enyi chikichiki,+Nangukajiha vaze vamuhunga.+
24 Nangupwanga lika nguwakushishika kuli ikiye nakumusolwela zangi yami yakwilila,+Kaha ngolo* jenyi navajizezulanga mulijina lyami.
25 Nanguhaka livoko* lyenyi hakalungalwiji,Nanguhaka livoko lyenyi lyachilyo hatulwiji.+
26 Mwamba kuli ami ngwenyi: ‘Ove yove Tata,Yove Kalunga kami, yove Lilolwa muka-kungulwila.’+
27 Nangumulingisa kupwa twatwa,+Kupwa wakulitulaho havamyangana vahamavu vosena.+
28 Nangumusolwelanga zangi yami yakwilila haya myaka yosena,+Kaha lushiko ngwamushikile kangweshi kukahona kulutesamoko.+
29 Nanguzamisa vaka-tanga* yenyi haya myaka yosena,Nanguzamisa litanda lyenyi lipwengangako lika ngana mwamelu.+
30 Kachi nge vana venyi navakaseza jishimbi jami,Nakuhona kukavangiza jindongi jami,*
31 Kachi nge navakahokola jindongi jami,Nakuhona kukavangiza jishimbi jami,
32 Kaha nangukavazangamisa nambwechi+ hakulikanga chavo,Nangukavaveta hakuhenga chavo.
33 Oloze kangweshi kukalitwamina kumusolwela zangi yami yakwilila+Chipwe kuhona kutesamo lushiko lwamiko.*
34 Kangweshi kukahokola lushiko lwami,+Chipwe kwalumuna vyuma ngunahanjika namivumbo yamiko.+
35 Ngunalishingi kamwe kunahu hakupwa ngwajila.Kangweshi kulyonga kuli Ndavichiko.+
36 Vaka-tanga* yenyi navapwangako haya myaka yosena.+Litanda lyenyi nalipwangako lika nganomu lyapwa likumbi kumeso ami.+
37 Nalizamanga haya myaka yosena ngana mwakakwejiUze apwa chinjiho wakushishika wamumelu.” (Sela)
38 Oloze ove unamumbili nakumukana.+Unapihilila nayou wove wawavisa.
39 Unakane lushiko washikile ngamba yove.Unajilulula muchama wenyi hakuumbila hamavu.
40 Unapuzula jikembwe jenyi jamalolwa josena.*Unalingisa jikembwe jenyi kupwa malala.
41 Mahitajila vosena vanapupu vyuma vyenyi.Vaze alihata navo vali nakumutoleka.+
42 Unalingisa vaka-kole jenyi vafungulule.*+Unalingisa vaka-kole jenyi vosena vawahilile.
43 Unakindulwisa nawa poko yenyi yamukwale,Kaha unamuhonesa kufungulula jita.
44 Unakumisa luvaji lwenyi,Unambili litanda lyenyi hamavu.
45 Unakehesa makumbi aukweze wenyi.Unamwivwisa sonyi. (Sela)
46 Ove Yehova, nauswamanga palanga nakumwaka uka? Haya myaka yosena tahi?+Kulundundu yove nayepukanga lika nge kakahya tahi?
47 Anuka omu yakeha myaka yakuyoya chami.+Kutala vatu wavatengele tuhu chamokomoko nyi?
48 Mutu mukaze nahase kuyoya lika nakuzeneka kufwa?+Kutala nahase kulilwila* kungolo jaFuka* nyi? (Sela)
49 Ove Yehova, vilinga vyazangi yove yakwilila vize walingilenga kunyima,Vize walishingile kuli Ndavichi mwomwo yakushishika chove vili kulihi?+
50 Ove Yehova, anuka kutoleka vali nakutoleka vangamba jove,Nomu nguli nakwivwa* hakungutoleka kuli vatu veka naveka vosena,
51 Nomu vaka-kole jove vali nakungutukana, ove Yehova,Nomu nawa vali nakutomba jingano jayami wove wawavisa.
52 Vamwalisenga Yehova haya myaka yosena. Amene, Amene.+
Kwinyikila Chamwishi
^ Tala Mukana waMazu.
^ Chipwe “navayitunganga.”
^ Hepe., “mbuto.”
^ “Ya” hilijina lyaYehova mukavatu.
^ Hepe., “Lumbinga.”
^ Hepe., “lumbinga.”
^ Chipwe “wata.”
^ Hepe., “mbuto.”
^ Chipwe “mazu ami akuyula.”
^ Hepe., “Chipwe kulyonga kupandama kukushishika chamiko.”
^ Chipwe “Mbuto.”
^ Chipwe “visakila vyenyi vyamalolwa vyosena.”
^ Hepe., “Unazundula mavoko avilyo avaka-kole jenyi.”
^ Chipwe “kulwila mwono wenyi.”
^ Hepe., “kulivoko lyaSheyole,” kulumbununa fuka yavatu vosena. Tala Mukana waMazu.
^ Hepe., “nakumbata hatulo yami.”
