Kulava 18:1-32
18 Yehova ambile kuli Alone ngwenyi: “Ove navana vove, navaze vakuzuvo yavakakuluka jove namukapwa namulonga wakuhokola jishimbi jakuchihela chajila.+ Kaha nawa ove navana vove namukapwa namulonga wakuhokola jishimbi jamulimo wenu waupilishitu.+
2 Mbata nawa vandumbwove vakumuyachi waLevi, muyachi wavakakuluka jove vapandame kuli ove,+ mangana vakuzachilenga ove navana vove kumbalaka yaUnjiho.+
3 Vatesengamo milimo yavo yosena yakukuzachila ove, nayeyi yakumbalaka.+ Oloze kanda navakapandama kwakamwihi navinoma vyakuchihela chajila navyevi vyakulijiko lyakulumbilako, kuchina navakafwa nayove kumwe.+
4 Vakalipanjike nayove, vakazatenga milimo yavo yosena yakumbalaka yakuliwanyina, kaha mutu uze kavetavisako* kanda akapandama kuli enuko.+
5 Muzatenga milimo yenu yakuchihela chajila,+ nayeyi yakulijiko lyakulumbila,+ mangana utenu+ wami uzeneke kwiza cheka hali vaIsalele.
6 Ami ngunambate vandumbwenu vaLevi muli vaIsalele kupwa wana wenu.+ Vanapu vaYehova mangana vazatenga milimo yakumbalaka yakuliwanyina.+
7 Ove navana vove, yenu namuzatanga milimo yaupilishitu yakulijiko lyakulumbila, nakutala vyuma vili kusali yalihina lyakuvatasana.+ Muzatenga milimo kaneyi.+ Ngunamihane mulimo waupilishitu kupwa wana wenu, kaha mutu uze mwakapandamako, uze kavetavisako vakamujihe.”+
8 Yehova ambile cheka kuli Alone ngwenyi: “Ngunakuhane wata wakulama wana uze navahananga kuli ami.+ Kuvyuma vyajila vyosena vize navahananga vaIsalele ngunakuhaneko chazano chove navana vove chize namutambulanga lwola lwosena.+
9 Hawana wajila chikuma wakwocha hakakahya, uno ukiko naukapwanga wove: wana wosena uze navahanyinanga kumwe nawana wamanona,+ nawana wahashili,+ nawana wahamulonga.+ Unapu wajila chikuma, wayove navana vove.
10 Ukavilile muchihela chajila chikuma.+ Malunga vosena vanahase kulyako. Navikapwa vyajila kuli ove.+
11 Kaha vyuma vino nawa vinapu vyove: wana uze navahananga,+ nawana wakuhungisa+ wosena wavaIsalele. Ngunavihane kuli ove nakuli vana vove vamalunga, navava vamapwevo kupwa chazano chenu chize namutambulanga lwola lwosena.+ Vatu vosena vakuzuvo yove vaze vanatomo vanahase kulyako.+
12 “Maji amwaza osena, navinyo vyamwaza vyosena, namanona, vize vyakulivanga+ navahana kuli Yehova, ngunavihane kuli ove.+
13 Mihako nayilivanga kuhya mumande avo yosena yize navanehanga kuli Yehova nayipwanga yove.+ Vatu vosena vakuzuvo yove vaze vanatomo vanahase kulyako.
14 “Vyuma vyosena vize vanahane kuli Kalunga muIsalele vipwenga vyove.+
15 “Vatwatwa vakusemuka kuvyuma vyakuyoya vyosena,*+ vatu chipwe tunyama vaze navahananga kuli Yehova vapwenga vove. Oloze ukasokole vatwatwa vavatu,+ navatwatwa vatunyama vavapi vosena nawa.+
16 Ukasokole twatwa hitwatwa wakakweji umwe nakuya kwilu, ukamusokole nandando yakusokola yakuheta mujishekele* japalata+ jitanu nge kutesa nakulema chashekele yamuchihela chajila.* Shekele yimwe yinapu jingela* 20.
