Kulava 15:1-41
-
Jishimbi jahanjika hamawana (1-21)
-
Lushimbi lwolumwe lwavaIsalele navamwiza (15, 16)
-
-
Mawana avaze navalinga shili chakuzeneka kuchisakula (22-29)
-
Mwakuzangamishila vaze navalinga shili chakuchisakula vavene (30, 31)
-
Kujiha mutu nahokola lushimbi lwaSambata (32-36)
-
Uvwalo upwenga najizombo kusongo (37-41)
15 Yehova ahanjikile cheka kuli Mose ngwenyi:
2 “Hanjika kuli vaIsalele ngwove, ‘Omu namukalinga himunengila lyehi mulifuchi lize nangumihana,+
3 omu namukahananga wana wakwocha hakakahya kuli Yehova, wavangombe chipwe wamikoko, numba upwa wana wakulumba,+ chipwe wana wachimuna wakuvatula walushiko lwakulipwila, chipwe wana wakulisakila,+ chipwe wana wahaviwanyino vyenu vyamumwaka,+ wakuneha livumba lyalupengopengo* kuli Yehova,+
4 uze mwakahana wana wenyi, akahanyine kumwe nawana wamanona waunga wamwaza+ kuli Yehova. Ukapwe chimbwa chimwe chaunga chakusokesa muvimbwa 10 vyalifwa* chakuchingasana nachimbwa chimwe chamaji chakusokesa muvimbwa viwana vyahine.*
5 Mukahane nawa vinyo vyakuteseka muchimbwa chimwe chakusokesa muvimbwa viwana vyahine kupwa wana wavinyo. Mukavihanyine kumwe nawana wakulumba+ chipwe wana wachimuna wakuvatula, hamwanamukoko himwanamukoko wachizamba.
6 Kaha hakuhana nawa chizamba chamukoko, mukamuhanyine kumwe nawana wamanona kafwe vimbwa vivali vyaunga wamwaza vyakusokesa muvimbwa 10, vyakuchingasana nachimbwa chimwe chamaji chakusokesa muvimbwa vitatu vyahine.
7 Mukahane nawa vinyo vyakuteseka muchimbwa chimwe chakusokesa muvimbwa vitatu vyahine kupwa wana wavinyo, wakuneha livumba lyalupengopengo* kuli Yehova.
8 “‘Oloze kachi nge namuhana ngombe wakuji kuli Yehova kupwa wana wakulumba,+ chipwe wana wachimuna wakuvatula walushiko lwakulipwila,+ chipwe wana wakusolola kuunda,+
9 kaha mukamuhanyine kumwe nawana wamanona+ wavimbwa vitatu vyakusokesa muvimbwa 10 vyaunga wamwaza wakuchingasana nachimbwa chimwe chahine chamaji.
10 Mukahane nawa vinyo vyakuteseka muchimbwa chimwe chahine kupwa wana wavinyo,+ wakwocha hakakahya, wakuneha livumba lyalupengopengo* kuli Yehova.
11 Omu mukiko namukalinganga hakuhana ngombe hingombe wakuji, chipwe mukoko himukoko wachizamba, chipwe mwanamukoko himwanamukoko wachizamba, chipwe mwanapembe himwanapembe wachizamba.
12 Mukalingenga ngocho hachimuna hichimuna kweseka nakuvula chavimuna namukahananga.
13 Omu mukiko navakalinganga vaIsalele vosena vaze navakasemukila mulifuchi kana hakuhananga wana wakwocha hakakahya walivumba lyalupengopengo* kuli Yehova.
14 “‘Nge mwiza uze nazuzumana muli enu chipwe uze natwamenga nayenu havisemunwino vyavivulu, mwahana wana wakwocha hakakahya walivumba lyalupengopengo* kuli Yehova, kaha akalinge nganomu mweji kulinganga enu.+
15 Lizavu lyenu namwiza uze ali nakutwama nayenu namupwanga nalushimbi lumwe kaha. Lushimbi kana nalupwangako lika muvisemunwino vyenu vyosena. Mwiza akapwenga nganomu mwapwa enu kumeso aYehova.+
16 Kuli enu nakuli mwiza uze ali nakutwama nayenu kupwenga lushimbi lumwe namazu akuyula wowamwe.’”
17 Yehova ahanjikile cheka kuli Mose ngwenyi:
18 “Hanjika kuli vaIsalele ngwove, ‘Omu namukengila mulifuchi lize nangumitwala,
19 nakulya vyakulya vyamulifuchi kana,+ mukahane wana kuli Yehova.
