Kulava 16:1-50
16 Jino Kola+ mwanaIzahale,+ Izahale mwanaKohate,+ Kohate mwanaLevi+ atwamine punga naNdatane naAvilame, vana vaElyave,+ naOne mwanaPelete, vakumuyachi waLuvene.+
2 Kaha vakatukile namalunga vavaIsalele 250, vamyata jalizavu, malunga vakusakula vamuchikungulwilo, malunga vavalemu, mangana vakafumbukile Mose.
3 Kaha valikungulwile,+ vambile kuli Mose naAlone ngwavo: “Jinatuhu, katwamisakileko. Lizavu lyosena linapu lyajila,+ kaha Yehova ali muli vakiko.+ Nyi ikaze muli nakulizezwila helu lyachikungulwilo chaYehova?”
4 Omu Mose evwile mazu kana, afukamine chameso hamavu.
5 Ambile kuli Kola navosena vaze vapwile nakumukundwiza ngwenyi: “Hamene nachimene Yehova mwakatulweza ou apwa wenyi,+ ou apwa wajila, ou atela kupandama kuli ikiye.+ Kaha weshowo mwakasakula,+ ikiye mwapandamanga kuli ikiye.
6 Kalingenu ngana: Ove Kola navosena ava vali nakukukundwiza,+ kambatenu tumalonga twakukwachila kakahya,+
7 mukahakeho kakahya, navyuma vyalivumba lyamwaza, mukeze natwo kumeso aYehova hamene. Kaha mutu uze mwakasakula Yehova,+ ikiye apwa wajila. Enu vana vaLevi+ munasweze jino.”
8 Mose ambile kuli Kola ngwenyi: “Ivwililenu enu vana vaLevi.
9 Enu munamono ngwenu chinapu chuma chachindende omu namisakula Kalunga halizavu lyavaIsalele,+ nakumitavisa mupandame kuli ikiye mangana muzatenga milimo yaYehova yakutavanaku, nakwimana kumeso alizavu nakuvazachila tahi?+
10 Kutala chinapu chuma chachindende omu Kalunga namipandamisa enu navandumbwenu, vana vaLevi vosena kuli ikiye tahi? Kumana namusaka nawa upilishitu nyi?+
11 Ngocho jino, ove navosena ava vanalikungulula nakukukundwiza, muli nakufumbukila Yehova. Alone ikiye iya numba mumutatwokese?”+
12 Jino Mose asanyikile Ndatane naAvilame,+ vana vaElyave vezenga kuli ikiye, oloze vakiko vambile ngwavo: “Katweshi kwizako!
13 Kutala chinapu chuma chachindende omu watufumishile mulifuchi lyakumbwambumuka mavele nauchi mangana utujihishile muno mupambo tahi?+ Kaha nausaka nawa upwenga umuka-kutuyula nyi?*
14 Tala, kawatwingishile mulifuchi lyakumbwambumuka mavele nauchi+ chipwe kutuhana mavu namande amivinyo kupwa luheto lwetuko. Uno nautuva meso* amalunga vaze tahi? Katweshi kwizako!”
15 Ngocho Mose apihililile chikuma, ambile kuli Yehova ngwenyi: “Kanda nawitavila wana wavo wamanonako. Ami kangwavatambwile chimbulu numba umweko, chipwe kulinga minavo umwe mwamupiko.”+
16 Jino Mose ambile kuli Kola ngwenyi: “Ove navosena ava vali nakukukundwiza mukeze hamene nakwimana kumeso aYehova. Mukeze ove, navakiko naAlone.
17 Mutu himutu akambate kalilonga kenyi kakukwachila kakahya, akahakeho vyuma vyalivumba lyamwaza, kaha akanehe kalilonga kenyi kumeso aYehova. Tukapwe tumalonga 250, kahove naAlone nawa mukanehe mutu himutu kalilonga kenyi kakukwachila kakahya.”
18 Ngocho mutu himutu ambachile kalilonga kenyi kakukwachila kakahya, ahakileho kakahya navyuma vyalivumba lyamwaza, kaha vemanyine kuchikolo chambalaka yakuliwanyina hohamwe naMose naAlone.
19 Omu Kola alingile hanakungulwila lyehi vaka-kumukundwiza+ kuchikolo chambalaka yakuliwanyina, upahu waYehova wasolokele kulizavu lyavaIsalele lyosena.+
20 Yehova alwezele jino Mose naAlone ngwenyi:
21 “Handukenu kulizavu eli, mangana nguvanongese mukapyapya kakandende kaha.”+
22 Kaha vakiko vafukamine chameso hamavu, vambile ngwavo: “Ove Kalunga, ove Kalunga mwenyashipilitu yavatu vosena,*+ shili yamutu umwe kaha yikiko nayikulingisa upihilile nalizavu lyosena nyi?”+
23 Jino Yehova ambile kuli Mose ngwenyi:
24 “Hanjika kulizavu ngwove, ‘Ehukenu kujimbalaka javaKola, naNdatane, naAvilame.’”+
25 Jino Mose akatukile nakuya kuli Ndatane naAvilame, ayile hamwe navakulwane+ javaIsalele.
26 Alwezele lizavu ngwenyi: “Fumenu kujimbalaka javava malunga vakuhuka, kanda namukwata kuchuma chavo numba chimweko, kuchina namunonga hashili yavo.”
27 Hahaze vene vafumine kumitamba yosena yajimbalaka jaKola, naNdatane, naAvilame. Kaha Ndatane naAvilame valovokele, vemanyine kuvikolo vyajimbalaka javo namapwevo javo, navana vavo.
