Kulava 36:1-13
-
Lushimbi lwakusomboka vahanyine mapwevo vaze vapwile vaswana (1-13)
36 Jino vatwamina vajitanga javana vaNgileyate mwanaMakile,+ Makile mwanaManase, vakujitanga javana vaYosefwe, vapandamine kuli Mose navamyata, vatwamina vajitanga javaIsalele, nakuhanjika kuli vakiko.
2 Vambile ngwavo: “Yehova alwezele ove mwata wetu upange lifuchi kuzachisa tutachikijilo+ mangana lipwenga uswana wavaIsalele. Kaha ove mwata wetu vakulwezele kuli Yehova uhane uswana wandumbwetu Zelofwehate kuli vana venyi vamapwevo.+
3 Kachi nge navakasomboka kumalunga vakumuyachi weka wavaIsalele, kaha uswana wavo naukafuma kuuswana wavakakuluka jetu nakuuhakila kuuswana wamuyachi wamalunga vaze navakasombokako. Ngocho uswana wavo naukafuma kuchazano chauswana wetu.
4 Jino kuheta muMwaka waKusokoka+ chavaIsalele, uswana wamapwevo kana ava navakauhakila kuuswana wamuyachi wamalunga vaze navakasombokako. Ngocho uswana wavo navakaufumisa kuuswana wamuyachi wavakakuluka jetu.”
5 Ngocho Mose alwezele vaIsalele nge muze amulwezele Yehova ngwenyi: “Vaka-muyachi wavana vaYosefwe vanahanjika mwakwoloka.
6 Awa akiko mazu nahanjika Yehova kupandama kuvana vaZelofwehate vamapwevo ngwenyi, ‘Vanahase kusomboka kuli weshowo vanasake. Oloze vatela kusomboka kaha kumalunga vakumuyachi wasevo.
7 Uswana wavaIsalele kanda vakaufumisa kumuyachi umwe nakuunungulwila kumuyachi ukwavoko. VaIsalele vakalinjilile kuuswana wakumuyachi wavakakuluka javo.
8 Weshowo pwevo mwakapwa nauswana kumiyachi yavaIsalele, akasomboke kuli vaka-tanga yamuyachi wasevo,+ mangana vaIsalele vakalame luheto lwakuuswana wavakakuluka javo.
9 Uswana wavaIsalele kanda vakaufumisa kumuyachi umwe nakuunungulwila kumuyachi ukwavoko. VaIsalele vakalinjilile kuuswana wakumuyachi wavakakuluka javo.’”
10 Vana vaZelofwehate vamapwevo valingile nge muze Yehova alwezele Mose.+
11 Ngocho Mala, naChiliza, naHongola, naMilika, naNowa, vana vaZelofwehate+ vamapwevo vasombokele kuvana vavandumbwasevo.
12 Vasombokele kumalunga vakujitanga jaManase mwanaYosefwe, mangana uswana wavo utwamenga kumuyachi wakutanga yasevo.
13 Eji jikiko jishimbi namazu akuyula aze Yehova ahanyine vaIsalele kuhichila muli Mose mulikundu lyaMowave kwakamwihi naYotau kwakulitalasana naYeliko.+
