Kulava 3:1-51
3 Evi vikiko vyapwile visaka* vyaAlone naMose halikumbi lize Yehova ahanjikile kuli Mose haPili yaShinai.+
2 Awa akiko majina avana vaAlone vamalunga: watwatwa ikiye Natave, kaha hinamushisa Avihu,+ naEleyaza,+ naItamale.+
3 Awa akiko majina avana vaAlone vamalunga, vapilishitu vakuwavisa vaze vatongwele vazate milimo yaupilishitu.+
4 Natave naAvihu vafwilile hameso aYehova omu vanehele kakahya kaze kavetavishileko kumeso aYehova+ mupambo yaShinai, kaha vafwile chakuzeneka vana. Oloze Eleyaza+ naItamale+ vazachilenga lika mulimo waupilishitu hohamwe nasevo Alone.
5 Jino Yehova ambile kuli Mose ngwenyi:
6 “Neha vaka-muyachi waLevi+ uvemike kumeso akapilishitu Alone mangana vamuzachilenga.+
7 Vatesemo milimo yavo yakumukafwa ikiye, nayeyi yakuzachila lizavu lyosena kumbalaka yakuliwanyina hakuzata milimo yavo yakutavanaku.
8 Valamenga vinoma+ vyosena vyambalaka yakuliwanyina, nakuzachilanga vaIsalele hakutesamo milimo yavo yakutavanaku.+
9 Uhane vaLevi kuli Alone nakuli vana venyi vamalunga. Vanamuhanevo kupwa wana kufuma muli vaIsalele.+
10 Tongola Alone navana venyi, vazatenga milimo yaupilishitu.+ Kaha mutu uze mwakapandamako, uze kavetavisako vakamujihe.”+
11 Yehova ambile cheka kuli Mose ngwenyi:
12 “Tala! Ngunambate vaLevi muli vaIsalele vashise muli vatwatwa vosena* vavaIsalele.+ VaLevi navapwa vami.
13 Mwomwo vatwatwa vosena vanapu vami.+ Halikumbi lize ngwajihile vatwatwa vosena mulifuchi lyaEjipitu,+ ami ngwalisakwilile vatwatwa vamuli vaIsalele, vatu natunyama, vapwenga vajila.+ Vapwenga vami. Ami yami Yehova.”
14 Yehova ambile cheka kuli Mose mupambo yaShinai+ ngwenyi:
15 “Soneka vana vaLevi vamalunga kweseka najizuvo javakakuluka javo, najitanga javo. Usoneke vana vamalunga vosena kuputukila kuli ou wakakweji umwe nakuya kwilu.”+
16 Ngocho Mose avasonekele vosena nge omu mwayile mazu aze vamulwezele kuli Yehova.
17 Awa akiko majina avana vaLevi vamalunga: Ngeleshone, naKohate, naMelali.+
18 Vana vaNgeleshone vamalunga kweseka najitanga javo vapwile Livinyi naShimei.+
19 Vana vaKohate vamalunga kweseka najitanga javo vapwile Amalame, naIzahale, naHevelone, naUjiyele.+
20 Vana vaMelali vamalunga kweseka najitanga javo vapwile Mali,+ naMushi.+
Eji jikiko jitanga javaLevi kweseka najizuvo javakakuluka javo.
21 Kuli Ngeleshone kwafumine tanga yavaLivinyi,+ natanga yavaShimei. Eji jikiko jitanga javaNgeleshone.
22 Vana vamalunga vosena vaze vasonekele kuputukila kuli ou wakakweji umwe nakuya kwilu vapwile 7,500.+
23 Jitanga javaNgeleshone jatungilenga chilombo chavo kunyima yatavanaku,+ kumutamba wakumulauko.
24 Mwata wakuzuvo yavakakuluka javaNgeleshone ikiye Elyasafwe mwanaLayele.
25 Mulimo wavana vaNgeleshone+ kumbalaka yakuliwanyina wapwile wakulama tavanaku, nambalaka,+ nachiwuva chayo,+ nachivamba*+ chakuchikolo chambalaka yakuliwanyina,
26 namahina achipango akusukika,+ nachivamba*+ chakuwingililo wachipango chize chajingilika tavanaku nalijiko lyakulumbila, najingoji jakumbalaka, nakuzakama nawa milimo yosena yapandamako.
