Kulava 14:1-45
14 Jino lizavu lyavatu lyosena lyaputukile kutambakana nalizu lyakukanguka, kaha vatu kana vatetelenga nakulila ufuku wosena uze.+
2 VaIsalele vosena vaputukile kutatwokesa Mose naAlone.+ Kaha lizavu lyosena lyambile kuli vakiko ngwavo: “Kachi twafwililile mulifuchi lyaEjipitu, numba kufwila tuhu muno mupambo!
3 Mwomwo ika Yehova mwatutwalila mulifuchi kana, mangana tukalindumuke kujipoko jamikwale?+ Mapwevo jetu navana vetu navakejiva kulimbachilavo.+ Chinawahe kuli etu kukinduluka kuEjipitu.”+
4 Valyambilenga mwavomwavo ngwavo: “Tutongolenu twamina, tukindulukenu kuEjipitu!”+
5 Ngocho Mose naAlone vafukamine chameso hamavu kumeso alizavu lyavaIsalele lyosena lize lyakungulukile.
6 Kaha Yoshuwa+ mwanaNune naKaleve+ mwanaYefune vaze vapwile hali vaze vayile nakusondwesa lifuchi, vapihililile nakupula uvwalo wavo.
7 Vambile kulizavu lyavaIsalele lyosena ngwavo: “Lifuchi lize twayanga nakusondwesa hilifuchi lyamwaza chikumakuma.+
8 Kachi nge Yehova natwivwila kuwaha, mwatutwala chikupu mulifuchi kana nakutuhanalyo. Linapu lifuchi lyakumbwambumuka mavele nauchi.+
9 Shikaho kanda namulikanga kuli Yehova, chipwe kwivwa woma wavatu vamulifuchi kanako,+ mwomwo natukavanongesa.* Kaveshi nayou wakuvakingako, oloze etu tuli naYehova.+ Kanda namuvevwa womako.”
10 Jino lizavu lyosena lyajinyine kuvasa malolwa.+ Oloze upahu waYehova wasolokele kuli vaIsalele vosena hambalaka yakuliwanyina.+
11 Yehova ambile jino kuli Mose ngwenyi: “Ava vatu navazenekanga kunguvumbika palanga nakumwaka uka?+ Navazenekanga kungufwelela palanga nakumwaka uka chamokomoko navinjikizo vyosenevi ngunalingi muli vakiko?+
12 Mana nguvavete namusongo wachihita, nguvanongese, nakukulingisa ove kupwa umuyachi waunene, wangolo chikuma kuhambakana vakiko.”+
13 Oloze Mose ambile kuli Yehova ngwenyi: “Nge vaka-Ejipitu navevwa vyuma naulinga kuvatu kana ava walowele muEjipitu nangolo jove,+
14 kaha navalweza vatu vamulifuchi lino. Mwomwo navakiko vanevu ngwavo ove Yehova uli muli vakiko,+ kaha unalisolola kuli vakiko meso nameso.+ Ove yove Yehova, kaha livwi lyove lili hali vakiko, uli nakuvatetekela napanda yalivwi namusana, kaha naufuku uli nakuvatetekela napanda yakakahya.+
15 Kachi nge naujiha vatu vosena ava halwola lwolumwe,* kaha vaka-mafuchi vaze vanevu puho yove navamba ngwavo:
16 ‘Yehova nahono kutwala vatu ava mulifuchi lize alishingile kuvahana, shikaho navajihila mupambo.’+
17 Ngocho ove Yehova, ngolo jove jitohwe nge omu washikile ngwove:
18 ‘Yehova wakushipwokela kukwata utenu, wazangi yakwilila,+ apwa muka-kukonekela milonga yavatu, navaka-kuzombwojoka jishimbi. Oloze mwakazangamisa vatu vakuzeneka kupihilila nakwalumuka. Mwakazangamisa nawa vana, navazukulu, natukwatambuli, hakuhenga chamasevo.’+
19 Konekela milonga yavatu ava kweseka nazangi yove yakwilila, nge omu unavakonekelanga kufuma vene haze valovokele muEjipitu nakulelo lino.”+
20 Kaha Yehova ambile ngwenyi: “Ngunavakonekela nge omu unahanjika.+
21 Oloze omu ngwayoya tu, hamavu hosena nahakazala naupahu waYehova+ lika.
22 Chipwe ngocho, vatu vosena vaze vanamono upahu wami navinjikizo vyami+ ngunalingi muEjipitu namuno mupambo, vaze vanangweseka+ mapapa osena awa 10, nakuzeneka kwivwilila mulizu lyami,+
23 kaveshi kukamona lifuchi lize ngwalishingile kuli vakakuluka javoko. Vosena vaze vanazeneka kunguvumbika kaveshi kukalimonako.+
24 Oloze muchima wangamba yami Kaleve+ walihandununanga nawou wavakwavo. Ikiye angukavangizanga namuchima wenyi wosena, ngocho nangukamwingisa mulifuchi lize ayile, kaha vana venyi navakaliheta.+
25 Hakuwana nge vaAmaleke navaKanane+ vali nakutwama kuchinema,* ngocho hamene kakindulukenu, kahitenu jila yakuKalungalwiji Uchila+ mukaye mupambo.”
