Kulava 13:1-33
13 Yehova ahanjikile kuli Mose ngwenyi:
2 “Tuma malunga vakasondwese lifuchi lyaKanane lize nanguhana kuli vaIsalele. Utume lunga umwe umwe kumuyachi wavakakuluka jenyi, uze apwa mwata+ muli vakiko.”+
3 Ngocho Mose avatumine kufuma mupambo yaPalane+ nge muze amulwezele Yehova. Ava malunga vosena vapwile vatwamina javaIsalele.
4 Awa akiko majina avo: Shamuwa mwanaZakule, wakumuyachi waLuvene.
5 Shafwate mwanaHoli, wakumuyachi waShimeyone.
6 Kaleve+ mwanaYefune, wakumuyachi waYuta.
7 Ingale mwanaYosefwe, wakumuyachi waIsakale.
8 Hosheya+ mwanaNune, wakumuyachi waEfwalime.
9 Palachi mwanaLafu, wakumuyachi waMbenjamine.
10 Ngachiyele mwanaSochi, wakumuyachi waZevulune.
11 Ngachi mwanaSushi wakumuyachi waYosefwe+ uze wemanyinyineko muyachi waManase.+
12 Amiyele mwanaNgemali, wakumuyachi waNdane.
13 Setule mwanaMikayele, wakumuyachi waAshele.
14 Navi mwanaVofwoshi, wakumuyachi waNafwatale.
15 Nguwele mwanaMaki, wakumuyachi waNgate.
16 Awa akiko majina amalunga vaze atumine Mose mangana vakasondwese lifuchi. Kaha Mose alukile Hosheya mwanaNune ngwenyi Yoshuwa.*+
17 Omu Mose avatumine kuya nakusondwesa lifuchi lyaKanane, avambile ngwenyi: “Yenunga kuNengeve, kaha mukaye nawa nakungalila yajipili.+
18 Katalenu omu lyapwa lifuchi kana,+ nakumona numba nge vatu vatwamamo vangolo nyi vakuhehela, numba nge vavandende nyi vavavulu.
19 Katalenu numba nge lifuchi kana lyamwaza nyi lyalipi, numba nge vatu vatwama muvilombo nyi mujinganda jakukingiwa.
20 Katalenu nawa numba nge lifuchi kana lyawilo* nyi lyakuzeneka wilo,*+ numba nge lili namitondo nyi pimbi. Komikenu+ mukambate mihako yamulifuchi kana.” Eyi yapwile ngonde yaputukile kuhya mihako yakulivanga yavinyo.+
21 Ngocho vayile, vasondwesele lifuchi kufuma mupambo yaJine+ swi nakuLehove,+ nakuLevo-hamate.*+
22 Omu vahetele kuNengeve, vayile kuHevelone+ kuze atwaminenga Ahimane, naSheshai, naTalamai,+ vaze vapwile vaAnake.+ Nganda yaHevelone valivangile kuyitunga, kaha mwahichile myaka 7 numba vatunge Zowane yakuEjipitu.
23 Kahomu vahetele kuChinema* chaEshekole,+ vatetele mutango wapwile namususu wamihako yamivinyo, vaukulikile kuli malunga vavali kuluhango. Vambachile nawa jiloma* najikuyu.+
24 Chihela kana vachilukile ngwavo Chinema* chaEshekole,*+ mwomwo yamususu uze vatetele vaIsalele kuze.
25 Omu akumine makumbi 40,+ vakindulukile kuze vayile nakusondwesa lifuchi.
26 Vahetele kuli Mose naAlone nakulizavu lyavaIsalele lyosena mupambo yaPalane, kuKateshe.+ Vambulilile lizavu lyosena mujimbu, nakuvalwekesa mihako yalifuchi kana.
27 Ou ukiko mujimbu vambulwile kuli Mose, ngwavo: “Twakengilanga mulifuchi lize watutumine. Linapu lifuchi lyakumbwambumuka mavele nauchi,+ kaha eyi yikiko mihako yatwamamo.+
28 Oloze vatu vatwama mulifuchi kana vangolo, kaha jinganda jakukingiwa jilimo jajinene chikuma. Twakamonanga navaAnake kuze.+
29 VaAmaleke+ vatwama kungalila yaNengeve,+ kaha vaHete navaYevuse,+ navaAmole+ vatwama kungalila yajipili. VaKanane+ vatwama kukalungalwiji,+ nakuchikulo chaYotau.”
30 Kaha Kaleve aunjishile vatu vaze vemanyine kumeso aMose hakwamba ngwenyi: “Tuyenu oholyapwa vene ngana, lifuchi kana natuliheta chikupu, mwomwo tunahase kulifungulula.”+
31 Oloze vaze malunga ayile navo vambile ngwavo: “Katweshi kuhasa kuya nakulwa navatu kanako, mwomwo vali nangolo kutuhambakana etu.”+
32 Kaha valwezelenga vaIsalele mujimbu waupi+ walifuchi vayile nakusondwesa ngwavo: “Lifuchi lize twayanga nakusondwesa lyeji kunongesanga vatu vatwamamo, kaha malunga vosena twamonangamo vakutaluka chikuma.+
33 Twamonanga nawa vaNefwile, vana vaAnake,+ vakusemuka kuli vaNefwile. Twalimonanga nge tuvambimba kuli vakiko, kahomu mukiko vatumonanga navakiko nawa.”
Kwinyikila Chamwishi
^ Chipwe “Yehoshuwa,” kulumbununa “Yehova Ikiye Ulwilo.”
^ Hepe., “lyakuminyina.”
^ Hepe., “lyamaji.”
^ Chipwe “nakuwingililo wakuHamate.”
^ Chipwe “kuMwanakalwiji.”
^ Jiloma japwa himuyachi umwe wamihako.
^ Chipwe “Mwanakalwiji.”
^ Ulumbunwiso, “Mususu waMihako.”
