Kulava 31:1-54
31 Yehova alwezele Mose ngwenyi:
2 “Linga sambanjinga+ kuli vaMichane+ havyuma valingile kuli vaIsalele. Kufumaho nautoka ngana mwavatu jove.”*+
3 Ngocho Mose ahanjikile kuli vatu ngwenyi: “Pakachisenu vitwa malunga vali muli enu mangana vayenga nakulwa jita navaMichane, vakamulingile Yehova sambanjinga kuli vaMichane.
4 Tumenu malunga 1,000 vakumuyachi himuyachi, kumiyachi yavaIsalele yosena mangana vakalwe jita.”
5 Kaha vahandunwine malunga 1,000 kumuyachi himuyachi hamakombakaji avaIsalele.+ Ngocho vaze vapakachishile vitwa mangana vakalwe jita vapwile 12,000.
6 Mose atumine vaze malunga 1,000 vakumuyachi himuyachi mangana vakalwe jita. Vayile hamwe naFwinehase+ mwanaEleyaza, kapilishitu kamaswalale. Fwinehase ikiye ambachile vinoma vyajila najineta+ jakwimba mangana valizange kuya kujita.
7 Ngocho valwile jita navaMichane nge muze Yehova alwezele Mose, kaha vajihile malunga vosena.
8 Hamalunga vaze vajihile, hapwile navamyangana javaMichane vatanu. Majina avo vapwile Evi, naLekeme, naZule, naHule, naLeva. Kaha vajihile nawa Mbalame+ mwanaMbeyole napoko yamukwale.
9 VaIsalele vakwachile mapwevo javaMichane navana vavo vavandende ufunge. Vapupile nawa vimuna javo vosena, navikumba vyavo vyosena.
10 Kaha vochele jinganda javo josena navilombo* vyavo vyosena.
11 Vapupile vyuma vyosena, navatu natunyama.
12 Kaha vambachile vafunge, navyuma vapupile, nakuvineha kuli Mose, nakuli kapilishitu Eleyaza, nakulizavu lyavaIsalele kuchilombo chize chapwile mulikundu lyaMowave+ kwakamwihi naYotau kwakulitalasana naYeliko.
13 Jino Mose, nakapilishitu Eleyaza, navamyata jalizavu vavasesele kuweluka wachilombo.
14 Oloze Mose apihililile namalunga vaze vatongola valizavu lyamaswalale, tupitau twamakombakaji natupitau twamakulukaji, vaze vafumine kujita.
15 Mose ambile kuli vakiko ngwenyi: “Kumana munalame mapwevo vosena vavatonyi?
16 Talenu! Ava vakiko vaze vazondwele vaIsalele hakukavangiza mazu aMbalame nakuvalingisa vahone kupwa vakushishika+ kumeso aYehova havyuma valingile kuPeyole+ numba musongo wachihita wizenga halizavu lyaYehova.+
17 Ngocho jihenu vanyike vamalunga vosena, namapwevo vosena vaze valisavalaho lyehi namalunga.
18 Oloze lamenu vanyike vamapwevo vosena vaze kanda valisavalengaho lyehi namalunga.+
19 Kahenu mupwenga kuweluka wachilombo hamakumbi 7. Weshowo najihi mutu* hali enu, naweshowo nakwate mutu vanajihi,+ alitomese+ halikumbi lyamuchitatu, nahalikumbi lyakusokesa 7 hohamwe navafunge jenu.
20 Kaha uvwalo wenu, navyuma vyamalambu, navyuma vyosena vyakutunga namangona avapembe, navyuma vyakutunga vyamitondo vyosena muvitomese kushili.”
21 Kapilishitu Eleyaza ambile kuli maswalale vaze vayile kujita ngwenyi: “Elu lukiko lushimbi luze Yehova alwezele Mose ngwenyi,
22 ‘Ulu, napalata, naunengu, nafwelu, nashitanyu, nasumbu,
23 vyeshovyo vinahase kuhita mukakahya, mukavihichisa mukakahya mangana vikatome. Oloze mukavitomese nawa nameya akutomesa.+ Vyeshovyo kaveshi kuhichisa mukakahyako mukavihichise mumeya vikatome.
24 Kahenu mukakose uvwalo wenu halikumbi lyakusokesa 7 mangana mukatome, kufumaho numba mukakinduluke muchilombo.’”+
25 Yehova ambile jino kuli Mose ngwenyi:
26 “Ove, nakapilishitu Eleyaza, navatwamina vakujizuvo javakakuluka jalizavu lyavaIsalele, lavenu vyuma vyosena vize munapupu, navatu natunyama.
