Kulava 27:1-23
27 Jino vana vaZelofwehate+ vamapwevo vejile. Zelofwehate apwile mwanaHefwele, Hefwele mwanaNgileyate, Ngileyate mwanaMakile, Makile mwanaManase. Vosena ava vafumine kujitanga jaManase mwanaYosefwe. Majina avana vaZelofwehate vamapwevo vapwile Mala, naNowa, naHongola, naMilika, naChiliza.
2 Vemanyine kumeso aMose nakapilishitu Eleyaza, navamyata,+ nalizavu lyosena kuchikolo chambalaka yakuliwanyina. Kaha vambile ngwavo:
3 “Setu afwililile mupambo, oloze kapwile halizavu lyavaze vakundwijile Kola+ nakufumbukila Yehovako. Ikiye afwile hashili yenyi, kaha kapwile navana vamalungako.
4 Uno lijina lyasetu lifwenga kutanga yenyi mwomwo yakuzeneka mwana walunga nyi? Nayetu tuhanenuko luheto muli vandumbwasetu.”
5 Ngocho Mose atwalile chihande kana kuli Yehova.+
6 Yehova ambile jino kuli Mose ngwenyi:
7 “Vana vaZelofwehate vanahanjika mwakwoloka. Uvahane luheto kana kupwa uswana muli vandumbwasevo, kaha uswana wasevo upwenga wavo.+
8 Lweza nawa vaIsalele ngwove, ‘Kachi nge lunga mwafwa chakuzeneka mwana walunga, kaha uswana wenyi mukauhane mwanenyi wapwevo.
9 Kachi nge keshi namwana wapwevoko, kaha uswana wenyi mukauhane kuli vandumbwenyi.
10 Kachi nge keshi navandumbwenyiko, kaha mukahane uswana wenyi kuli vandumbwaise.
11 Kachi nge ise keshi navandumbwenyiko, kaha mukahane uswana wenyi kuli kausoko kenyi wahalinyinga. Ou ikiye mwakatambula luheto kana. Elu nalupwanga lushimbi kuli vaIsalele kweseka namazu akuyula, nge muze Yehova nalweze Mose.’”
12 Yehova ambile cheka kuli Mose ngwenyi: “Kanduka hapili yaAvalime,+ utale lifuchi lize nanguhana vaIsalele.+
13 Omu naulinga hiunalimono lyehi, nayove nautoka ngana mwavatu jove,*+ nge omu atoka nawa ndumbwove Alone.+
14 Mwomwo omu lyangukokojwesele lizavu mupambo yaJine, enu mwazombokele mazu ami, kamwangumwene kupwa nguwajila muli vaIsalele hameya+ aze akuMeliva+ kuKateshe+ mupambo yaJineko.”+
15 Jino Mose ambile kuli Yehova ngwenyi:
16 “Yehova, Kalunga muka-kuhana shipilitu kuvatu vosena,* atongole twamina walizavu eli,
17 uze mwavatwaminyinanga muvyuma vyosena navalinganga, mangana lizavu lyaYehova lihone kupwa nge mikoko vakuzeneka kafunga.”
18 Ngocho Yehova ambile kuli Mose ngwenyi: “Sakula Yoshuwa mwanaNune, lunga uze ukwechi shipilitu, munangike livoko lyove.+
19 Mwimike kumeso akapilishitu Eleyaza nalizavu lyosena, mutongole kupwa twamina kumeso avo.+
20 Umuhane ngolo* jove jimwe,+ mangana lizavu lyavaIsalele lyosena limwivwililenga.+
21 Ikiye mwemananga kumeso akapilishitu Eleyaza, uze mwakamuhulishilangako kuli Yehova kuzachisa Ulime,+ mangana akatachikize mwakuyulila. Mweshomwo mwakavalweza mukiko navakakavangiza, naikiye navaIsalele vosena, lizavu lyosena.”
22 Ngocho Mose alingile nge muze amulwezele Yehova. Ambachile Yoshuwa nakumwimika kumeso akapilishitu Eleyaza nakulizavu lyosena.
23 Kaha amunangikile mavoko enyi nakumutongola kupwa twamina,+ nge muze ahanjikile Yehova kuhichila muli Mose.+
Kwinyikila Chamwishi
^ Eyi hindangwishi yize yalumbununa kufwa.
^ Hepe., “Kalunga kajishipilitu javava vakwechi mijimba vosena.”
^ Chipwe “ulemu.”
