Kulava 30:1-16
30 Mose ahanjikile kuli vatwamina+ jamiyachi yavaIsalele ngwenyi: “Yehova nambe ngwenyi:
2 Kachi nge lunga mwalishika lushiko+ naYehova chipwe mwalishinga lushingo+ lwakulihenda kuvyuma vimwe, kanda akazomboka mazu enyiko.+ Akalinge vyuma vyosena vize nashiki.+
3 “Kachi nge kanyike wapwevo uze achili nakutwama kuzuvo yaise mwalishika lushiko naYehova chipwe mwashika kulihenda kuvyuma vimwe,
4 kaha ise himwevwako omu mwanenyi mwashika lushiko kana, chipwe omu mwashika kulihenda kuvyuma vimwe, kaha nawa ise nachitavila, jishiko josena nashiki, navyuma vyosena vize nashiki kulihendako kanda vikalumukako.
5 Oloze kachi nge ise mwamukanyisa omu mwevwa jishiko jenyi, chipwe omu mwevwa vyuma vize nashiki kulihendako, kaha jishiko jenyi jikalumuke. Yehova mwamukonekela mwomwo ise ikiye namukanyisa.+
6 “Jino kachi nge ali nalunga okunyi nashiki lyehi lushiko lwenyi, chipwe nge nalusuka lyehi kushika lushiko lwakulihenda kuvyuma vimwe,
7 kaha lunga lyenyi himwevwako, oloze mwahona kumukanyisa halikumbi lize nevuko, kaha jishiko jenyi navyuma vize nashiki kulihendako kanda vikalumukako.
8 Oloze kachi nge lunga lyenyi mwamukanyisa halikumbi lize mwevwako, kaha nahase kujimbangana lushiko kana, chipwe lushiko luze alusukanga kushika lwakulihenda kuvyuma vimwe,+ kaha Yehova mwamukonekela.
9 “Kachi nge pwevo watuliwe, chipwe uze vanalukulula mwashika lushiko, vyuma vyosena vize nashiki kanda vikalumukako.
10 “Oloze kachi nge pwevo mwashika lushiko, chipwe kushika lushiko lwakulihenda kuvyuma vimwe okunyi achili kuzuvo yalunga lyenyi,
11 kaha lunga lyenyi himwevwako, oloze mwahona kumukanyisa, chipwe kumuhamika, kaha jishiko jenyi josena chipwe vyuma vize nashiki kulihendako kanda vikalumukako.
12 Oloze kachi nge lunga lyenyi mwajimbangana jishiko kana navyuma vize alishinganga kulihendako halikumbi lize avivwanga, kaha vikalumuke.+ Yehova mwamukonekela mwomwo lunga lyenyi ikiye navijimbangana.
13 Lwesholwo lushiko mwashika pwevo, chipwe lushingo mwalishinga lwakulihenda kuvyuma vimwe, chipwe lwakulikanyisa kulinga vyuma vimwe,* lunga lyenyi ikiye nahase kuvitavisa chipwe kuvijimbangana.
14 Oloze nge namuhita makumbi amavulu chakuzeneka lunga lyenyi kumukanyisa, kaha uze lunga netavisa jishiko japwevo lyenyi josena chipwe vyuma vyosena vize nashiki kulihendako. Navitavisa mwomwo ahonene kumukanyisa halikumbi lize avivwile.
15 Oloze kachi nge lunga lyenyi mwakavijimbangana halwola lweka keshi halikumbi lize avivwileko, kaha navakamuzangamisa hamulonga wapwevo lyenyi.+
16 “Eji jikiko jindongi jize Yehova alwezele Mose hali lunga napwevo lyenyi, nahali chisemi walunga namwanenyi wapwevo uze ali nakutwama kuzuvo yenyi.”
Kwinyikila Chamwishi
^ Chipwe “lwakuyanjisa mwono.”
