Kulava 12:1-16
12 Jino Milyame naAlone vaputukile kufulilila Mose, mwomwo yapwevo wakaKushe uze ambachile.+
2 Vambile ngwavo: “Uno Yehova ali nakuhanjikila muli Mose kaha numba? Uno keshi nakuhanjikila namuli etuko nyi?”+ Yehova apwile nakwivwilila.+
3 Jino Mose apwile mutu wamuvwovu kuhambakana vatu vosena*+ hamavu.
4 Yehova ambile kuli Mose, naAlone, naMilyame ngwenyi: “Yenu kumbalaka yakuliwanyina muvosena muvatatu.” Ngocho vosena vatatu vayile.
5 Jino Yehova ejile mupanda yalivwi+ nakwimana kuchikolo chambalaka, kaha asanyikile Alone naMilyame. Ngocho vosena vavali vaswenyele kulutwe.
6 Kalunga ambile ngwenyi: “Ivwenu mazu nangumilweza. Kachi nge muli enu mwapwanga kapolofweto kaYehova, kachi nangulijimbula kuli ikiye muchakumwenesa,+ nakuhanjika naikiye muchilota.+
7 Oloze omu keshi mukiko ngweji kulinganga kuli ngamba yami Moseko. Ikiye ngunamuhane kulama zuvo yami yosena.*+
8 Ngweji kuhanjikanga nenyi meso nameso,*+ mujila yayashi keshi yakujiminyinako. Eji kumonanga omu asoloka Yehova. Nyi ikaze mwazenekelanga kwivwa woma numba mufulilile ngamba yami Mose?”
9 Ngocho utenu waYehova wejile hali vakiko, kaha avasezele.
10 Jino lize livwi lyafumine helu lyambalaka, kaha hahaze vene Milyame apwile nambumba yitoma to.+ Kahomu Alone atalile Milyame, amumwene ali nambumba.+
11 Hahaze vene Alone ambile kuli Mose ngwenyi: “Ngunakulembelela ove mwata wami. Kanda utuhana mulonga hashili kaneyiko. Tunalingi vyuma vyauleya.
12 Kanda umwechelela apwenga nge hikemba wakufwa, ukwechi nyama yenyi yinapolo kufuma mujimo lyanayeko.”
13 Ngocho Mose atetele kuli Yehova ngwenyi: “Ove Kalunga kami, muhindule!”+
14 Kaha Yehova ambile kuli Mose ngwenyi: “Kachi nge ise amufwijilanga maleji kumeso, kutala kachi katwamine makumbi 7 nasonyiko numba? Muhandulenu kuvakwavo hamakumbi 7, atwame kuweluka wachilombo,+ kufumaho numba mumukindulwise muchilombo.”
15 Kaha Milyame vamuhandwile kuvakwavo, atwamine kuweluka wachilombo makumbi 7.+ Vatu kavakatukile nakuyako palanga nomu Milyame vamukindulwishile muchilombo.
16 Ngocho vatu vakatukile jino kuHazelote,+ vakatungile chilombo mupambo yaPalane.+
Kwinyikila Chamwishi
^ Chipwe “apwile wakulinyisa kuhambakana vatu vosena.”
^ Hepe., “Ikiye wakushishika muzuvo yami yosena.”
^ Hepe., “kanwa nakanwa.”
