Kulava 22:1-41
22 VaIsalele vakatukile, vakatungile chilombo chavo mulikundu lyaMowave musali yino yaYotau kwakulitalasana naYeliko.+
2 Jino Mbalaka+ mwanaJipole amwene vyuma vyosena vize valingile vaIsalele kuli vaAmole.
3 Kaha vaMowave vevwile woma wavava vatu, mwomwo vavulile chikuma. Valizuzukilile nawoma mwomwo yavaIsalele.+
4 Ngocho vaMowave vambile kuli vakulwane javaMichane+ ngwavo: “Eli lizavu nalitulila vyuma vyetu vyosena nge muze ngombe eji kulyanga mwila wamuchipapa.”
Halwola kanelu, Mbalaka mwanaJipole ikiye apwile mwangana waMowave.
5 Jino Mbalaka atumine tunganda vakasanyike Mbalame mwanaMbeyole, kuPetole+ kwakamwihi naKalwiji,* mulifuchi lyenyi. Amulwezele ngwenyi: “Tala! Kuno kuneza vatu vakufuma kuEjipitu. Vanazale mungalila yosena,+ kaha vanatwame kwakulitalasana nayami.
6 Shikaho twaya, ungwangwile vatu kana,+ mwomwo vananguhambakana ngolo. Pamo nanguvafungulula mangana nguvahange mulifuchi lino. Mwomwo ngunatachikiza ngwami ou mukisula ove napu wakukisula, kahou mwangula napu wakwangula.”
7 Ngocho vakulwane javaMowave navakulwane javaMichane vambachile fweto yakutahisa, vayile kuli Mbalame+ nakumwambulila mazu aMbalaka.
8 Ikiye avambile ngwenyi: “Savalenu kuno ufuku walelo, kaha nangumilweza mweshomwo mwahanjika Yehova kuli ami.” Ngocho vilolo javaMowave vasavalile kuli Mbalame.
9 Kalunga ejile kuli Mbalame, amwambile ngwenyi:+ “Ava malunga uli navo vakiko veya?”
10 Kaha Mbalame ambile kuli Kalunga wamuchano ngwenyi: “Mbalaka mwanaJipole mwangana wavaMowave navatumu kuli ami ngwenyi,
11 ‘Tala! Kuno kuneza vatu vakufuma kuEjipitu, kaha vanazale mungalila yosena. Shikaho twaya, ungwangwile vatu kana.+ Pamo nanguhasa kulwa navo nakuvahanga mulifuchi lino.’”
12 Oloze Kalunga ambile kuli Mbalame ngwenyi: “Kawatela kuya navoko. Kawatela kwangula vatu kanako, mwomwo vanapu vakukisula.”+
13 Omu Mbalame ahindukile nachimene, ambile kuli vaze vilolo jaMbalaka ngwenyi: “Kindulukenu kulifuchi lyenu, mwomwo Yehova nangukanyisa kuya nenu.”
14 Ngocho vaze vilolo vakuMowave vakatukile, vakindulukile kuli Mbalaka, vamulwezele ngwavo: “Mbalame nakane kwiza nayetu.”
15 Oloze Mbalaka atumine cheka vilolo vakwavo. Vapwile vavavulu, vavalemu chikuma kuhambakana vaze vakulivanga.
16 Vahetele kuli Mbalame, vamwambulilile ngwavo: “Mbalaka mwanaJipole nambe ngwenyi, ‘Kanda wechelela chuma chimwe chikuhonese kwiza kuli amiko.
17 Mwomwo nangukuvumbika mwamunene, kaha nangulinga mweshomwo naungulweza. Ngocho twaya ungwangwile vatu kana.’”
18 Mbalame akumbulwile vaze vangamba jaMbalaka ngwenyi: “Numba nge Mbalaka mwanguhana zuvo yenyi yato napalata naulu, kangweshi kulinga chuma chize nachilimbalaka namazu nangulweze Yehova Kalunga kamiko, numba chipwa chachindende numba chachinene.+
19 Olozenyi nayenu nawa savalenu ufuku uno, mangana ngwivwenga vyuma vikwavo mwangulweza Yehova.”+
20 Jino Kalunga ejile kuli Mbalame naufuku, amwambile ngwenyi: “Kachi nge ava malunga vaneza nakukusanyika, kaha yako navo. Oloze ukahanjike kaha mazu aze nangukakulweza.”+
21 Ngocho Mbalame ahindukile nachimene, alemene chimbulu chenyi,* ayile navaze vilolo vakuMowave.+
22 Oloze Kalunga apihililile chikuma mwomwo Mbalame ayile. Kaha kangelo kaYehova emanyine mujila mangana amuhonese kuhita. Jino Mbalame apwile nakutambuka hachimbulu chenyi, apwile navangamba jenyi vavali nawa.
