Kulava 19:1-22
-
Ngombe uchila nameya akutomesa (1-22)
19 Yehova ahanjikile cheka kuli Mose naAlone ngwenyi:
2 “Elu lukiko lushimbi nahane Yehova ngwenyi: ‘Lwezenu vaIsalele vamihane ngombe wachihwevo uchila walambwe, wakuzeneka katenga,+ uze kanda vakasengaho lyehi mutoka.
3 Mumuhane kuli kapilishitu Eleyaza, kaha ikiye akamutwale kuweluka wachilombo, vakamujihile hameso enyi.
4 Kufumaho, kapilishitu Eleyaza akambate manyinga amwe namunwe wenyi, akawasapwile kulutwe lwambalaka yakuliwanyina mapapa 7.+
5 Kaha uze ngombe vakamulumbile hameso enyi. Vakalumbe lilambu lyenyi, nanyama yenyi, namanyinga enyi, natuji twenyi.+
6 Kapilishitu akambate mushitale, nahusope,+ nawanda uchila, akavimbile mukakahya muze vali nakulumbila uze ngombe.
7 Kufumaho, kapilishitu akakose uvwalo wenyi nakusana mumujimba wenyi nameya, numba akeze muchilombo. Oloze kapilishitu mwakapihya palanga nakuchingoloshi.
8 “‘Uze mwakalumba ngombe kana naikiye akakose uvwalo wenyi, nakusana mumujimba wenyi nameya. Kaha mwakapihya palanga nakuchingoloshi.
9 “‘Jino mutu uze natomo akakungulule uto wangombe+ kana nakuuhaka hachihela chakuzeneka majilo kuweluka wachilombo. Vakaulamine lizavu lyavaIsalele mangana vakauhakenga mumeya akutomesa.+ Unapu wana wahashili.
10 Mutu uze mwakakungulula uto wangombe kana akakose uvwalo wenyi, kaha mwakapihya palanga nakuchingoloshi.
“‘Elu nalupwanga lushimbi lwamyaka namyaka kuli vaIsalele, nakuli vamwiza vaze vali nakutwama navo.+
11 Weshowo mwakakwata mufu* mwakapihya hamakumbi 7.+
12 Mutu kana akalitomese nameya akutomesa halikumbi lyamuchitatu, kaha halikumbi lyakusokesa 7 mwakatoma. Oloze kachi nge mwakazeneka kulitomesa ivene halikumbi lyamuchitatu, kaha halikumbi lyakusokesa 7, keshi kukatomako.
13 Weshowo mwakwata mufu,* nakuhona kulitomesa ivene, najilulula tavanaku yaYehova,+ kaha mutu* kana vakamujihe muIsalele.+ Hakuwana nge kavamusapwilile meya akutomesako,+ ngocho mwakapihya lika. Kupihya chenyi nachipwanga lika hali ikiye.
14 “‘Elu lukiko lushimbi namukavangizanga nge mutu nafwila mumbalaka: Weshowo mwengila muze mumbalaka, chipwe weshowo ali muze mumbalaka, mwapihya hamakumbi 7.
15 Cheshocho chuma chakuzeneka kufwika chifwiko nachipihya.+
16 Weshowo mwakwata mutu kuweluka uze vanajihi napoko yamukwale, chipwe kukwata mujimba wamufu, chipwe chifuwa chamufu, chipwe hachimbumbe, mwapihya hamakumbi 7.+
17 Vakamumbachile uto umwe wakuwana wahashili uze valumbanga, vauhake mundeho nakuhingunwinamo meya akulwiji.
18 Kaha mutu uze natomo,+ akambate husope,+ akayitupike mumeya nakuwasapwila hambalaka, nahavyuma vyakukwachila vyosena, nahavatu* vosena vaze vali mumbalaka, nahali mutu uze nakwate chifuwa chamufu, chipwe mutu uze vanajihi, chipwe mujimba wamufu, chipwe hachimbumbe.
19 Halikumbi lyamuchitatu, mutu uze natomo akasapwile aze meya hamutu uze napihi, kaha halikumbi lyakusokesa 7,+ akamutomese kushili yenyi. Kufumaho, mutu kana akakose uvwalo wenyi nakusana meya, kaha mwatoma nachingoloshi.
20 “‘Mutu* uze napihi nakuhona kulitomesa ivene, vakamujihemo mulizavu,+ mwomwo najilulula chihela chaYehova chajila. Hakuwana nge kavamusapwilile meya akutomesako, ngocho napihi.
21 “‘Elu lukiko nalupwanga lushimbi lwamyaka namyaka kuli vakiko: Uze mwakasapwila meya akutomesa+ akakose uvwalo wenyi, kaha uze mwakakwata meya akutomesa mwakapihya palanga nakuchingoloshi.
22 Cheshocho mwakakwata mutu uze napihi nachikiko nachikapihya, kaha nawa mutu* uze mwakachikwata mwakapihya palanga nakuchingoloshi.’”+
Kwinyikila Chamwishi
^ Chipwe “mwono wakufwa.” Tala Mukana waMazu.
^ Chipwe “mwono wakufwa.” Tala Mukana waMazu.
^ Chipwe “mwono.”
^ Chipwe “nahamyono.”
^ Chipwe “Mwono.”
^ Chipwe “mwono.”