17 Oloze twatwa wangombe, chipwe twatwa wamwanamukoko wachizamba, chipwe twatwa wapembe kanda ukamusokolako.+ Vanapu vajila. Ukasapwila manyinga avo halijiko lyakulumbila,+ kaha maji avo ukawalumba kupwa wana wakwocha hakakahya walivumba lyalupengopengo* kuli Yehova.+
18 Kaha nyama yavo yipwenga yove. Yipwenga yove ngana omu yapwa pambo yawana wakuhungisa nalihinji lyachilyo.+
19 Wana wajila wosena uze navahananga vaIsalele kuli Yehova,+ ngunakuhanewo ove navana vove vamalunga navava vamapwevo kupwa chazano chenu chize namutambulanga lwola lwosena.+ Chinapu chivwasano chamungwa* mukachi kove naYehova navana vove.”
20 Yehova ambile cheka kuli Alone ngwenyi: “Kaweshi kukapwa nauswana mulifuchi lyavaIsaleleko, chipwe kukapwa namusuka wamavu muli vakikoko.+ Ami yami chazano chove, yami uswana wove muli vaIsalele.+
21 “Tala, vana vaLevi ngunavahane vyuma vyakusokesa mumakumi+ vyamuIsalele vyosena kupwa uswana wavo kumilimo vali nakuzata, milimo yakumbalaka yakuliwanyina.
22 VaIsalele kanda vapandama cheka kumbalaka yakuliwanyinako, kuchina navalinga shili nakufwa.
23 VaLevi vakiko navazatanga mulimo wakumbalaka yakuliwanyina, kaha vakiko navapwanga namulonga wakuhokola jishimbi jakumbalaka.+ Kanda navakapwa nauswana muli vaIsaleleko. Elu nalupwanga lushimbi lwamyaka namyaka muvisemunwino vyenu vyosena.+
24 Mwomwo vaLevi ngunavahane chimbwa chimwe chakusokesa muvimbwa 10 chakuwana wavaIsalele uze navahananga kuli Yehova kupwa uswana wavo. Shikaho ngunambila kuli vakiko ngwami, ‘Kanda navakapwa nauswana muli vaIsaleleko.’”+
25 Jino Yehova ambile kuli Mose ngwenyi:
26 “Lweza vaLevi ngwove, ‘Namutambulanga chimbwa chimwe chakusokesa muvimbwa 10 chakuvyuma vyavaIsalele chize ngunamihane kupwa uswana wenu,+ kaha kuchimbwa kana mukahanengako chimbwa chimwe chakusokesa muvimbwa 10 kupwa wana kuli Yehova.+
27 Wana kana navaumonanga kupwa wana wakufuma kuli enu, kwijiva nge manona akufuma kuchizungwilo,+ chipwe maji navinyo vyavivulu vyakufuma muchikamwino.
28 Ngocho nayenu nawa namukahananga wana kuli Yehova kufuma kuvimbwa vyosena vyakusokesa muvimbwa 10 vize namukatambulanga kuli vaIsalele. Mukahane wana kanou waYehova kuli kapilishitu Alone.
29 Kuwana wosena wamwaza namukatambulanga mukahanengako umwe kuli Yehova kupwa wana wajila.’+
30 “Hanjika cheka kuli vakiko ngwove, ‘Kachi nge namuhananga wana wamwaza, kaha navaumonanga kupwa wayenu vaLevi, kwijiva nge mbuto jakufuma kuchizungwilo chenu, chipwe maji navinyo vyakufuma muchikamwino chenu.
31 Enu navaze vakujizuvo jenu munahase kuulila kukala chihela, mwomwo unapu fweto yenu kumilimo muli nakuzata mumbalaka yakuliwanyina.+
32 Nge namuhananga wana wamwaza, kaha kamweshi kulinga shiliko. Kanda namukalumbilisa vyuma vyajila vyavaIsaleleko, kuchina namukafwa.’”+
Kwinyikila Chamwishi
^ Hepe., “mutu weka,” kulumbununa mutu uze kapwa wamutanga yaAloneko.
^ Hepe., “kuvyuma vikwechi mijimba vyosena.”
^ Shekele yimwe yapwile jingalamu 11.4. Tala Chihande B14.
^ Chipwe “nge kutesa nashekele yajila.”
^ Ngela yimwe yapwile jingalamu 0.57. Tala Chihande B14.
^ Chipwe “lyakusuulwisa; lyakwivwisa kuwaha.”
^ Kulumbununa, chivwasano chamyaka namyaka chize kachalumukako.