28 Jino Mose ambile ngwenyi: “Aha hakiko namutachikijila ngwenu Yehova ikiye nangutumu ngulinge vyuma vyosena evi, kavyafumine mumuchima wamiko.*
29 Kachi nge ava vatu navafwa nganomu veji kufwanga vatu vosena, chipwe nge navavazangamisa nganomu veji kuzangamisanga vatu vosena, kaha Yehova keshi ikiye nangutumuko.+
30 Oloze kachi nge Yehova mwalinga chuma chakukomwesa kuli vakiko, hakulingisa mavu asame nakuvamina hohamwe navyuma vyavo vyosena, nakuya vavatonyi muFuka,* kaha namutachikiza chikupu ngwenu ava malunga vanasaula Yehova.”
31 Omu akumishile kuhanjika mazu awa, mavu aze vemanyineho apulikile.+
32 Mavu asamine nakuvamina, hohamwe navaze vakujizuvo javo, naweshowo akundwijile Kola,+ navikumba vyavo vyosena.
33 Ngocho vatu kana navosena vaze vavakundwijile vayile vavatonyi muFuka.* Aze mavu aliwanyine cheka, kaha vanongele nakufuma mulizavu.+
34 Kaha vaIsalele vosena vaze vapwile kwakamwihi vachinyine hakwivwa miteto yavo. Vambile ngwavo: “Tuli nakwivwa woma ngwetu mavu nawatumina nayetu nawa.”
35 Kufumaho, kakahya kakufuma kuli Yehova+ kejile, kanongesele malunga 250 vaze vapwile nakulumba vyuma vyalivumba lyamwaza.+
36 Yehova ambile jino kuli Mose ngwenyi:
37 “Lweza Eleyaza mwanakapilishitu Alone afumise tuze tumalonga+ hakakahya, mwomwo tunapu twajila. Mulweze nawa asande kaze kakahya.
38 Kaha tumalonga twakukwachila kakahya twamalunga vaze vanatokesa myono yavo hakulinga shili, vatufule nakutusama mangana tupwenga twakufwika halijiko lyakulumbila,+ mwomwo vatunehanga kumeso aYehova, ngocho tunapu twajila. Kaha tumalonga kana tupwenga chinjikizo kuli vaIsalele.”+
39 Ngocho kapilishitu Eleyaza ambachile tumalonga twakukwachila kakahya twaunengu, tuze vanehele vaze vawemene, kaha vatufulile mangana tupwenga twakufwika halijiko lyakulumbila,
40 nge muze amulwezele Yehova kuhichila muli Mose. Twapwile twakwanukisa vaIsalele vejive ngwavo mutu uze kavetavisako,* uze kapwa wakutanga yaAlone kanda akapandama kulijiko lyakulumbila nakulumba vyuma vyalivumba lyamwaza kumeso aYehovako,+ kuchina mwakapwa nge Kola navaze vamukundwijile.+
41 Oloze halikumbi lyakavangijileho, lizavu lyavaIsalele lyosena lyaputukile kutatwokesa Mose naAlone+ ngwavo: “Enu muvavali munajihi vatu jaYehova.”
42 Omu lizavu lyalingile hilinakunguluka lyehi nakutatwokesa Mose naAlone, vatalile kumbalaka yakuliwanyina, kaha vamwene livwi linafwiki mbalaka yakuliwanyina, kaha upahu waYehova wasolokele.+
43 Mose naAlone vayile kumbalaka yakuliwanyina.+
44 Kaha Yehova ambile kuli Mose ngwenyi:
45 “Enu vatu, fumenu halizavu kaneli mangana nguvanongese hakapyapya kakandende kaha.”+ Hakwivwa ngocho, vafukamine chameso hamavu.+
46 Mose ambile kuli Alone ngwenyi: “Mbata kalilonga kakukwachila kakahya, uhakeho kakahya kahalijiko lyakulumbila,+ uhakeho nawa vyuma vyalivumba lyamwaza, uyenga washiwashi kulizavu nakulinga chakufwika hashili yavo,+ mwomwo Yehova napihilila chikuma. Musongo wachihita unaputuka lyehi!”
47 Hahaze vene, Alone ambachile kalilonga kakukwachila kakahya, nge muze amulwezele Mose, alahilile mulizavu, kaha awanyine musongo wachihita unaputuka lyehi kuvatu. Ngocho ahakile vyuma vyalivumba lyamwaza hakalilonga kakukwachila kakahya, kaha alingilile vatu chakufwika hashili yavo.
48 Emanyinenga lika mukachi kavatu vakufwa navava vavatonyi, kaha kutwala muze uze musongo wachihita wakumine.
49 Vaze vafwile kumusongo wachihita vapwile 14,700, kufumisako vaze vafwile mwomwo yaKola.
50 Omu Alone akindulukile kuli Mose kuchikolo chambalaka yakuliwanyina, asezele musongo wachihita hiunakumu lyehi.
Kwinyikila Chamwishi
^ Chipwe “nausaka utulemuwise nyi?”
^ Mazu akwamba ngwavo “kutuva meso,” pamo alumbununa nge Mose asakile vatu vejive kumukavangizanga kaha.
^ Hepe., “mwenyashipilitu yavava vakwechi mijimba vosena.”
^ Chipwe “kangweshi nakulilingilavyo ami iveneko.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Chipwe “muSheyole,” kulumbununa fuka yavatu vosena. Tala Mukana waMazu.
^ Hepe., “mutu weka.”