27 Tepenu vyuma vize munapupu, chimbwa chimwe muchihane vaze vayanga kujita, kaha chimbwa chikwavo muchihane kulizavu lyosena.+
28 Kaha kumakulukaji atanu* avafunge, navangombe, navimbulu, namikoko jamaswalale vaze vayanga kujita, mumbateko umwe umwe kupwa mulambu waYehova.
29 Muutambule kuchimbwa chavo, muuhane kapilishitu Eleyaza kupwa wana waYehova.+
30 Kaha kuchimbwa chavaIsalele nawa mumbateko umwe umwe hamakumi atanu* avafunge, navangombe, navimbulu, namikoko, navimuna vamiyachi yosena, muvahane kuli vaLevi+ vaze veji kuzatanga milimo yakutavanaku yaYehova.”+
31 Ngocho Mose nakapilishitu Eleyaza valingile nge muze Yehova alwezele Mose.
32 Vimuna vosena vapupile kuli vaze vayile kujita vapwile mikoko 675,000,
33 navangombe 72,000,
34 navimbulu 61,000.
35 Kaha mapwevo vaze vapwile kanda valisavaleho lyehi namalunga+ vapwile 32,000.
36 Chimbwa chamikoko vahanyine kuli vaze vayile kujita chapwile mikoko 337,500.
37 Kaha mulambu waYehova wapwile mikoko 675.
38 Vangombe vapwile 36,000, kaha mulambu waYehova wapwile vangombe 72.
39 Vimbulu vapwile 30,500, kaha mulambu waYehova wapwile vimbulu 61.
40 Vafunge vapwile 16,000, kaha mulambu waYehova wapwile vafunge 32.
41 Ngocho Mose ahanyine mulambu kana kuli kapilishitu+ Eleyaza kupwa wana waYehova nge muze Yehova alwezele Mose.
42 Kaha chimbwa chavaIsalele chize Mose avahanyine omu valipangilile vimbwa vyavo navaze vayile kujita,
43 chapwile mikoko 337,500,
44 navangombe 36,000,
45 navimbulu 30,500,
46 navafunge 16,000.
47 Kaha kuchimbwa chavaIsalele, Mose ambachileko umwe umwe hamakumi atanu* avafunge, navimuna, avahanyine kuli vaLevi+ vaze vazachilenga milimo yakutavanaku yaYehova,+ nge muze Yehova alwezele Mose.
48 Jino malunga vakutongola valizavu lyamaswalale,+ tupitau twamakombakaji natupitau twamakulukaji vapandamine kuli Mose.
49 Kaha vambile kuli ikiye ngwavo: “Etu vangamba jove tunalave lyehi malunga vaka-jita vaze tuli nakutwaminyina, kaha naumwe wauchi najimbalaho.+
50 Ngocho tunanehe wana wavyuma vyaulu kuli Yehova vize ambatanga mutu himutu, malenge amutusendengele, namaseka, natuzeya twatutachikijilo, natupata twakuvwala kumatwitwi, navimbilingwa vyeka, mangana vatulingile chakufwika hashili yetu kumeso aYehova.”
51 Kaha Mose nakapilishitu Eleyaza vatambwile vimbilingwa vyosena vyaulu.
52 Ulu wosena uze tupitau twamakombakaji natupitau twamakulukaji vahanyine kuli Yehova kupwa wana, wapwile jishekele* 16,750.
53 Malunga vaka-jita vosena vakindulukile mutu himutu navyuma vyenyi vyakupupa.
54 Ngocho Mose nakapilishitu Eleyaza vatambwile uze ulu kuli tupitau twamakombakaji natupitau twamakulukaji, kaha vaunehele mumbalaka yakuliwanyina upwenga wakwanukilangaho vaIsalele kumeso aYehova.
Kwinyikila Chamwishi
^ Eyi hindangwishi yize yalumbununa kufwa.
^ Chipwe “navilombo vyakujingulwisa jikembwe.”
^ Chipwe “mwono.”
^ Makulukaji atanu anapu 500.
^ Makumi atanu anapu 50.
^ Makumi atanu anapu 50.
^ Shekele yimwe yapwile jingalamu 11.4. Tala Chihande B14.
