Kulava 32:1-42
-
Membo akumututuko waYotau (1-42)
32 Jino vana vaLuvene+ navana vaNgate+ vapwile navimuna vavavulu chikuma, kaha vamwene ngwavo jingalila jaYazele+ naNgileyate japwile jamwaza kulaminamo vimuna.
2 Ngocho vana vaNgate navana vaLuvene vejile kuli Mose, nakapilishitu Eleyaza, navamyata jalizavu nakwamba ngwavo:
3 “Jingalila jaAtalote, naNjivone, naYazele, naNyimila, naHeshevone,+ naEleyale, naSevame, naNevo,+ naMbeyone,+
4 jize Yehova afungulwile kumeso alizavu lyavaIsalele,+ jinapu jamwaza kulaminamo vimuna, kahetu vangamba jove nawa tuli navimuna vavavulu chikuma.”+
5 Vambile cheka ngwavo: “Kachi nge unatwivwila uselewa, kaha tuhane etu vangamba jove jingalila kana jipwenga luheto lwetu. Kanda naututwala musali yaYotauko.”
6 Kaha Mose ambile kuli vana vaNgate navana vaLuvene ngwenyi: “Munasake vandumbwenu vakalwe jita, oloze enu mutwamenga kuno nyi?
7 Ikaze namufutwishila vaIsalele kumichima mangana vazeneke kuzauka nakuheta mulifuchi lize mwavahana Yehova?
8 Omu mukiko valingile masenu omu ngwavatumine kufuma kuKateshe-mbalaneya vakatale lifuchi kana.+
9 Omu vayile kuChinema* chaEshekole+ vakamwene lifuchi kana, oloze hakukinduluka, vafutwishile vaIsalele kumichima mangana vazeneke kuya mulifuchi lize Yehova avashikile kuvahana.+
10 Yehova akwachile matoto halikumbi lize nakulishinga ngwenyi:+
11 ‘Malunga vamyaka yakusemuka 20 nakuya kwilu vaze vafumine muEjipitu, kaveshi kukamona lifuchi lize+ ngwalishingile kuli Apalahama, naIsaka, naYakovako,+ mwomwo kavangukavangijile namichima yavo yosenako.
12 Shina Kaleve+ mwanaYefune kaKenaze, naYoshuwa+ mwanaNune kaha, mwomwo vanakavangizanga Yehova namichima yavo yosena.’+
13 Ngocho Yehova akwachilile vaIsalele matoto nakuvalingisa valumbwangile mupambo hamyaka 40+ palanga nomu chakumine chisemunwino chize chalingile upi kumeso aYehova.+
14 Enu malunga vaka-shili munalingi nge muze valingile masenu, kaha munatohwesa matoto aYehova hali vaIsalele.
15 Kachi nge namulitwamina kumukavangiza, kaha mwavechelela valumbwangile cheka mupambo, ngocho namulingisa vatu vosena ava vanonge.”
16 Kufumaho vapandamine cheka kuli Mose nakwamba ngwavo: “Twitavise tutunge memba avimuna jetu amalolwa kuno najinganda javana vetu.
17 Kahetu natulipakata vitwa vyajita+ nakutwaminyina vaIsalele palanga nomu natukalinga hitunavahetesa lyehi kuchihela chavo. Oloze vana vetu navasala mujinganda jakukingiwa mangana tuvakinge kuvatu vamulifuchi lino.
18 Katweshi kukakinduluka kujizuvo jetuko kuvanga vaIsalele vosena vanatambula lyehi mutu himutu mavu enyi kupwa uswana wenyi.+
19 Etu katweshi kukatambula uswana navakiko hamwe musali yaYotau nakutwala kulutweko, mwomwo tunatambula lyehi uswana wetu kuno kumututuko waYotau.”+
20 Mose ambile kuli vakiko ngwenyi: “Enu lingenu vene ngocho. Pakatenu vitwa kumeso aYehova muyenga kujita.+
21 Kachi nge muvosena namupakata vitwa kumeso aYehova nakuzauka Yotau mukalwe jita omu mwahanga vaka-kole jenyi,+
22 palanga nomu namukalinga himunafungulula lyehi lifuchi kumeso aYehova,+ kaha namukakinduluka+ vakuzeneka mulonga kumeso aYehova navaIsalele. Ngocho ngalila yino nayikapwanga luheto lwenu kumeso aYehova.+
23 Oloze nge kamweshi kulinga ngochoko, namulinga shili kumeso aYehova. Kaha tachikizenu ngwenu navakamizangamisa hashili yenu.
