Kulava 4:1-49
4 Jino Yehova ambile kuli Mose naAlone ngwenyi:
2 “Lavenu vana vaKohate+ vaze vali havana vaLevi kweseka najitanga javo, najizuvo javakakuluka javo.
3 Mulave vosena vaze vamyaka yakusemuka 30+ nakutwala ku 50,+ vaze vatwama mulizavu lize vahana mulimo wakuzachila mumbalaka yakuliwanyina.+
4 “Eyi yikiko milimo navazatanga vana vaKohate mumbalaka yakuliwanyina.+ Yinapu milimo yajila chikuma.
5 Omu navakatuka vaka-chilombo, Alone navana venyi vamalunga vengile mumbalaka yakuliwanyina, vasukule lihina lyachivamba,+ valifwike hachikasha chaUnjiho.+
6 Vafwikeho nawa chiwuva chamalambu avambau, valengaho lihina lyawanda ulauluka, kaha vahakeko myalachi yakumbachila.+
7 “Valenga nawa lihina lyawanda ulauluka hamesa yajimbolo jakuhana Kalunga,+ vahakeho malonga, najipasa, naviloso, namilondo yawana wavinyo.+ Kaha mbolo yize yamakumbi osena+ yipwengaho lika.
8 Kaha vafwikeho lihina lyawanda uchila, vafwikeho nawa chiwuva chamalambu avambau, kaha vahakeko myalachi yakumbachila.+
9 Vambate nawa lihina lyawanda ulauluka vafwike chitumbikilo chamanongo,+ namanongo acho,+ najimanya, natumalonga twakukwachila kakahya,+ najisaji jacho jamaji josena jize veji kuzachisanga kuchitumbikilo.
10 Vachijingile hachiwuva chamalambu avambau, navinoma vyacho vyosena, kaha vachihake hamukambo wakumbachila.
11 Kaha valenga nawa lihina lyawanda ulauluka halijiko lyakulumbila lyaulu,+ vafwikeho chiwuva chamalambu avambau, kaha vahakeko myalachi yakumbachila.+
12 Vambate vinoma+ vyosena vyakuzachisa milimo, vize veji kuzachisanga shimbu yosena muchihela chajila, vavivungile halihina lyawanda ulauluka, vavifwike nachiwuva chamalambu avambau, kaha vavihake hamukambo wakumbachila.
13 “Vafumise uto* halijiko lyakulumbila,+ vafwikeho lihina lyaungonyi.
14 Kaha vahakeho vinoma vyalyo vyosena vize veji kuzachisanga hakuzata milimo kulijiko lyakulumbila, vyakufwana nge tumalonga twakukwachila kakahya, najingalafwa, najifwosholo, naviloso, navinoma vyosena vyakulijiko lyakulumbila.+ Vafwikeho chiwuva chamalambu avambau, kaha vahakeko myalachi yakumbachila.+
15 “Omu navakatuka vaka-chilombo, Alone navana venyi vatela kukumisa kufwika vyuma vyachihela chajila+ navinoma vyacho vyosena. Jino vana vaKohate vezenga nakuvikulika,+ oloze kanda vakwata kuvyuma vyachihela chajilako kuchina navafwa.+ Eyi yikiko milimo* yavana vaKohate kupandama kumbalaka yakuliwanyina.
16 “Eleyaza+ mwanakapilishitu Alone ikiye mwalamanga maji akumunyikisa,+ navyuma vyalivumba lyamwaza,+ nawana wamanona, namaji akuwavisa.+ Ikiye ali namulimo wakulama tavanaku yosena navyuma vyosena vize vilimo, hohamwe nachihela chajila navinoma vyacho.”
17 Yehova ambile cheka kuli Mose naAlone ngwenyi:
18 “Kanda namwechelela muyachi wajitanga javaKohate+ vakaunongese muli vaLeviko.
19 Oloze lingenu vyumevi mangana vayoyenga, vazeneke kufwa mwomwo yakupandama kuvyuma vyajila chikuma.+ Alone navana venyi vengilemo mangana vahane mutu himutu milimo yenyi nachiteli chenyi.
20 Vakiko kanda vengila nakutala vyuma vyajilako, chipwe hakapyapya kakandende kaha, kuchina navafwa.”+
21 Yehova ambile jino kuli Mose ngwenyi:
22 “Lava vana vaNgeleshone+ nawa kweseka najizuvo javakakuluka javo, najitanga javo.
23 Usoneke vosena vaze vali namyaka yakusemuka 30 nakutwala ku 50, vaze vatwama mulizavu lize vahana mulimo wakuzachila mumbalaka yakuliwanyina.
