Kulava 6:1-27
6 Yehova ambile cheka kuli Mose ngwenyi:
2 “Hanjika kuli vaIsalele ngwove, ‘Kachi nge lunga chipwe pwevo nalishiki lushiko lwakulipwila lwakupwa Najili*+ kuli Yehova,
3 kaha kanda akanwa vinyo nawala wekako. Kanda akanwa vinangele* vyakuvinyo, chipwe vinangele vyakuwala weka,+ chipwe mwemwe wakumihako yamivinyo, chipwe kulya mihako yamivinyo yituta chipwe yaumuko.
4 Makumbi osena auNajili wenyi, kanda akalya chuma numba chimwe chakumuvinyo, chipwe muhako wamuvinyo wauvisu chipwe vene viyau vyawoko.
5 “‘Makumbi osena alushiko lwenyi lwauNajili, yembe kanda nayikahita kumutwe wenyiko.+ Akapwenga lika wajila hakulama jikambu jakumutwe wenyi palanga nomu nawakakuma makumbi enyi akulihana kuli Yehova.
6 Kaha makumbi osena aze nalihane kuli Yehova, kanda mwakapandama kumutu* wakufwako.
7 Kanda akalipihisa iveneko numba nge uze nafu napu ise, chipwe naye, chipwe ndumbwenyi walunga chipwe wapwevo,+ mwomwo chinjikizo chenyi chakupwa Najili kuli Kalunga kenyi chichili kumutwe wenyi.
8 “‘Akapwenga lika wajila kuli Yehova hamakumbi osena auNajili wenyi.
9 Oloze kachi nge mutu mwafwila kwakamwihi naikiye mukukasumuna,+ kaha himwamukwata nakupihisa jikambu jachinjikizo chakulihana chenyi kuli Kalunga,* akateule jikambu jakumutwe wenyi+ halikumbi lyakumutomesa. Akajiteule halikumbi lyakusokesa 7.
10 Kaha halikumbi lyakusokesa 8 akatwale tutela vavali, chipwe vana vatukwilimba vavali kuli kapilishitu, kuchikolo chambalaka yakuliwanyina.
11 Kapilishitu akambateho umwe akamuhane kupwa wana wahashili, kaha mukwavo kupwa wana wakulumba, mangana akamulingile chakufwika hashili+ yenyi nalingi hakukwata mutu* wakufwa. Kufumaho akalijilike kumutwe wenyi halikumbi lize.
12 Kaha akalihane cheka kuli Yehova nakuputuka makumbi enyi auNajili. Akatwale chizamba chamwanamukoko wamwaka umwe kupwa wana wahamulonga wenyi. Oloze makumbi aze akulivanga kaveshi kukawalavako, mwomwo apihishile uNajili wenyi.
13 “‘Elu lukiko lushimbi lwaNajili: Nge makumbi enyi auNajili anakumu,+ kaha vakamutwale kuchikolo chambalaka yakuliwanyina.
14 Akahane wana kuli Yehova. Akahane chizamba chamwanamukoko walambwe wamwaka umwe kupwa wana wakulumba,+ namukoko wachihwevo walambwe wamwaka umwe kupwa wana wahashili,+ nachizamba chamukoko walambwe kupwa wana wakusolola kuunda,+
15 namutonga wajimbolo jakuzeneka chimbalwila jamujingulule jili nawina hakachi jakuchingasana namaji, najimbolo jajilelu chikuma jakuzeneka chimbalwila jakukwita maji, hohamwe nawana wamanona,+ nawana wavinyo.+
16 Kapilishitu akavinehe kumeso aYehova, akahane wana wahashili, nawana wakulumba wayauze kaNajili.
17 Akahane nawa chizamba chamukoko kuli Yehova kupwa wana wakusolola kuunda, hohamwe namutonga wajimbolo jakuzeneka chimbalwila, nawana wamanona,+ nawana wavinyo.
18 “‘Uze kaNajili akateule jikambu jakumutwe wenyi*+ kuchikolo chambalaka yakuliwanyina, kaha akambate jize jikambu jakumutwe wenyi nalame hamakumbi auNajili wenyi, akajihake hakakahya kali mwishi yawana wakusolola kuunda.
19 Kaha kapilishitu akambate livoko lyauze chizamba chamukoko lyakuteleka,+ akambate nawa mbolo yimwe yakuzeneka chimbalwila yamujingulule yili nawina hakachi mumutonga, nambolo yimwe yayilelu chikuma yakuzeneka chimbalwila, akavihake mumavoko ayauze kaNajili omu mwakakumisa kuteula jikambu jachinjikizo chauNajili wenyi.
20 Uze kapilishitu akavihungise kupwa wana wakuhungisa kumeso aYehova.+ Vyuma kana hohamwe napambo yawana wakuhungisa nalihinji vanahane kupwa wana vinapu vyajila vyakapilishitu.+ Kufumaho uze Najili nahase kunwa jino vinyo.
21 “‘Elu lukiko lushimbi lwaNajili+ uze mwalishika lushiko: Kachi nge mwalishika lushiko lwakuhana wana kuli Yehova wakuzomboka museteko atela kuhana, kaha akatesemo lushiko lwenyi nge mwaya lushimbi lwauNajili wenyi.’”
22 Jino Yehova ambile kuli Mose ngwenyi:
23 “Lweza Alone navana venyi ngwove, ‘Omu mukiko namukisulanga+ vaIsalele ngwenu:
24 “Yehova amikisule+ nakumilama.
25 Yehova amivwile kuwaha+ nakumitetela.
26 Yehova amisolwele likoji nakumihana kuunda.”’+
27 Kaha Alone navana venyi vavulukilenga vaIsalele+ lijina lyami, mangana nguvakisulenga.”+
Kwinyikila Chamwishi
^ Hilizu lyachiHepeleu, kulumbununa “Mutu Uze Vasakula; Mutu Uze Alihana; Mutu Uze Alihandula.”
^ Vinangele vyapwa vyakunwa vingangamina vize vyafuminenga kuvinyo vyavisasu chipwe kuwala weka.
^ Chipwe “kumwono.” Tala Mukana waMazu.
^ Chipwe “nakupihisa mutwe wauNajili wenyi.”
^ Chipwe “mwono.” Tala Mukana waMazu.
^ Chipwe “akateule kumutwe wauNajili wenyi.”
