Kulava 20:1-29
20 Mukakweji wakulivanga, lizavu lyavaIsalele lyosena lyahetele mupambo yaJine, kaha vatu kana vatwamine kuKateshe.+ Kuze kukiko afwililile Milyame,+ kaha vamufunjile.
2 Jino kakwapwile meya akunwa lizavu kanako,+ kaha valikungulwile nakunyemukila Mose naAlone.
3 Vakokojwesele Mose+ ngwavo: “Kachi nayetu twafwile omu vafwile vandumbwetu kumeso aYehova!
4 Ika unanehela chikungulwilo chaYehova muno mupambo mangana tufwile muno navimuna jetu?+
5 Ika watufumishilile muEjipitu nakutuneha kuchihela chino chachipi ngana?+ Kuno kakweshi vimbuto, chipwe jikuyu, chipwe mivinyo, chipwe jilomako, kaha nawa kakweshi meya akunwako.”+
6 Kaha Mose naAlone vafumine kulizavu kana, vayile kuchikolo chambalaka yakuliwanyina, vafukamine chameso hamavu. Kaha upahu waYehova wasolokele kuli vakiko.+
7 Jino Yehova ambile kuli Mose ngwenyi:
8 “Mbata mbwechi, usanyike lizavu likunguluke hohamwe nayove nandumbwove Alone. Hanjika kulilolwa kumeso avo mangana lilovole meya alyo. Naulovola meya kulilolwa kana nakuwahana lizavu linwenga navimuna javo.”+
9 Ngocho Mose ambachile mbwechi kumeso aYehova,+ nge muze amulwezele.
10 Mose naAlone vasanyikile lizavu likungulukile kulilolwa lize. Kaha ambile kuli vakiko ngwenyi: “Ivwenu jino, enu vaka-kulikanga! Uno munasake ngwenu tumilowele meya kulilolwa lino nyi?”+
11 Ngocho Mose azundwile livoko lyenyi, avetele lize lilolwa nambwechi yenyi mapapa kavali. Kuze kulilolwa kwaputukile kulovoka meya amavulu, kaha lizavu lyaputukile kunwa meya navimuna javo.+
12 Kutwala muze Yehova ambile kuli Mose naAlone ngwenyi: “Hakuwana nge kamwangufweleleleko, kaha nawa kamwangumwene kupwa nguwajila kumeso avaIsaleleko, ngocho kamweshi kukengisa lizavu kaneli mulifuchi lize nanguvahanako.”+
13 Awa akiko meya akuMeliva,*+ kuze vaIsalele vakokojweselele Yehova, ngocho alijilikile muli vakiko.
14 Jino Mose atumine valuwa kufuma kuKateshe vakalweze mwangana waEtome+ ngwavo: “Ndumbwove Isalele+ nambe ngwenyi, ‘Ove unatachikiza kanawa ukalu wosena tunahichimo.
15 Vakakuluka jetu vayile kuEjipitu,+ ngocho twatwamine muEjipitu myaka* yayivulu.+ Kaha vaEjipitu vatuyanjishilenga navakakuluka jetu.+
16 Kutwala muze twatetele kuli Yehova,+ kaha atwivwile, ngocho atumine kangelo+ nakutulovola muEjipitu. Tuli jino munganda yaKateshe yize yili kungiza yangalila yove.
17 Twitavise tuhite mulifuchi lyove. Katweshi kuhita mumande enu amivinyo chipwe mumande ekako. Kaha katweshi kunwa meya amumashima enuko. Natwijiva kuhita kaha muJila yaMwangana chakuzeneka kuchekunukila kuchilyo chipwe kuchimoswe palanga nomu natulovoka mungalila yove.’”+
18 Oloze mwangana waEtome ambile kuli ikiye ngwenyi: “Kanda namuhita mungalila yetuko, mokomoko nangumikikilila napoko yamukwale.”
19 Kaha vaIsalele vambile kuli ikiye ngwavo: “Natuhita kaha mujila nakuya. Kachi nge etu navimuna jetu natunwa meya ove, kaha natuwafwetela.+ Kakweshi chuma cheka tuli nakusakako shina kuhita kaha mungalila yove.”+
20 Oloze ikiye ambile ngwenyi: “Kanda namuhita mungalila yamiko.”+ Jino mwangana waEtome ejile navatu jenyi vavavulu namaswalale* vangolo nakuvakikilila.
21 Ngocho mwangana waEtome akanyishile vaIsalele kuhita mungalila yenyi. Kaha vaIsalele vanyingulukile nakumuseza.+
22 Lizavu lyavaIsalele lyosena lyakatukile kuKateshe, kaha lyahetele kuPili yaHole.+
23 Kaha Yehova ambile kuli Mose naAlone haPili yaHole, kungiza yalifuchi lyaEtome ngwenyi:
24 “Alone mwatoka ngana mwavatu jenyi.*+ Keshi kwingila mulifuchi lize nanguhana vaIsaleleko, mwomwo muvosena muvavali mwalikangile kumazu ami ngwamilwezele kupandama kumeya akuMeliva.+
25 Mbata Alone namwanenyi Eleyaza, uvatwale helu lyaPili yaHole.
26 Ukazule Alone uvwalo wenyi,+ ukauvwike mwanenyi Eleyaza.+ Alone mwakafwila vene kuze.”
27 Ngocho Mose alingile nge muze amulwezele Yehova. Vakandukile haPili yaHole oku lizavu lyosena lili nakumona.
28 Mose azulile Alone uvwalo, auvwikile mwanenyi Eleyaza. Kaha Alone afwililile haze helu lyapili.+ Mose naEleyaza vashikumukile kufuma hapili.
29 Omu lizavu lyakuzuvo yaIsalele lyosena lyamwene ngwavo Alone nafu, vamulilile makumbi 30.+
Kwinyikila Chamwishi
^ Ulumbunwiso, “Kulikokojwesa.”
^ Hepe., “makumbi.”
^ Hepe., “nalivoko.”
^ Eyi hindangwishi yize yalumbununa kufwa.