26 Yehova ambile jino kuli Mose naAlone ngwenyi:
27 “Eli lizavu lyalipi nalingutatwokesanga palanga nakumwaka uka?+ Ngunevu omu vaIsalele vali nakungutatwokesa.+
28 Hanjika kuli vakiko ngwove, ‘Yehova nambe ngwenyi: “Omu ngwayoya tu, nangumilinga kweseka navyuma ngunevu munahanjika.+
29 Enu muvosena vasonekele vamyaka yakusemuka 20 nakuya kwilu, enu munangutatwokesa,+ mijimba yenu nayilindumukila+ muno mupambo.
30 Mulifuchi lize ngwalishingile* ngwami mukatwamemo, naumwe wauchi mwakengilamo,+ shina Kaleve mwanaYefune, naYoshuwa mwanaNune+ kaha.
31 “‘“Vana venu vaze mwambanga ngwenu navakejiva kulimbachilavo,+ vakiko nangukengisamo, kaha navakatachikiza lifuchi eli munakane.+
32 Oloze mijimba yenu nayilindumukila muno mupambo.
33 Vana venu navakapwanga tufunga muno mupambo hamyaka 40.+ Kaha navakavazangamisa hakuzeneka chenu kushishika,* palanga nomu mutu wamakumishilo muli enu mwakalindumuka muno mupambo.+
34 Navakamizangamisa hakuhenga chenu hamyaka 40,+ mwaka halikumbi mwaka halikumbi kweseka namakumbi 40+ aze mwayile nakusondwesa lifuchi, mangana mukatachikize kupihya chatwama hakungufumbukila.
35 “‘“Ami Yehova ngunahanjika. Omu mukiko nangulinga kulizavu kaneli lyalipi, eli linakunguluka nakungufumbukila: Muno mupambo mukiko munavahwila vosena, mukiko navafwila.+
36 Malunga vaze atumine Mose vakasondwese lifuchi, vaze vakindulukile namujimbu waupi walifuchi kana+ nakulingisa jino lizavu lyosena limutatwokese,
37 malunga vaze vanehele mujimbu waupi walifuchi kana navavaveta nakufwa kumeso aYehova.+
38 Oloze Yoshuwa mwanaNune naKaleve mwanaYefune, vaze vapwile hali vaze vayile nakusondwesa lifuchi navayoyanga lika.”’”+
39 Omu Mose ahanjikile mazu kana kuli vaIsalele vosena, vatu vaputukile kulila chikuma.
40 Kaha vahindukile chimenemene mangana ngwavo vayenga helu lyapili. Vambile ngwavo: “Tunalizange kuya kuchihela chize avulukile Yehova mwomwo tunalingi shili.”+
41 Oloze Mose ambile ngwenyi: “Ikaze namuzombokela lushimbi lwaYehova? Kamweshi kufukilako.
42 Kanda namuyako mwomwo Yehova keshi nayenuko, mokomoko navamifungulula kuli vaka-kole jenu.+
43 Namukazunga navaAmaleke navaKanane,+ kaha namukalindumuka kujipoko jamikwale. Hakuwana nge munakane kukavangiza Yehova, Yehova keshi kupwa nayenuko.”+
44 Jino mukazamuzamu kavo, vaputukile kukanduka helu lyapili.+ Oloze chikasha chalushiko lwaYehova kachakatukile muchilomboko,+ naMose nawa kakatukileko.
45 Kaha vaAmaleke navaKanane vaze vatwaminenga kupili yize vashikumukile nakuveta vaIsalele, kaha vavahangasanyine palanga nakuHoloma.+
Kwinyikila Chamwishi
^ Hepe., “mwomwo vanapu kulya chetu.”
^ Hepe., “vosena ava nge mutu umwe.”
^ Chipwe “kuchana.”
^ Hepe., “lize ngwemikilile livoko lyami.”
^ Hepe., “navakavazangamisa mwomwo yaujila wenu.”