20 Mukahane jimbolo jamujingulule jize jili nawina hakachi jakuunga waseke wajimbuto jenu jakulivanga.+ Mukajihane ngana muze mweji kuhananga wana wakufuma kuchizungwilo.
21 Kuunga waseke wakujimbuto jenu jakulivanga mukahanengako umwe kupwa wana kuli Yehova muvisemunwino vyenu vyosena.
22 “‘Jino kachi nge namulimbenja nakuhona kulama jishimbi josena eji nahanjika Yehova kuli Mose,
23 eji namihane Yehova kuhichila muli Mose, kufuma halikumbi lize Yehova amihanyinejo enu navisemunwino vyenu vyakulutwe,
24 kaha nge munachilingi hakulimbenja, kaha lizavu nawa kalyatachikijileko, lizavu lyosena likahane mwanangombe wakuji umwe kupwa wana wakulumba walivumba lyalupengopengo* kuli Yehova. Vakamuhanyine kumwe nawana wamanona, nawana wavinyo kweseka najindongi jakuvihanyinamo.+ Vakahane nawa mwanapembe kupwa wana wahashili.+
25 Kapilishitu akalinge chakufwika hashili yalizavu lyavaIsalele lyosena, kaha navakavakonekela.+ Mwomwo valimbenjanga, kaha nawa vananehe wana wavo wakwocha hakakahya kuli Yehova, nakuneha nawa wana wavo wahashili kumeso aYehova hakulimbenja chavo.
26 Lizavu lyavaIsalele lyosena, namwiza uze ali nakutwama navo navakavakonekela, mwomwo vosena valimbenjanga.
27 “‘Kachi nge mutu* umwe mwalimbenja hakulinga shili, kaha akahane pembe wachihwevo wamwaka umwe kupwa wana wahashili.+
28 Kaha kapilishitu akalinge chakufwika hashili yamutu* uze nalingi shili kumeso aYehova chakuzeneka kuchisakula, mangana akafwike shili kana, kaha navakamukonekela.+
29 Kuli vosena navasemuka muli vaIsalele nakuli mwiza uze ali nakutwama nayenu kupwenga lushimbi lumwe hashili mwalinga mutu chakuzeneka kuchisakula.+
30 “‘Oloze mutu* uze mwakalinga shili chakuchisakula ivene,+ numba apwa kaIsalele wakusemukila mulifuchi kana, numba mwiza, vakamujihe mwomwo nasaula Yehova.
31 Hakuwana nge nalumbilisa mazu aYehova, nakuhokola jishimbi jenyi, ngocho vakamujihe chikupu.+ Mutu* kana navakamuzangamisa hakuhenga chenyi.’”+
32 Omu vaIsalele vapwile mupambo, likumbi limwe vawanyine mutu umwe ali nakuchava jikunyi halikumbi lyaSambata.+
33 Vaze vamuwanyine vamunehele kuli Mose naAlone, nakulizavu lyosena.
34 Kaha vamukashile nakumulama,+ mwomwo jishimbi kajahanjikile hatoma mwakumulingilako.
35 Jino Yehova ambile kuli Mose ngwenyi: “Mutu kana vamujihe chikupu,+ lizavu lyosena limwase malolwa kuweluka wachilombo.”+
36 Ngocho lizavu lyosena lyalowele uze mutu kuweluka wachilombo, vamwashile malolwa, kaha afwile, nge omu Yehova alwezele Mose.
37 Yehova ambile cheka mazu awa kuli Mose ngwenyi:
38 “Lweza vaIsalele vatungenga jizombo kujisongo jauvwalo wavo muvisemunwino vyavo vyosena. Kaha kusongo yajizombo kana vatungilengako wanda ulauluka.+
39 ‘Mutunge jizombo kana mangana mujitalenga nakwanukanga jishimbi jaYehova josena nakujilama.+ Kanda namukakavangiza mwaya michima yenu nameso enuko, vize vili nakumizondola mulinge ujila wakushipilitu.+
40 Echi nachimikafwa mwanukenga jishimbi jami josena nakujilama, nakupwa muvajila kuli ami Kalunga kenu.+
41 Ami yami Yehova Kalunga kenu uze amilowele mulifuchi lyaEjipitu mangana ngulisolole kupwa nguKalunga kenu.+ Ami yami Yehova Kalunga kenu.’”+
Kwinyikila Chamwishi
^ Chipwe “lyakusuulwisa; lyakwivwisa kuwaha.”
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Hine yimwe yapwile jilita 3.67. Tala Chihande B14.
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Chipwe “mwono.”
^ Chipwe “yamwono.”
^ Chipwe “mwono.”
^ Chipwe “Mwono.”