24 Munahase kutunga jinganda javana venu namemba avimuna jenu,+ olozenyi vyuma munashiki muvilinge.”
25 Jino vana vaNgate navana vaLuvene vambile kuli Mose ngwavo: “Etu vangamba jove natulinga nganomu unatulweze ove mwata wetu.
26 Vana vetu, namapwevo jetu, navimuna jetu vosena navasala mujinganda jaNgileyate.+
27 Oloze etu vangamba jove natulipakata vitwa nakuzauka tukalwe jita kumeso aYehova+ nganomu unahanjika ove mwata wetu.”
28 Ngocho Mose ahanyine lushimbi lwakuvuluka vakiko kuli kapilishitu Eleyaza, naYoshuwa mwanaNune, navatwamina vakujizuvo javakakuluka jamiyachi yavaIsalele.
29 Ambile kuli vakiko ngwenyi: “Kachi nge vana vaNgate navana vaLuvene navalipakata vitwa nakuzauka Yotau nayenu hamwe mangana mukalwe jita kumeso aYehova, nakufungulula lifuchi, kaha mukavahane ngalila yaNgileyate kupwa luheto lwavo.+
30 Oloze nge kaveshi kulipakata vitwa nakuzauka nayenu hamweko, kaha vakatwamenga muli enu mulifuchi lyaKanane.”
31 Kaha vana vaNgate navana vaLuvene vambile ngwavo: “Natulinga vyuma vyosena nahanjika Yehova kuli etu vangamba jove.
32 Natulipakata vitwa nakuzauka musali kumeso aYehova mulifuchi lyaKanane,+ oloze luheto natukaswana luli musali lino lyaYotau.”
33 Ngocho Mose ahanyine mavu vana vaNgate, navana vaLuvene,+ nachimbwa chamuyachi waManase+ mwanaYosefwe. Avahanyine mavu awangana waShihone+ mwangana wavaAmole, nawawa awangana waOnge+ mwangana waMbashane. Mavu kana apwile amujinganda jajingalila jize, najinganda jeka jize jajingilikileko.
34 Vana vaNgate vatungile* nganda yaNjivone,+ naAtalote,+ naAlowele,+
35 naAtalote-shofwane, naYazele,+ naYongeveha,+
36 naMbete-nyimila,+ naMbete-halane.+ Japwile jinganda jakukingiwa. Vatungile nawa memba avimuna amalolwa.
37 Kaha vana vaLuvene vatungile nganda yaHeshevone,+ naEleyale,+ naKilyataime,+
38 naNevo,+ naMbale-meyone,+ jinganda jize valumwine majina ajo, kaha vatungile naShivima. Jinganda jize vatungulwile vajilukile majina eka.
39 Vana vaMakile+ mwanaManase vanyemukilile Ngileyate nakuyitambula, kaha vahangile vaAmole vaze vapwilemo.
40 Ngocho Mose ahanyine Ngileyate kuli vana vaMakile mwanaManase, kaha vatwaminengamo.+
41 Yaile mwanaManase avanyemukilile, kaha avatambwile membo avo ajimbalaka nakuwaluka ngwenyi Havote-yaile.*+
42 Nova naikiye avanyemukilile, kaha atambwile ngalila yaKenate najimbongi jajingilikileko nakuyiluka lijina lyenyi lyaNova.
Kwinyikila Chamwishi
^ Chipwe “kuMwanakalwiji.”
^ Chipwe “vatungulwile.”
^ Ulumbunwiso, “Membo aYaile aJimbalaka.”
