Jisamu 94:1-23
94 Ove Yehova, ove Kalunga muka-kulinga sambanjinga,+Ove Kalunga muka-kulinga sambanjinga, munyika.
2 Ove Muka-kuyula vaka-mavu, katuka.+Shishishilamo vaka-kulivwimba kweseka navilinga vyavo.+
3 Ove Yehova, vaka-kuhuka navalisambanga palanga nakumwaka uka?Uno navalisambanga likaze palanga nakumwaka uka?+
4 Veji kutavwanga nakuhanjika nakulivwimba.Vaka-kulinga mwamupi vosena veji kulitukwojolanga.
5 Ove Yehova, veji kuchikanga vatu jove+Nakuyanjisa uswana wove.
6 Veji kujihanga vatuliwe navamwiza,Veji kujihanga nawa vana vakuzeneka masevo.
7 Veji kwambanga ngwavo: “Ya* keshi kumonako.+Kalunga kaYakova katachikiza vyuma vili nakulingiwako.”+
8 Enu vatu vakuzeneka mangana, tachikizenu chumechi.Enu vileya, mwaka uka namukanangakana?+
9 Ou atengele* litwitwi, kutala keshi kuhasa kwivwako numba?Ou atengele liso, kutala keshi kuhasa kumonako numba?+
10 Ou eji kwololanga vaka-mafuchi, kutala keshi kuhasa kumihanjikilako numba?+Ikiye muka-kuhana vatu chinyingi.+
11 Yehova atachikiza vishinganyeka vyavatuNgwenyi vyapwa nge peho yakuhwima kaha.+
12 Ove Ya, awahilila mutu ou weji kwololanga,+Ou weji kunangulanga jishimbi jove,+
13 Mangana apwenga wakuunda halwola lwaluyando,Palanga nomu navafulila vaka-kuhuka wina.+
14 Mwomwo Yehova keshi kukaseza vatu jenyi,+Chipwe kusuvilila uswana wenyiko.+
15 Mwomwo chiyulo nachikapwa cheka chakwoloka,Kaha vaze vasungama mumichima vosena navakachikavangiza.
16 Iya mwangukafwa kunyemukila vaka-kuhuka?Iya mwangukafwa kwimanyina nakole vaka-kulinga mwamupi?
17 Kachi nge Yehova kungukafwa pimbi,Kachi ngwanonga lyehi.*+
18 Omu ngwambile ngwami: “Lihinji lyami lili nakusenunuka,”Zangi yove yakwilila ove Yehova yangukwachililile.+
19 Omu ngwalizakaminyine* chikuma,Ove wanguvendejekele nakunguunjisa muchima.+
20 Kutala vaka-kuyula vavapi vanahase kulikata nayoveOkunyi vanajinyi kuyanjisa vatu hakulyongela mujishimbi* nyi?+
21 Vananyemukila muka-kwoloka,*+Kaha vanatongwela kufwa mutu wakuzeneka mulonga.*+
22 Oloze Yehova mwapwa chihela chami chakukola,Kalunga kami ikiye lilolwa lyami lyakuswamamo.+
23 Mwavashishishilamo havyuma vyavipi valingilenga.+Mwavanongesa* havilinga vyavo vyavipi.Yehova Kalunga ketu mwavanongesa.*+
Kwinyikila Chamwishi
^ “Ya” hilijina lyaYehova mukavatu.
^ Hepe., “atumbile.”
^ Hepe., “ngwahola lyehi kulu.”
^ Chipwe “ngwayanjile navishinganyeka.”
^ Chipwe “mujindongi.”
^ Hepe., “Kaha vanahane mulonga manyinga amutu wakuzeneka mulonga.”
^ Chipwe “mwono wamuka-kwoloka.”
^ Hepe., “Mwavaholesa kulu.”
^ Hepe., “mwavaholesa kulu.”
