Kulava 8:1-26
8 Yehova ambile kuli Mose ngwenyi:
2 “Hanjika kuli Alone ngwove, ‘Omu nauwikanga manongo 7 aze ali kuchitumbikilo, atela kumunyikanga kulutwe lwachitumbikilo kana.’”+
3 Ngocho Alone alingile vene ngocho. Awikile aze manongo mangana amunyike kulutwe lwachize chitumbikilo chamanongo,+ nge muze Yehova alwezele Mose.
4 Chitumbikilo chamanongo vachitengele ngana: Chapwile chaulu chakufula,+ kufumisa kumukota nakuheta kujitemo jacho. Vachitengele kweseka nomu Yehova alwezele Mose muchakumumwenesa.+
5 Yehova ambile cheka kuli Mose ngwenyi:
6 “Mbata vaLevi muli vaIsalele uvatomese.+
7 Uvatomese ngana: Uvasapwile meya akuvatomesa kushili, valiteule nayembe mujimba wosena, kaha vakose uvwalo wavo, valitomese.+
8 Kufumaho vambate mwanangombe,+ hohamwe nawana wamanona+ waunga wamwaza wakuchingasana namaji, kahove nawa umbate mwanangombe mukwavo kupwa wana wahashili.+
9 Kaha unehe vaLevi kumbalaka yakuliwanyina, nakukungulula lizavu lyavaIsalele lyosena.+
10 Omu nauhana vaLevi kumeso aYehova, vaIsalele vanangike mavoko avo hali vaLevi.+
11 Alone ahane vaLevi kuli Yehova kupwa wana wakuhungisa+ wakufuma muli vaIsalele. Kaha vazatenga mulimo waYehova.+
12 “Jino vaLevi vanangike mavoko avo hamitwe yavaze vangombe.+ Uhane Yehova ngombe umwe kupwa wana wahashili, kaha mukwavo kupwa wana wakulumba, nakulinga chakufwika hashili+ yavaLevi.
13 Kaha wimike vaLevi kumeso aAlone navana venyi, uvahane kuli Yehova kupwa wana wakuhungisa.
14 Uhandunune vaLevi muli vaIsalele, mangana vaLevi vapwenga vami.+
15 Kufumaho vaLevi navengilanga mumbalaka yakuliwanyina nakuzachilangamo. Omu mukiko nauvatomesa nakuvahana kupwa wana wakuhungisa.
16 Mwomwo vaLevi vananguhanevo kupwa wana kufuma muli vaIsalele. Nanguvambata kupwa vami vashise muli vatwatwa vosena* vavaIsalele.+
17 Mwomwo vatwatwa vosena vamuli vaIsalele vanapu vami, navatu natunyama.+ Halikumbi lize ngwajihile vatwatwa vosena mulifuchi lyaEjipitu,+ vaIsalele ngwalisakwililevo vapwenga vajila.
18 Nangumbata jino vaLevi vashise muli vatwatwa vosena vavaIsalele.
19 Nanguhana vaLevi kuli Alone navana venyi kupwa wana kufuma muli vaIsalele, mangana vazachilenga vaIsalele mumbalaka yakuliwanyina,+ nakulingilanga nawa vaIsalele chakufwika hashili kuchina lupi nalukawana vaIsalele+ nge navapandama kuchihela chajila.”
20 Mose naAlone nalizavu lyavaIsalele lyosena valingile vyumevi kuli vaLevi. Mwosenomu Yehova alwezele Mose alinge kuli vaLevi, mukiko valingile vaIsalele.
21 Ngocho vaLevi valitomesele, vakosele uvwalo wavo,+ kaha Alone avahanyine kumeso aYehova+ kupwa wana wakuhungisa. Kufumaho Alone avalingilile chakufwika hashili yavo mangana avatomese.+
22 VaLevi vengilile jino mumbalaka yakuliwanyina vazate milimo yavo kumeso aAlone navana venyi. Mwosenomu Yehova alwezele Mose alinge kuli vaLevi, mukiko valingile vaIsalele.
23 Jino Yehova ahanjikile kuli Mose ngwenyi:
24 “Omu mukiko nachipwanga kuli vaLevi: Vaze vali namyaka yakusemuka 25 nakuya kwilu navengilanga halizavu lyavakwavo nakuzachila hamwe mumbalaka yakuliwanyina.
25 Oloze omu navaheta myaka yakusemuka 50, vakafume halizavu kana, vakalitwamine kuzata milimo.
26 Vanahase kuzachila vandumbwavo vaze vali nakuzata milimo mumbalaka yakuliwanyina, oloze kavatela kuzata milimo yivene muzeko. Omu mukiko naulinga kuli vaLevi namilimo yavo.”+
Kwinyikila Chamwishi
^ Hepe., “vatwatwa vosena vakusokolola mumajimo.”
