Kulava 10:1-36
10 Yehova ambile kuli Mose ngwenyi:
2 “Lifulile jineta jivali japalata,+ ukajizachise hakusanyika lizavu, nahakukatula vatu muvilombo.
3 Omu navakemba eji jineta josena jivali, lizavu lyosena likeze kuli ove, kuchikolo chambalaka yakuliwanyina.+
4 Oloze omu navakemba luneta lumwe, vamyata, vatwamina jamakombakaji avaIsalele, vakiko kaha navakeza kuli ove.+
5 “Omu navakemba luneta lwachivumo chakulihandununa handununa, vaka-chilombo chakumutamba wakumututuko+ vakakatuke nakuya.
6 Kahomu navakemba kamuchivali luneta lwachivumo chakulihandununa handununa, vaka-chilombo chakumutamba wakusulo+ vakakatuke nakuya. Vakembenga jineta mujila kaneyi hakukatula vaka-chilombo hichilombo.
7 “Jino hakusanyika lizavu mangana likunguluke, vakembe jineta,+ oloze keshi muchivumo chakulihandununa handununako.
8 Vana vaAlone vaze vapwa vapilishitu, vakiko navakembanga jineta.+ Kuzachisanga jineta nachipwanga lushimbi muvisemunwino vyenu vyosena myaka namyaka.
9 “Kachi nge namulwa jita navaka-kole jenu vaze vali nakumiyanjisa mulifuchi lyenu, mukembe jineta muchivumo chakulizanga kuya kujita,+ kaha Yehova Kalunga kenu mwakamyalakana, nakumilwila kuli vaka-kole jenu.
10 “Kaha nawa havilika vyenu vyakuwahilila,+ haviwanyino vyenu,+ nahakumweka chatukweji twenu, mukembile jineta kuwana wenu wakulumba,+ nawana wenu wakusolola kuunda.+ Jineta kana najikapwanga jakumyanukilaho kumeso aKalunga kenu. Ami yami Yehova Kalunga kenu.”+
11 Jino mumwaka wamuchivali, mukakweji wamuchivali, halikumbi lyakusokesa 20,+ livwi lyakatukile hatavanaku+ yaUnjiho.
12 Ngocho vaIsalele vakatukile mupambo yaShinai kweseka najila yakukatukilamo vavalwezele,+ kaha livwi lyakatwamine mupambo yaPalane.+
13 Elu lukiko lwapwile lwola lwatete kukatuka nge muze avalwezele Yehova kuhichila muli Mose.+
14 Chilombo chavana vaYuta chamiyachi yitatu chalivangile kukatuka kweseka namazavu avo.* Kaha Nashone+ mwanaAminatave atwaminyinyine lizavu lyenyi.
15 Netanele+ mwanaZuwale atwaminyinyine lizavu lyamuyachi wavana vaIsakale.
16 Kaha Elyave+ mwanaHelone atwaminyinyine lizavu lyamuyachi wavana vaZevulune.
17 Omu vashiwile tavanaku,+ vana vaNgeleshone+ navana vaMelali+ vaze vambachilenga tavanaku vakatukile nakuya.
18 Kaha chilombo chaLuvene chamiyachi yitatu chakatukile kweseka namazavu avo.* Elizule+ mwanaSheteule atwaminyinyine lizavu lyenyi.
19 Shelumyele+ mwanaZulishatai atwaminyinyine lizavu lyamuyachi wavana vaShimeyone.
20 Kaha Elyasafwe+ mwanaNduwele atwaminyinyine lizavu lyamuyachi wavana vaNgate.
21 Kaha vaKohate vaze vambachilenga vyuma vyamuchihela chajila+ vakavile hanyima. Yize tavanaku vatelele kuyiwana yakutunga lyehi halwola vahetele.
22 Kaha chilombo chavana vaEfwalime chamiyachi yitatu chakatukile kweseka namazavu avo.* Elishama+ mwanaAmihute atwaminyinyine lizavu lyenyi.
23 Ngamalyele+ mwanaPetazule atwaminyinyine lizavu lyamuyachi wavana vaManase.
24 Kaha Avitane+ mwanaNgiteyonyi atwaminyinyine lizavu lyamuyachi wavana vaMbenjamine.
25 Kaha chilombo chavana vaNdane chamiyachi yitatu chakatukile kweseka namazavu avo.* Vakiko vapwile munyima nakukinga vilombo vyosena. Ahyezele+ mwanaAmishatai atwaminyinyine lizavu lyenyi.
26 Pangiyele+ mwanaOkolane atwaminyinyine lizavu lyamuyachi wavana vaAshele.
27 Ahila+ mwanaEnane atwaminyinyine lizavu lyamuyachi wavana vaNafwatale.
28 Eyi yikiko jila yakukatukilamo vakavangijilenga vaIsalele namazavu avo* omu vakatukilenga nakuya.+
29 Jino Mose ambile kuli Hovave, mwanaisewenu Leule*+ kaMichane, ngwenyi: “Tuli nakuya kuchihela chize Yehova ambile ngwenyi, ‘Nangukachihana kuli enu.’+ Ngocho tuyenga hamwe,+ natukatwamanga nove kanawa, mwomwo Yehova nashiki kulingila vaIsalele vyuma vyamwaza.”+
30 Ikiye amwambile ngwenyi: “Kangweshi kuya nayenuko. Nangukinduluka kulifuchi lyami, kuli vausoko wami.”
31 Oloze Mose ambile ngwenyi: “Kanda utusezako, mwomwo ove yove unatachikiza kunatutungilanga vilombo mupambo, ngocho unahase kututetekela.*
32 Kachi nge nauya nayetu hamwe,+ kaha kuwaha chosena mwakatusolwela Yehova natukakusolwelacho nayove nawa.”
33 Ngocho vakatukile kupili yaYehova+ nakutambuka tunda yamakumbi atatu, kaha chikasha+ chalushiko lwaYehova chatetekelele kulutwe lwavo hamakumbi aze atatu nakuvatondela chihela chakunokela.+
34 Kaha livwi+ lyaYehova lyapwilenga helu lyavo namusana omu vakatukilenga hachilombo nakuya.
35 Omu vazundwilenga chize Chikasha, Mose ambilenga ngwenyi: “Ove Yehova+ katuka, vaka-kole jove valimwange, kaha vaze vakuhunga vachine kumeso ove.”
36 Kahomu vachitulilenga, ambilenga ngwenyi: “Ove Yehova, kinduluka kumakombakaji amavulu avaIsalele.”+
Kwinyikila Chamwishi
^ Hepe., “kweseka namayongomena avo.”
^ Hepe., “kweseka namayongomena avo.”
^ Hepe., “kweseka namayongomena avo.”
^ Hepe., “kweseka namayongomena avo.”
^ Hepe., “kweseka namayongomena avo.”
^ Ikiye Yetelo.
^ Chipwe “unahase kupwa meso etu.”