Kulava 34:1-29
34 Yehova ahanjikile cheka kuli Mose ngwenyi:
2 “Lweza vaIsalele jindongi jino ngwove: ‘Omu namwingila mulifuchi lyaKanane,+ eji jikiko jingiza jalifuchi lyaKanane lyosena, eli namutambula kupwa uswana wenu.+
3 “‘Ngiza yenu yakusulo yikafume kupambo yaJine nakukahita kuluhachi lwaEtome. Kaha ngiza yenu yakusulo kumutamba wakumututuko yikafume kusongo yaKalungalwiji waMungwa.*+
4 Ngiza yenu yikalumuke nakuhita kusulo yamukandu waAkalavime+ swi nakuJine, yikahete kusulo yaKateshe-mbalaneya.+ Kaha yikahite kuHazale-atale+ swi nakuAzamone.
5 Ngiza yikalumuke kufuma kuAzamone yikaye kuMwanakalwiji* wakuEjipitu, kaha yikahete kuKalungalwiji.*+
6 “‘Ngiza yenu yakumulauko yikapwe ngenge yaKalungalwiji Wamunene.* Eyi yikiko nayikapwa ngiza yenu yakumulauko.+
7 “‘Eyi yikiko nayikapwa ngiza yenu yakunote: Mukapule ngiza yenu kufuma kuKalungalwiji Wamunene swi nakuPili yaHole.+
8 Kufuma kuPili yaHole mukapule ngiza yenu swi nakuLevo-hamate,*+ kaha yikahete kuZetate.+
9 Ngiza kana yikahite kuJifwilone, kaha yikahete kuHazale-enane.+ Eyi yikiko nayikapwa ngiza yenu yakunote.
10 “‘Ngiza yenu yakumututuko mukayipule kufuma kuHazale-enane swi nakuShefwame.
11 Ngiza kana yikafume kuShefwame yikahete kuLivila kumututuko waAine, kaha yikashikumuke nakuvatasana kusongo yaKalungalwiji waKinelete*+ kumututuko.
12 Ngiza yikaye kuYotau, kaha yikahete kuKalungalwiji waMungwa.+ Eli likiko nalikapwa lifuchi lyenu+ nomu jahita jingiza jalyo.’”
13 Jino Mose alwezele vaIsalele ngwenyi: “Eli likiko lifuchi namukalipulila hakuzachisa tutachikijilo+ mangana likapwe luheto lwenu nge muze Yehova ahanjikile ngwenyi mwakalihana kumiyachi 9 nachimbwa chamuyachi.
14 Mwomwo muyachi wavaLuvene kweseka najizuvo javakakuluka javo, namuyachi wavaNgate kweseka najizuvo javakakuluka javo, nachimbwa chamuyachi waManase, vanatambula lyehi uswana wavo.+
15 Eyi miyachi yivali nachimbwa chamuyachi vanatambula lyehi uswana wavo kungalila yaYotau kwakamwihi naYeliko, kumutamba wakumututuko chakutala kumwizakumbi.”+
16 Yehova ahanjikile cheka kuli Mose ngwenyi:
17 “Awa akiko majina amalunga vaze navakamipangila lifuchi lize namukaheta: kapilishitu Eleyaza,+ naYoshuwa+ mwanaNune.
18 Kaha mukasakula mwata umwe kumuyachi himuyachi mangana vakapange lifuchi kupwa uswana wenu.+
19 Awa akiko majina avo: Kaleve+ mwanaYefune, wakumuyachi waYuta.+
20 Shemwele mwanaAmihute, wakumuyachi wavana vaShimeyone.+
21 Elitate mwanaKishilone, wakumuyachi waMbenjamine.+
22 Mwata Mbuki mwanaYongoli, wakumuyachi wavana vaNdane.+
23 Mwata Hanyele mwanaEfwote, wakumuyachi wavana vaManase+ wahali vana vaYosefwe.+
24 Mwata Kemwele mwanaShifwatane, wakumuyachi wavana vaEfwalime.+
25 Mwata Elizafwane mwanaPalanake, wakumuyachi wavana vaZevulune.+
26 Mwata Palachele mwanaAzane, wakumuyachi wavana vaIsakale.+
27 Mwata Ahihute mwanaShelomi, wakumuyachi wavana vaAshele.+
28 Mwata Petahele mwanaAmihute, wakumuyachi wavana vaNafwatale.”+
29 Ava vakiko vaze Yehova alwezele mangana vakapangile vaIsalele mavu mulifuchi lyaKanane.+
Kwinyikila Chamwishi
^ Ikiye Kalungalwiji waKufwa.
^ Tala Mukana waMazu.
^ Kulumbununa, Kalungalwiji Wamunene, waMendetelenya.
^ Ikiye Kalungalwiji waMendetelenya.
^ Chipwe “nakuwingililo wakuHamate.”
^ Kulumbununa, chijiva chaNgenesaleta, chipwe Kalungalwiji waNgalileya.