27 Kuli Kohate kwafumine tanga yavaAmalame, natanga yavaIzahale, natanga yavaHevelone, natanga yavaUjiyele. Eji jikiko jitanga javaKohate.+
28 Vana vamalunga vosena vaze vasonekele kuputukila kuli ou wakakweji umwe nakuya kwilu vapwile 8,600. Mulimo wavo wapwile wakulama chihela chajila.+
29 Jitanga javaKohate jatungilenga chilombo chavo kumutamba wakusulo watavanaku.+
30 Mwata wakuzuvo yavakakuluka javaka-tanga yavaKohate ikiye Elizafwane mwanaUjiyele.+
31 Mulimo wavo wapwile wakulama Chikasha,+ namesa,+ nachitumbikilo chamanongo,+ namajiko akulumbila,+ navinoma+ vize vazachishilenga kumilimo yakuchihela chajila, nachivamba,*+ nakuzakama nawa milimo yosena yapandamako.+
32 Mukulwane wavamyata javaLevi ikiye Eleyaza+ mwanakapilishitu Alone, uze apwile nawata wakutala vaze vazachilenga milimo muchihela chajila.
33 Kuli Melali kwafumine tanga yavaMali, natanga yavaMushi. Eji jikiko jitanga javaMelali.+
34 Vana vamalunga vosena vaze vasonekele kuputukila kuli ou wakakweji umwe nakuya kwilu vapwile 6,200.+
35 Mwata wakuzuvo yavakakuluka javaka-tanga yavaMelali ikiye Zulyele mwanaAvihayile. Jitanga javaMelali jatungilenga chilombo chavo kumutamba wakunote yatavanaku.+
36 Mulimo wavana vaMelali wapwile wakutala vipamba+ vyakutavanaku, namyalachi yayo,+ najipanda jayo,+ namanevo jayo, navinoma+ vyayo vyosena, namilimo yosena yapandamako,+
37 najipanda jize jajingilikile chipango, namanevo+ jajo, najimbambo jajo, najingoji jajo.
38 Mose naAlone navana venyi vatungilenga chilombo chavo kulutwe lwatavanaku, kulutwe lwambalaka yakuliwanyina kumututuko. Mulimo wavo wapwile wakulama chihela chajila, nakuzachilanga vaIsalele. Kaha mutu uze mwakapandamako, uze kavetavisako vakamujihe.+
39 Vana vamalunga vavaLevi vosena, kuputukila kuli ou wakakweji umwe nakuya kwilu, vaze Mose naAlone vasonekele nge omu avalwezele Yehova vapwile 22,000.
40 Kaha Yehova ambile kuli Mose ngwenyi: “Soneka vatwatwa vavaIsalele vamalunga vosena kuputukila kuli ou wakakweji umwe nakuya kwilu,+ valave nakunoneka majina avo.
41 Ngumbachile vaLevi, vashise muli vatwatwa vosena vamuli vaIsalele.+ Ngumbachile nawa vimuna vavaLevi vashise vatwatwa vamuli vimuna vavaIsalele.+ Ami yami Yehova.”
42 Ngocho Mose asonekele vatwatwa vosena muli vaIsalele, nge muze Yehova amulwezele.
43 Vatwatwa vamalunga vosena vaze vasonekele hamajina, kuputukila kuli ou wakakweji umwe nakuya kwilu vapwile 22,273.
44 Yehova ambile cheka kuli Mose ngwenyi:
45 “Mbata vaLevi, vashise vatwatwa vosena vamuli vaIsalele. Mbata nawa vimuna javaLevi vashise muli vimuna javaIsalele. Kaha vaLevi vapwenga vami. Ami yami Yehova.
46 Hakusokola+ vaIsalele 273 vaze vanalituluho hakushishisa vaLevi muli vatwatwa vavaIsalele,+
47 utambule jishekele* jitanu hamutu himutu+ nge kutesa nakulema chashekele yamuchihela chajila.* Shekele yimwe yinapu jingela* 20.+
48 Jimbongo kana ukajihane kuli Alone navana venyi kupwa ndando yakusokola vaIsalele vaze vanalituluho.”
49 Ngocho Mose atambwile jimbongo jandando yakusokola vaIsalele vaze valitulileho hakushishisa vaLevi muli vatwatwa vavaIsalele.
50 Atambwile jimbongo kuli vatwatwa vavaIsalele jakuheta kujishekele 1,365 nge kutesa nakulema chashekele yamuchihela chajila.
51 Ngocho Mose ahanyine Alone navana venyi jize jimbongo jandando yakusokola nge muze mwayile mazu aYehova, ngana muze amulwezele Yehova.
Kwinyikila Chamwishi
^ Hepe., “visemunwino.”
^ Hepe., “vatwatwa vosena vakusokolola mumajimo.”
^ Chipwe “nalihina lyakuvatasana.”
^ Chipwe “nalihina lyakuvatasana.”
^ Chipwe “nalihina lyakuvatasana.”
^ Shekele yimwe yapwile jingalamu 11.4. Tala Chihande B14.
^ Chipwe “nge kutesa nashekele yajila.”
^ Ngela yimwe yapwile jingalamu 0.57. Tala Chihande B14.