23 Kahomu chimbulu amwene kangelo kaYehova nemana mujila napoko yamukwale mulivoko lyenyi, uze chimbulu ateunukile mujila ayenga muchipapa. Oloze Mbalame aputukile kuveta uze chimbulu mangana akinduluke mujila.
24 Kaha kangelo kaYehova emanyinyine haze yalipalakanyina jila, mukachi kamande amivinyo avali, oku chipato chamalolwa oku chipato chamalolwa.
25 Omu chimbulu amwene kangelo kaYehova, alishinyinyikile kuchipato nakushindakanyina lihinji lyaMbalame kuchipato. Kaha Mbalame aputukile kuveta cheka uze chimbulu.
26 Kangelo kaYehova aswenyele cheka kulutwe, emanyine haze yalipalakanyina jila, kaha kakwapwile kwakuteunukila kuchilyo chipwe kuchimosweko.
27 Omu chimbulu amwene cheka kangelo kaYehova, autamine oku Mbalame hanga namutwamina hanyima. Mbalame apihililile, kaha avetele lika chimbulu nambwechi yenyi.
28 Ngocho Yehova alingishile uze chimbulu ahanjike,*+ kaha ambile kuli Mbalame ngwenyi: “Ngunakulingi ika numba unguvete ngana mapapa katatu?”+
29 Mbalame ambile kuli chimbulu ngwenyi: “Mwomwo unanguhulamisa. Kachi ngwapwanga napoko yamukwale mulivoko lyami, kachi ngunakujihi lyehi.”
30 Uze chimbulu ambile kuli Mbalame ngwenyi: “Uno kangweshi nguchimbulu chove uze unatambukilanga mukuyoya chove nakulikumbi lyaleloko tahi? Uno ngwakulingaho lyehi ngana nyi?” Ikiye amukumbulwile ngwenyi: “Nduma.”
31 Jino Yehova atonesele meso aMbalame,+ kaha amwene kangelo kaYehova nemana mujila napoko yamukwale mulivoko lyenyi. Hahaze vene afukamine nakulifukula.
32 Kangelo kaYehova ambile kuli Mbalame ngwenyi: “Ikaze unavetela chimbulu chove ngana mapapa katatu? Tala! Ami yami ngwezanga nakukujikinyina, mwomwo jila yove yinalimbalaka nomu mwaya muchima wami.+
33 Chimbulu angumonanga, kaha anguteunukanga mapapa katatu.+ Kachi nge kanguteunukangako, kachi oholili ngunakujihi lyehi nakumuseza ikiye wamutonyi.”
34 Ngocho Mbalame ambile kuli kangelo kaYehova ngwenyi: “Ngunalingi shili, mwomwo kangwatachikizanga ngwami yove wemananga mujila mangana unguhumanganeko. Ngocho jino, kachi nge unamono ngwove kachawahileko, kaha nangukinduluka.”
35 Kangelo kaYehova ambile kuli Mbalame ngwenyi: “Yakonga namalunga ava, oloze ukahanjike kaha mazu aze nangukakulweza.” Ngocho Mbalame atwalilileho ungeji wenyi navilolo jaMbalaka.
36 Omu Mbalaka evwile ngwavo Mbalame ali nakwiza, ayile nakumusesa kunganda yakuMowave, yize yatwamina kuchikulo chaAlanone, kungiza yangalila kana.
37 Mbalaka ambile kuli Mbalame ngwenyi: “Uno kangwatumine vatu kwiza nakukusakako nyi? Wakanyinyine ika kwiza kuli ami? Uno washinganyekele ngwove kangweshi kuhasa kukuvumbika mwamuneneko nyi?”+
38 Mbalame akumbulwile Mbalaka ngwenyi: “Nguneza jino kuli ove. Oloze nanguhasa kulihanjikila ami ivene vyuma tahi? Nanguhanjika kaha mazu aze mwangulweza Kalunga.”+
39 Ngocho Mbalame ayile naMbalaka kuKilyate-huzote.
40 Jino Mbalaka alumbile vangombe namikoko kupwa wana wavimuna vakuvatula, kaha atumine nyama yimwe kuli Mbalame navilolo vaze apwile navo.
41 Lichako nachimene, Mbalaka akandwishile Mbalame kuMbamote-mbale mangana akahase kumona kanawa vatu vosena.+
Kwinyikila Chamwishi
^ Pamo Yufwalate.
^ Hepe., “chimbulu chenyi wachihwevo.”
^ Hepe., “Yehova asokolwele mukanwa kayauze chimbulu wachihwevo.”
