Kulava 25:1-18
25 Omu vaIsalele vapwile nakutwama kuShichime,+ vamwe vaputukile kulinga ujila navana vavaMowave vamapwevo.+
2 Ava mapwevo vasanyikile vaIsalele vamwe vayenga navo nakuhana tulunga twavo+ vimuna vakuvatula, kaha vaputukile kulya nakulifukula kutulunga twavo.+
3 Ngocho vaIsalele navakiko vaputukile kulemesa* Mbale wakuPeyole,+ kaha Yehova akwachilile vaIsalele matoto.
4 Yehova ambile kuli Mose ngwenyi: “Kwata vosena vaze vali nakutwaminyina vatu kana ava, uvasukike musana weye* kumeso aYehova, mangana utenu waYehova uzeneke kwiza hali vaIsalele.”
5 Kaha Mose ambile kuli vaka-kuyula javaIsalele ngwenyi:+ “Mutu himutu ajihe vatu jenyi vaze vali nakulemesa* Mbale wakuPeyole.”+
6 Jino halwola vene luze, kwejile kaIsalele umwe uze anehele pwevo wakaMichane+ kuli vandumbwenyi, kumeso aMose nalizavu lyosena lyavaIsalele, shimbu vapwile nakulila kuchikolo chambalaka yakuliwanyina.
7 Jino omu Fwinehase+ mwanaEleyaza, Eleyaza mwanakapilishitu Alone amwene chuma kana, hahaze vene akatukile mulizavu, ambachile likunga mulivoko lyenyi.
8 Amukavile uze lunga wakaIsalele mumbalaka, avatuvile vosena vavali. Atuvile uze lunga wakaIsalele, nakutuva nawa uze pwevo kuusonyi wenyi. Ngocho musongo wachihita uze wejile hali vaIsalele wakumine.+
9 Kaha vaze vafwile kumusongo kana vapwile 24,000.+
10 Jino Yehova ambile kuli Mose ngwenyi:
11 “Fwinehase+ mwanaEleyaza, Eleyaza mwanakapilishitu Alone nahonesa utenu wami kwiza hali vaIsalele, mwomwo kechelelele vatu valinge upi kumeso amiko.+ Shikaho ngunazenekela kunongesa vaIsalele mwomwo ngwasaka vatu valihane kuli ami namuchima wosena.+
12 Ngocho mulweze ngwove, ‘Nangumushika lushiko lwami lwakuunda.
13 Kaha nalupwanga lushiko lwaupilishitu myaka namyaka kuli ikiye nakuli vaka-tanga yenyi vaze navakeza hanyima,+ mwomwo kechelelele vatu valinge upi kumeso aKalunga kenyiko,+ kaha nalingi chakufwika hashili yavaIsalele.’”
14 Lijina lyalunga wakaIsalele uze vajihile hamwe nauze pwevo wakaMichane apwile ikiye Jimili mwanaSalu, mwata wakuzuvo yavakakuluka javaShimeyone.
15 Kaha lijina lyapwevo wakaMichane uze vajihile apwile ikiye Kozovi mwanaZule.+ Zule apwile twamina wavisaka vyakuzuvo yavakakuluka jenyi muMichane.+
16 Kufumaho, Yehova ambile kuli Mose ngwenyi:
17 “Vayanjisenu vaMichane, vajihenu,+
18 mwomwo vanamiyanjisa navilinga vyavo vyakulunguluka valingile kuPeyole,+ navyevi alingile ndumbwavo Kozovi mwanamwata wakuMichane, uze vajihile+ halikumbi lyamusongo wachihita uze wejile mwomwo yavyuma vyalingiwile kuPeyole.”+
Kwinyikila Chamwishi
^ Chipwe “kulipanjika.”
^ Hepe., “uvasukike kulutwe lwalikumbi.”
^ Chipwe “nakulipanjika.”
