Kulava 35:1-34
35 Yehova ahanjikile cheka kuli Mose mulikundu lyaMowave kwakamwihi naYotau+ kwakulitalasana naYeliko ngwenyi:
2 “Lweza vaIsalele vakahane vaLevi jinganda jakutwamamo jakuuswana wavo navakatambula.+ Vakavahane navipapa vize vyajingilika jinganda kana.+
3 Navakatwamanga mujinganda kana, kaha vipapa vize vyajingilikako navikapwanga vyavimuna javo, navyuma vyavo, natunyama twavo veka vosena.
4 Vipapa vyakujinganda kana vize namukahana vaLevi vikatohwe jikuvite* 1,000 kufuma hakembwe yanganda jingulwishi.
5 Ukapime jikuvite 2,000 kuweluka wanganda kumutamba wakumututuko, kaha kumutamba wakusulo jikuvite 2,000, kumutamba wakumulauko jikuvite 2,000, kumutamba wakunote nawa jikuvite 2,000, oku nganda yili mukachi. Evi vikiko navikapwa vipapa vyakujinganda javo.
6 “Mukahana vaLevi jinganda jakuswamamo 6,+ jize mwakachinyina muka-kujiha mutu.+ Mukavahana nawa jinganda jeka 42.
7 Jinganda josena namukahana vaLevi jikapwe 48 hohamwe navipapa vyajo.+
8 Jinganda namukavahana najikafuma kuluheto lwavaIsalele.+ Kumazavu amanene mukambatako jajivulu, kaha kumazavu amandende mukambatako jajindende.+ Lizavu hilizavu nalikahana jinganda jimwe kuli vaLevi kweseka nauswana linatambula.”
9 Yehova ambile cheka kuli Mose ngwenyi:
10 “Lweza vaIsalele ngwove, ‘Hinamuzauka jino Yotau nakwingila mulifuchi lyaKanane.+
11 Sakulenu jinganda jili mwakamwihi jize najikapwanga jinganda jakuswamamo, jakuchinyina mutu uze najihi mukwavo chakuzeneka kuchisakula.+
12 Jinganda kaneji jikapwe jakuswamamo hakuchina muka-kulinga sambanjinga,+ mangana uze najihi mukwavo vakazeneke kumujiha, palanga nomu navakamusopesa kulizavu lyavaka-kuyula.+
13 Jinganda jakuswamamo 6 jize namukalongesa jikapwe jamulimo kanou.
14 Kalongesenu jinganda jitatu musali yino yaYotau,+ kaha jinganda jikwavo jitatu mulifuchi lyaKanane,+ kupwa jinganda jakuswamamo.
15 Eji jinganda jakuswamamo 6 jikapwe javaIsalele, navamwiza,+ navaka-kuzuzumana mangana weshowo mwakajiha mukwavo chakuzeneka kuchisakula akachinyinemo.+
16 “‘Kachi nge mutu navete mukwavo nachikungo chafwelu nakumujiha, kaha napu muka-kujiha mutu. Ou muka-kujiha mutu naikiye vakamujihe chikupu.+
17 Kachi nge namwase lilolwa nakumujiha, kaha napu muka-kujiha mutu. Ou muka-kujiha mutu naikiye vakamujihe chikupu.
18 Kachi nge namuvete nachitondo nakumujiha, kaha napu muka-kujiha mutu. Ou muka-kujiha mutu naikiye vakamujihe chikupu.
19 “‘Muka-kulinga sambanjinga akajihe mutu uze najihi mukwavo. Akamujihe omu mwakalihumangana nenyi.
20 Kachi nge mutu najihi mukwavo hakumushinjika mwomwo yachijindo, chipwe hakumwasa chuma chimwe mwomwo yakole,+
21 chipwe hakumuveta nalivoko mwomwo yachijindo, kaha naikiye vakamujihe chikupu. Napu muka-kujiha mutu. Muka-kulinga sambanjinga akajihe ou muka-kujiha mutu omu mwakalihumangana nenyi.
22 “‘Oloze kachi nge mutu nashinjika mukwavo chakuzeneka kutachikiza keshi mwomwo yachijindoko, chipwe nge namwase chuma chimwe chakuzeneka kutachikiza keshi mwomwo yakoleko,+
23 chipwe nge namuholwela lilolwa chakuzeneka kumumona, oloze keshi muka-kole wenyiko, kaha nawa kasakanga kumulemekako, ngocho himwafwa,
24 kaha lizavu lyavaka-kuyula likasopese uze avetanga mukwavo nauze muka-kulinga sambanjinga kweseka najishimbi kaneji.+
25 Lizavu lyavaka-kuyula likayovole uze muka-kujiha mutu mumavoko ayauze muka-kulinga sambanjinga. Kaha vakamukindulwise kunganda yenyi yakuswama kuze achinyinanga, kaha akatwamenga kuze palanga nomu mwakafwa kapilishitu wakulitulaho uze vawavishile namaji ajila.+
26 “‘Oloze kachi nge muka-kujiha mutu mwalovoka munganda yakuswama yize nachinyina,
27 kaha muka-kulinga sambanjinga himwamuwana kuweluka wanganda yakuswama nakumujiha, kaha muka-kulinga sambanjinga keshi kupwa namulonga wamanyingako.
28 Mwomwo atelanga kutwama munganda yenyi yakuswama palanga nomu mwafwa kapilishitu wakulitulaho. Oloze omu mwakalinga kapilishitu wakulitulaho hanafu lyehi, uze muka-kujiha mutu akakinduluke kuchihela chenyi.+
29 Eji jikiko jishimbi namukakavangizanga hakusopa milonga muvisemunwino vyenu vyosena kweshokwo namukatwamanga.
30 “‘Weshowo mwakajiha mutu,* naikiye vakamujihe,+ haunjiho vanambulula vinjiho.+ Oloze mutu* kanda vakamujiha haunjiho nambulula chinjiho umwe kahako.
31 Kanda namukatambula ndando yakusokola mutu* uze najihi mukwavo, uze natela kufwako. Mutu kana vakamujihe chikupu.+
32 Kanda namukatambula nawa ndando yakusokola mutu uze nachinyina kunganda yenyi yakuswama, nakumwitavisa akinduluke cheka kuchihela chenyi shimbu kanda kapilishitu wakulitulaho afwengako.
33 “‘Kanda namukapihisa lifuchi lize muli nakutwamako, mwomwo kumwanga manyinga cheji kupihisanga lifuchi.+ Kaha kakweshi chuma cheka nachifwika hamanyinga aze anamwangala hamavuko shina kuvanga manyinga ayauze nawamwange.+
34 Kanda namukapihisa lifuchi lize muli nakutwamako, lize nguli nakutwama nayami, mwomwo ami Yehova nguli nakutwama muli vaIsalele.’”+
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Chipwe “mwono.”
^ Chipwe “mwono.”
^ Chipwe “mwono.”
