Kulava 17:1-13
-
Mbwechi yaAlone yajitemo nayipwa chinjikizo (1-13)
17 Jino Yehova ambile kuli Mose ngwenyi:
2 “Hanjika navaIsalele, umbate mbwechi yimwe yimwe kuzuvo hizuvo yavakakuluka javo, kuli vamyata vakujizuvo javakakuluka javo,+ jipwenga jimbwechi 12. Kaha usoneke lijina lyamutu himutu hambwechi yenyi.
3 Usoneke nawa lijina lyaAlone hambwechi yaLevi, mwomwo twamina hitwamina ali nambwechi yimwe kuzuvo yavakakuluka jenyi.
4 Ujihake mumbalaka yakuliwanyina kulutwe lwachikasha chaUnjiho,+ kuze ngweji kuliwanyinanga nayenu.+
5 Mbwechi yamutu uze nangusakula+ nayichivikila, kaha kutatwoka chize vaIsalele vali nakutatwokesa ami+ nayenu+ nanguchikumisa.”
6 Ngocho Mose ahanjikile navaIsalele, kaha vamyata vakujizuvo javakakuluka javo vosena vamuhanyine mbwechi yimwe yimwe. Josena japwile 12. Kaha mbwechi yaAlone nayikiko yapwile hajimbwechi javo.
7 Kufumaho, Mose ahakile jize jimbwechi kumeso aYehova mumbalaka yaUnjiho.
8 Jino halikumbi lyakavangijileho, omu Mose engilile mumbalaka yaUnjiho, awanyine mbwechi yaAlone yakuzuvo yaLevi yinachivikila, yinalovola miketengo, nakufukula jitemo, kaha nawa yinemi mamonde akuhya lyehi.
9 Mose afumishile jize jimbwechi josena kumeso aYehova, ajinehele kuli vaIsalele. Vajitalile, kaha mutu himutu anoneleho mbwechi yenyi.
10 Yehova ambile kuli Mose ngwenyi: “Kindulwisa mbwechi+ yaAlone kulutwe lwachikasha chaUnjiho, uyilame kupwa chinjikizo+ kuli ava vana vakulikanga,+ mangana kutatwoka vali nakungutatwokesa chikume, mangana nawa vazeneke kufwa.”
11 Hahaze vene Mose alingile nge muze amulwezele Yehova. Alingile vene ngocho.
12 Jino vaIsalele vambile kuli Mose ngwavo: “Natufwa jino, natunonga, tuvosena natunonga.
13 Weshowo mwapandama kutavanaku yaYehova mwafwa.+ Uno natufwa tuvosena tahi?”+
