Kulava 9:1-23
9 Yehova ahanjikile kuli Mose mupambo yaShinai mukakweji wakulivanga,+ mumwaka wamuchivali kufuma haze valovokele mulifuchi lyaEjipitu ngwenyi:
2 “VaIsalele vakawahise chimuna wakuvatula waPaseka+ halwola vatongola.+
3 Mukamuwahise halwola vatongola, halikumbi lyakusokesa 14 mukakweji ou, hakajimbavenyi. Mukamuwahise kweseka nomu mwaya jishimbi najindongi.”+
4 Ngocho Mose alwezele vaIsalele vawahise chimuna wakuvatula waPaseka.
5 Kaha vawahishile chimuna wakuvatula waPaseka mukakweji wakulivanga, halikumbi lyakusokesa 14, hakajimbavenyi mupambo yaShinai. VaIsalele valingile mwosena muze Yehova alwezele Mose.
6 Jino kwapwile malunga vamwe vaze valipihishile hakukwata mujimba wamufu,+ kaha kavahashile kuwahisa chimuna wakuvatula waPaseka halikumbi lizeko. Ngocho vayile kuli Mose naAlone.+
7 Vambile ngwavo: “Tunapihi mwomwo tunakwate mujimba wamufu. Chipwe ngocho, ika navatukanyishila kuhana wana kuli Yehova muli vaIsalele halwola vatongola?”+
8 Mose ambile kuli vakiko ngwenyi: “Vandaminenu, ngwivwenga omu mwangulweza Yehova hali enu.”+
9 Jino Yehova ahanjikile kuli Mose ngwenyi:
10 “Lweza vaIsalele ngwove, ‘Kachi nge mutu umwe muli enu chipwe muchisemunwino chenu chakulutwe mwalipihisa ivene hakukwata mujimba wamufu,+ chipwe nge mwaya ungeji, naikiye nawa akawahise chimuna wakuvatula waPaseka wakuhana kuli Yehova.
11 Vakawahise chimuna kana mukakweji wamuchivali,+ halikumbi lyakusokesa 14 hakajimbavenyi. Vakamulye nambolo yakuzeneka chimbalwila namafwo amasasu.+
12 Kanda vakaseza nyama yimwe yikatwame palanga nakuchimeneko,+ kaha nawa kanda vakahokola chifuwa chenyi numba chimweko.+ Vakamuwahise kweseka najishimbi jaPaseka.
13 Oloze kachi nge mutu umwe kalipihishile iveneko, chipwe kayile ungejiko, kaha mwahona kuwahisa chimuna wakuvatula waPaseka, mutu* kana vakamujihe,+ mwomwo kahanyine wana kuli Yehova halwola vatongolako. Mutu kana navakamuzangamisa hashili yenyi.
14 “‘Kaha nawa nge muli enu muli mwiza, naikiye akawahise chimuna wakuvatula waPaseka wakuhana kuli Yehova.+ Akamuwahise kweseka najishimbi jaPaseka najindongi jayo.+ Kuli enu vakusemukila mulifuchi, nakuli vamwiza kupwenga lushimbi lumwe kaha.’”+
15 Halikumbi lize vatungile tavanaku,+ livwi lyafwikile tavanaku, mbalaka yaUnjiho. Kaha helu lyatavanaku hapwilenga chuma chize chasolokele nge kakahya kufuma hakajimbavenyi swi nakuchimene.+
16 Omu mukiko chapwilenga makumbi osena: Namusana livwi lyafwikilenga tavanaku, kaha naufuku hapwilenga chuma chize chasolokelenga nge kakahya.+
17 Omu livwi lyakatukilenga hambalaka, vaIsalele navakiko vakatukilenga hahaze vene nakuya.+ Kaha heshoho lyatulililenga livwi, hakiko vaIsalele vatungililenga chilombo chavo.+
18 VaIsalele vakatukilenga nakuya omu Yehova avalwezelenga ngwenyi vakatuke, kaha vatungilenga nawa chilombo omu Yehova avalwezelenga ngwenyi vatunge.+ Omu livwi lyazenekelenga kukatuka hatavanaku, vaIsalele vatwaminenga lika muchilombo.
19 Omu livwi lyatwaminenga hatavanaku makumbi amavulu, vaIsalele vononokelenga Yehova, kaha kavakatukilengako.+
20 Shimbu jimwe lize livwi lyatwaminenga hatavanaku makumbi amandende. VaIsalele vatungilenga chilombo omu Yehova avalwezelenga ngwenyi vatunge, kaha vakatukilenga nawa nakuya omu Yehova avalwezelenga ngwenyi vakatuke.
21 Shimbu jimwe lize livwi lyatwaminenga hatavanaku kufuma hakajimbavenyi palanga nakuchimene kaha. Nge livwi linakatuka nachimene, navakiko vakatukilenga nakuya. Numba livwi likatuka namusana chipwe naufuku, vakatukilenga nakuya.+
22 Numba litwama hatavanaku makumbi avali, chipwe kakweji, chipwe tando yayisuku, vaIsalele vatwaminenga lika muchilombo, kavakatukilenga nakuyako. Oloze nge linakatuka, kaha navakiko vakatukilenga nakuya.
23 VaIsalele vatungilenga chilombo omu Yehova avalwezelenga ngwenyi vatunge, kaha vakatukilenga nakuya omu Yehova avalwezelenga ngwenyi vakatuke. Vononokelenga mumazu aYehova aze avalwezele Yehova kuhichila muli Mose.
Kwinyikila Chamwishi
^ Chipwe “mwono.”
