Kulava 28:1-31
28 Yehova ahanjikile cheka kuli Mose ngwenyi:
2 “Lweza vaIsalele ngwove, ‘Mukanuka kunguhananga wana wami, kulya chami. Wana wami wakwocha hakakahya wakuneha livumba lyalupengopengo* kuli ami, mukauhana halwola lwawo.’+
3 “Hanjika nawa kuli vakiko ngwove: ‘Ou ukiko wana wakwocha hakakahya namukahananga Yehova: vana vamikoko vavizamba vavali valambwe vamwaka umwe halikumbi halikumbi, kupwa wana wakulumba.+
4 Mwanamukoko wachizamba umwe mukamuhana nachimene, kaha mukwavo hakajimbavenyi.+
5 Mukavahanyina kumwe nachimbwa chimwe chaunga wamwaza chakusokesa muvimbwa 10 vyalifwa,* chakuchingasana nachimbwa chimwe chamaji amwaza akutwa kanawa chakusokesa muvimbwa viwana vyahine.*+
6 Unapu wana wakulumba+ wahakumbi hakumbi, uze ngwamishikile kuPili yaShinai kupwa wana wakwocha hakakahya walivumba lyalupengopengo* kuli Yehova.
7 Mukahanyina kumwe nawana wavinyo. Ukapwe chimbwa chimwe chakusokesa muvimbwa viwana vyahine hamwanamukoko hamwanamukoko wachizamba.+ Mukahingunwina wala wausasu muchihela chajila kupwa wana wavinyo wakuhana Yehova.
8 Kaha mwanamukoko wachizamba mukwavo mukamuhana hakajimbavenyi. Mukamuhanyine kumwe nawana wamanona, nawana wavinyo, ngana vize namukahana nachimene. Mukamuhana kupwa wana wakwocha hakakahya wakuneha livumba lyalupengopengo* kuli Yehova.+
9 “‘Halikumbi lyaSambata,+ mukahana vana vamikoko vavizamba vavali valambwe vamwaka umwe, navimbwa vivali vyaunga wamwaza vyakusokesa muvimbwa 10 vyalifwa, vyakuchingasana namaji kupwa wana wamanona. Mukavahanyina kumwe nawana wavinyo.
10 Ou ukiko wana wakulumba wakuhananga haSambata, wakuhakila kuwana wakulumba wahakumbi hakumbi nawana wawo wavinyo.+
11 “‘Hakumweka chakakweji hikakweji,* mukahana Yehova mavuvu javangombe vavakuji vavali, nachizamba chamukoko umwe, navana vamikoko vavizamba 7 vamwaka umwe+ kupwa wana wakulumba.
12 Mukahanyina kumwe navimbwa vitatu vyaunga wamwaza vyakusokesa muvimbwa 10 vyalifwa, vyakuchingasana namaji kupwa wana wamanona hangombe hangombe, navimbwa vivali vyaunga wamwaza vyakusokesa muvimbwa 10 vyalifwa, vyakuchingasana namaji kupwa wana wamanona+ hachizamba chamukoko umwe,+
13 nachimbwa chimwe chaunga wamwaza chakusokesa muvimbwa 10 vyalifwa, chakuchingasana namaji hamwanamukoko hamwanamukoko wachizamba kupwa wana wakulumba, wakwocha hakakahya wakuneha livumba lyalupengopengo*+ kuli Yehova.
14 Mukahanyina kumwe nachimbwa chahine chawana wavinyo hangombe hangombe,+ nachimbwa chimwe chavinyo chakusokesa muvimbwa vitatu vyahine hachizamba chamukoko umwe,+ nachimbwa chimwe chavinyo chakusokesa muvimbwa viwana vyahine hamwanamukoko hamwanamukoko wachizamba.+ Ou ukiko wana wakulumba namukahananga hakakweji hakakweji mumwaka wosena.
15 Mukahana nawa mwanapembe umwe kuli Yehova kupwa wana wahashili, wakuhakila kuwana wakulumba wahakumbi hakumbi nawana wawo wavinyo.
16 “‘Mukakweji wakulivanga, halikumbi lyakusokesa 14, kukapwe Paseka+ yaYehova.
17 Kaha halikumbi lyakusokesa 15 lyakakweji kanou, kukapwe chiwanyino. Mukalyenga mbolo yakuzeneka chimbalwila hamakumbi 7.+
18 Halikumbi lyakulivanga kukapwe kukunguluka chajila. Kanda namukazata milimo yakulikanyako.
19 Mukahana Yehova wana wakwocha hakakahya wamavuvu javangombe vavakuji vavali, nachizamba chamukoko umwe, navana vamikoko vavizamba 7 vamwaka umwe kupwa wana wakulumba. Mukahana vimuna valambwe.+
20 Mukahanyina kumwe nawana wamanona waunga wamwaza wakuchingasana namaji.+ Ukapwe vimbwa vitatu vyakusokesa muvimbwa 10 vyalifwa hangombe hangombe, navimbwa vivali vyakusokesa muvimbwa 10 hachizamba chamukoko umwe,
21 nachimbwa chimwe chakusokesa muvimbwa 10 hamwanamukoko hamwanamukoko wavaze vizamba jamikoko 7.
22 Mukahana nawa pembe umwe kupwa wana wahashili wakumilingila chakufwika hashili yenu.
23 Mukahana wana kanou, kuhakila kuwana wakulumba wachimene uze namukahananga hakumbi hakumbi.
24 Omu mukiko namukahananga kulya* chahalikumbi halikumbi hamakumbi 7, hiwana wakwocha hakakahya wakuneha livumba lyalupengopengo* kuli Yehova. Mukachihanyina kumwe nawana wakulumba wahakumbi hakumbi, nawana wacho wavinyo.
25 Halikumbi lyakusokesa 7 mukapwa nakukunguluka chajila.+ Kanda namukazata milimo yakulikanyako.+
26 “‘Halikumbi lyakwaha mihako yakulivanga kuhya,+ omu namukahana Yehova+ wana wamanona wauhya, mukapwa nakukunguluka chajila hachiwanyino chenu chavyalumingo.+ Kanda namukazata milimo yakulikanyako.+
27 Mukahana mavuvu javangombe vavakuji vavali, nachizamba chamukoko umwe, navana vamikoko vavizamba 7 vamwaka umwe+ kupwa wana wakulumba walivumba lyalupengopengo* kuli Yehova.
28 Mukahanyina kumwe nawana wamanona waunga wamwaza wakuchingasana namaji. Ukapwe vimbwa vitatu vyakusokesa muvimbwa 10 vyalifwa hangombe hangombe, navimbwa vivali vyakusokesa muvimbwa 10 hachizamba chamukoko umwe,
29 nachimbwa chimwe chakusokesa muvimbwa 10 hamwanamukoko hamwanamukoko wavaze vizamba jamikoko 7.
30 Mukahana nawa pembe umwe kupwa wana wahashili wakumilingila chakufwika hashili yenu.+
31 Mukahana vimuna kanava, kuhakila kuwana wakulumba wakuhana hakumbi hakumbi. Mukavahanyina kumwe nawana wamanona nawana wavinyo. Vimuna kana vakapwe valambwe.+
Kwinyikila Chamwishi
^ Chipwe “lyakusuulwisa; lyakwivwisa kuwaha.”
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Hine yimwe yapwile jilita 3.67. Tala Chihande B14.
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Hepe., “chatukweji twenu.”
^ Chipwe “lyakusuulwisa; lyakwivwisa kuwaha.”
^ Hepe., “mbolo.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