24 Eyi yikiko milimo navazatanga vaka-jitanga javaNgeleshone naviteli vize navambatanga.+
25 Vambatenga mahina atavanaku,+ nambalaka yakuliwanyina nachiwuva chayo, nachiwuva chamalambu avambau chize chili helu lyayo,+ nachivamba* chakuchikolo chambalaka yakuliwanyina,+
26 namahina achipango akusukika,+ nachivamba* chakuwingililo wachipango+ chize chajingilika tavanaku nalijiko lyakulumbila, najingoji jakumbalaka, navinoma vyayo vyosena vize veji kuzachisanga milimo. Eyi yikiko milimo yavo.
27 Alone navana venyi vakiko navatalanga milimo yavaNgeleshone+ yosena, naviteli vize navambatanga. Kaha uvahane viteli vyosena vize navambatanga.
28 Eyi yikiko milimo navazatanga vaka-jitanga javaNgeleshone mumbalaka yakuliwanyina.+ Kaha milimo navayitwaminyinanga kuli Itamale+ mwanakapilishitu Alone.
29 “Vana vaMelali+ uvalave kweseka najitanga javo, najizuvo javakakuluka javo.
30 Usoneke vosena vaze vamyaka yakusemuka 30 nakutwala ku 50, vaze vatwama mulizavu lize vahana mulimo wakuzachila mumbalaka yakuliwanyina.
31 Evi vikiko viteli navambatanga+ vyakupandama kumilimo yavo yakumbalaka yakuliwanyina. Navambatanga vipamba+ vyakutavanaku, namyalachi yayo,+ najipanda jayo,+ namanevo jayo,+
32 najipanda+ jajingilika chipango, namanevo+ jajo, najimbambo jambalaka,+ najingoji jajo, hohamwe navyuma vyayo vyosena navyeka vyakupandama kumilimo yavyo. Kaha uvahane mutu himutu vyuma vize mwambatanga.
33 Omu mukiko najizatanga jitanga javana vaMelali+ mumbalaka yakuliwanyina hakuvatwaminyina kuli Itamale mwanakapilishitu Alone.”+
34 Mose naAlone navamyata+ jalizavu vasonekele vana vaKohate+ kweseka najitanga javo, najizuvo javakakuluka javo.
35 Vasonekele vosena vaze vamyaka yakusemuka 30 nakutwala ku 50, vaze vatwama mulizavu lize vahana mulimo wakuzachila mumbalaka yakuliwanyina.+
36 Vosena vaze vasonekele kweseka najitanga javo vapwile 2,750.+
37 Ava vakiko vaze vasonekele kufuma kujitanga javaKohate, vosena vaze vazachilenga mumbalaka yakuliwanyina. Vavasonekele kuli Mose naAlone nge muze Yehova alwezele Mose.+
38 Vana vaNgeleshone+ vavasonekele kweseka najitanga javo, najizuvo javakakuluka javo.
39 Vasonekele vosena vaze vamyaka yakusemuka 30 nakutwala ku 50, vaze vatwama mulizavu lize vahana mulimo wakuzachila mumbalaka yakuliwanyina.
40 Vosena vaze vasonekele kweseka najitanga javo, najizuvo javakakuluka javo vapwile 2,630.+
41 Ava vakiko vaze vasonekele kufuma kujitanga javana vaNgeleshone, vosena vaze vazachilenga mumbalaka yakuliwanyina. Vavasonekele kuli Mose naAlone nge muze ambile Yehova.+
42 Vana vaMelali vavasonekele kweseka najitanga javo, najizuvo javakakuluka javo.
43 Vasonekele vosena vaze vamyaka yakusemuka 30 nakutwala ku 50, vaze vatwama mulizavu lize vahana mulimo wakuzachila mumbalaka yakuliwanyina.+
44 Vosena vaze vasonekele kweseka najitanga javo vapwile 3,200.+
45 Ava vakiko vaze vasonekele kufuma kujitanga javana vaMelali, vaze vasonekele kuli Mose naAlone nge muze Yehova alwezele Mose.+
46 Mose naAlone navamyata javaIsalele vasonekele vaLevi vosena ava, kweseka najitanga javo, najizuvo javakakuluka javo.
47 Vasonekele vosena vaze vamyaka yakusemuka 30 nakutwala ku 50, kaha vavahanyine milimo yakuzata, naviteli vyakumbata vyakupandama kumbalaka yakuliwanyina.+
48 Vosena vaze vasonekele vapwile 8,580.+
49 Vavasonekele nge muze Yehova alwezele Mose, mutu himutu kweseka namulimo wenyi, naviteli mwambatanga. Vavasonekele nge muze Yehova alwezele Mose.
Kwinyikila Chamwishi
^ Chipwe “uto wamaji,” kulumbununa uto uze wazovele namaji avimuna vakuvatula.
^ Hepe., “Echi chikiko chiteli.”
^ Chipwe “nalihina lyakuvatasana.”
^ Chipwe “nalihina lyakuvatasana.”
