Kulava 5:1-31
5 Yehova ambile jino kuli Mose ngwenyi:
2 “Lweza vaIsalele vafumise mutu himutu uze ali nambumba+ muchilombo, nauze ali navimwe vili nakumuhita,+ nauze nawa napihi mwomwo yakukwata mutu* wakufwa.+
3 Vafumisenumo numba vapwa malunga, chipwe mapwevo. Valovolenu kuweluka wachilombo, kuchina navapihisa+ chilombo chavatu jami vaze nguli nakutwama navo.”+
4 VaIsalele valingile vene ngocho, valowele vatu kana kuweluka wachilombo. Valingile nge muze Yehova alwezele Mose.
5 Yehova ambile lika kuli Mose ngwenyi:
6 “Lweza vaIsalele ngwove, ‘Kachi nge lunga chipwe pwevo mwalinga shili veji kulinganga vakwavo vatu, nakuvulumuna kumeso aYehova, kaha mutu* kana ali namulonga.+
7 Atela kulitavila shili yenyi,+ nakuhana fweto yakutesa mumulonga navulumuna. Kaha hafweto kana akahakileho nawa chimbwa chimwe chakusokesa muvimbwa vitanu vyafweto kana.+ Atela kuyihana kuli uze navulumuna.
8 Oloze nge uze vanavulumuna mulonga nafu, kaha nawa keshi nakausoko kenyi wakutambula yize fwetoko, kaha vatela kuyihana kuli Yehova yipwenga yakapilishitu. Vakayihanyine hamwe nachizamba chamukoko wakufwika hashili uze mwakazachisa kapilishitu mangana akafwike hashili yauze navulumuna mulonga.+
9 “‘Wana wajila+ wosena uze navaneha vaIsalele kuli kapilishitu upwenga wenyi.+
10 Kaha vyuma vyajila mwaneha mutu himutu vipwenga vyakapilishitu. Cheshocho chuma mwahana mutu kuli kapilishitu chipwenga chakapilishitu.’”
11 Yehova ahanjikile cheka kuli Mose ngwenyi:
12 “Hanjika kuli vaIsalele ngwove, ‘Omu mukiko namulinganga kachi nge pwevo lyamutu napyapumuka nakuhona kushishika kuli lunga lyenyi,
13 kaha himwalisavala nalunga weka nakulipihisa jino ivene,+ oku nawa lunga lyenyi katachikijile chuma kanako, kaha nawa chichili lika chakusweka. Shikaho nge kakweshi chinjiho wakumupayisako, kaha nawa kavamukwachileko,
14 oloze lunga lyenyi namwivwila lisungu hakumushinganyekela ngwenyi kashishikileko, numba pwevo lyenyi nalipihisa chipwe chiku,
15 uze lunga akatwale pwevo lyenyi kuli kapilishitu. Akatwale nawana wayauze pwevo, kafwe chimbwa chimwe chaunga wambale chakusokesa muvimbwa 10 vyalifwa.* Kanda akahingunwinaho maji chipwe kuhakaho lavonako, mwomwo unapu wana wamanona walisungu, wakwanukilaho mulonga.
16 “‘Kaha kapilishitu akambate uze pwevo nakumwimika kumeso aYehova.+
17 Kapilishitu akambate meya ajila muchitenga chauma, akambate nawa mavu amutavanaku nakuwahaka muze mumeya.
18 Kapilishitu akemike uze pwevo kumeso aYehova, akasangunune jikambu jakumutwe wayauze pwevo. Kaha akambate uze wana wamanona wakwanukilaho mulonga, wana wamanona walisungu,+ akauhake mumavoko ayauze pwevo. Kaha kapilishitu akapwe nameya akwangwisa amasasu mulivoko lyenyi.+
19 “‘Kapilishitu akamushingise uze pwevo, akambe kuli ikiye ngwenyi: “Kachi nge kakweshi lunga weka alisavalanga nayove shimbu uli kuli lunga lyove,+ kaha kawapyapumukile nakulipihisako, usambe kumeya awa akwangwisa amasasu.
20 Oloze kachi nge unapyapumuka nakulipihisa ove ivene, nakulisavala nalunga weka+ shimbu uli kuli lunga lyove—”
21 Kapilishitu akamushingise uze pwevo lushingo lwakulyangwisa. Akambe kuli uze pwevo ngwenyi: “Yehova akulingise kupwa uwakulyangwilaho, uwakulishingilaho kuli vakwenu vatu omu Yehova mwakahovakana* jitungi* jove, nakujimbisa nawa lijimo lyove.
22 Meya awa akwangwisa nawengila mumijingwa yove mangana ajimbise lijimo lyove nakuhovakana* jitungi* jove.” Kaha uze pwevo akambe ngwenyi: “Amene, Amene.”*
23 “‘Uze kapilishitu akasoneke vyangu evi mumukanda, akavijimbangane nameya aze amasasu.
24 Kaha akamunwise uze pwevo meya akwangwisa amasasu. Aze meya akwangwisa nawakamwingila mujimo nakumwivwisa kukola.
25 Kapilishitu akatambule uze wana wamanona walisungu+ kumavoko ayauze pwevo, akauhungise kumeso aYehova, kaha akaunehe kwakamwihi nalijiko lyakulumbila.
26 Kapilishitu akatapuleho livoko lyato lyawana wamanona kupwa wana wakwanukilaho mulonga, kaha akaulumbe halijiko lyakulumbila.+ Kufumaho akamunwise pwevo aze meya.
27 Kachi nge alipihisanga nakuhona kushishika kuli lunga lyenyi, kahomu mwakamunwisa aze meya akwangwisa, nawakamwingila mujimo nakumwivwisa kukola. Lijimo lyenyi nalikajimba, kaha jitungi* jenyi najikalihovakana,* ngocho mwakapwa wakulyangwilaho kuli vakwavo vatu.
28 Oloze nge uze pwevo kalipihishileko, nge natomo, kaha nasambe. Ngocho mwakemitanga nakusema vana.
29 “‘Elu lukiko lushimbi lwalisungu+ nge pwevo mwapyapumuka nakulipihisa ivene shimbu ali kuli lunga lyenyi,
30 chipwe nge lunga mwevwila pwevo lyenyi lisungu nakumushinganyekela ngwenyi kashishikileko. Lunga akemike pwevo lyenyi kumeso aYehova, kaha kapilishitu akalinge mwaya lushimbi kanelu kuli uze pwevo.
31 Uze lunga keshi kukapwa namulongako, oloze pwevo lyenyi navakamuzangamisa hamulonga navulumuna.’”
Kwinyikila Chamwishi
^ Chipwe “mwono.” Tala Mukana waMazu.
^ Chipwe “mwono.”
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Chipwe “mwakomisa.” Echi chinahase kulumbununa kusoka lusemo.
^ Kafwe kutalisa kuusonyi wamutu.
^ Chipwe “nakumisa.” Echi chinahase kulumbununa kusoka lusemo.
^ Kafwe kutalisa kuusonyi wamutu.
^ Chipwe “Chipwenga vene ngocho, Chipwenga vene ngocho.”
^ Kafwe kutalisa kuusonyi wamutu.
^ Chipwe “najikoma.” Echi chinahase kulumbununa kusoka lusemo.
