Kulovoka 1:1-22
1 Yakova uze vavuluka nawa ngwavo Isalele ayile kuEjipitu. Ayile hamwe navana venyi vamalunga najitanga javo. Kaha awa akiko majina avana vaYakova vamalunga:+
2 Luvene, naShimeyone, naLevi, naYuta,+
3 naIsakale, naZevulune, naMbenjamine,
4 naNdane, naNafwatale, naNgate naAshele.+
5 Halwola kana Yosefwe apwile muEjipitu.+ Vosena* vaze vasemukile kutanga yaYakova* vapwile 70.
6 Kutwala muze, Yosefwe navandumbwenyi vosena vafwile+ navatu vosena vamuchisemunwino chize.
7 Oloze vaIsalele* vaze vasemukile muchisemunwino chize vasemunwinyine nakuvula chikuma. Kaha vavulilenga lika nakukwata ngolo, ngocho vazalishile lifuchi lyosena.+
8 Jino muEjipitu mwaswanyine mwangana wamuhya uze katachikijile Yosefweko.
9 Ngocho ambile kuli vatu jenyi ngwenyi: “Talenu! VaIsalele vanavulu chikuma nakukwata ngolo kutuhambakana etu.+
10 Tuvakwachilenu mangana, nge chiku navavulilako lika. Kaha nge nakwepuka jita navalinunga navaka-kole jetu hamwe nakutuzungisa, kufumaho hinavachina nakuseza lifuchi lino.”
11 Ngocho vaEjipitu vatongwele tupitau vakutala milimo yaundungo* mangana vahane vaIsalele milimo yayikalu.+ Kaha vaIsalele vatungilile Fwalo jinganda jakulamina vyuma jize vavulukilenga ngwavo Pitome naLamesese.+
12 Oloze omu vavayanjishilenga chikuma, hakiko jino vaswezele kuvulilako nakuzalisa lifuchi lyosena. Ngocho vaEjipitu valizuzukilile nawoma mwomwo yavaIsalele.+
13 VaEjipitu vaputukile kuyanjisa chikuma vaIsalele.+
14 Vakaluhwishile chiyoyelo chavo hakuvazachisa milimo yakuchika ndaka nakufwatula tumenga namilimo yeka yamumande. Vavayanjishilenga chikuma chakuzeneka kuvatetela.+
15 Kutwala muze, mwangana waEjipitu ahanjikile kuli Shifwala naPuwa vaze vapwile vifungiji vavaHepeleu.
16 Avalwezele ngwenyi: “Omu namusapulwisa mapwevo vavaHepeleu,+ nge nakusemuka mwana walunga, kaha mumujihe, oloze nge nakusemuka mwana wapwevo kanda kumujihako.”
17 Vaze vifungiji vevwile woma Kalunga wamuchano, kaha kavalingile muze avalwezele mwangana waEjipituko. Vechelenga vana vamalunga vayoye.+
18 Jino mwangana waEjipitu asanyikile vaze vifungiji nakuvahulisa ngwenyi: “Mwomwo ika munahonena kujiha vana vamalunga?”
19 Vaze vifungiji vakumbulwile Fwalo ngwavo: “Mapwevo vavaHepeleu kavapwa ngana mwamapwevo vavaEjipituko. Vapwa vakujikiza, ngocho vali nakusapulukanga shimbu kanda vifungiji vezenga.”
20 Kalunga evwilile kuwaha vaze vifungiji nakulingisa vaIsalele vavule chikuma nakukwata ngolo.
21 Hakuwana nge vaze vifungiji vevwile woma Kalunga wamuchano, ngocho avakiswile vapwenga najitanga.
22 Jino Fwalo alwezele vatu jenyi vosena ngwenyi: “Vakemba vavaHepeleu vamalunga vosena vaze vanasemuka muvambile muKalwiji Nyile, oloze vana vamapwevo vosena muveche vayoye.”+
Kwinyikila Chamwishi
^ Chipwe “Myono yosena.”
^ Hepe., “vaze vafumine kutungi yaYakova.”
^ Hepe., “vana vaIsalele.”
^ Chipwe “vatongwele vakulwane vamilimo.”
