Kulovoka 10:1-29
10 Yehova ambile kuli Mose ngwenyi: “Yako kuli Fwalo mwomwo ngunamwechelela hohamwe navangamba jenyi vakaluhwise michima yavo+ mangana ngusolole vinjikizo vyami kuli ikiye.+
2 Ngunalingi chuma kana mangana mukalweze nawa vana venu, navazukulu jenu kuzangamisa ngunazangamisa vaEjipitu, navinjikizo ngunalingi kuli vakiko.+ Kaha namukatachikiza ngwenu ami yami Yehova.”
3 Ngocho Mose naAlone vayile kuli Fwalo nakumulweza ngwavo: “Yehova Kalunga kavaHepeleu nambe ngwenyi, ‘Uno naukana kungwononoka palanga nakumwaka uka?+ Suula vatu jami mangana vayenga vakanguzachile.
4 Oloze nge naukana lika kusuula vatu jami, kaha hamene nangukaneha vambimba mulifuchi lyove.
5 Navakazala hamavu hosena, ngocho kakweshi mutu mwakahasa kumona hamavuko. Navakalya vyuma vyenu vyakusoka hamavu vyosena vize vyasalileho omu yanokele vula yamalolwa, kaha navakalya nawa mitondo yenu yosena yamuchipapa.+
6 Navakazala mujizuvo jove, namujizuvo javangamba jove josena, namujizuvo javaEjipitu josena. Vakakuluka jove* navakaka jove vaze vanatwamenga mulifuchi lino kanda vachimonengaho lyehi kuvula chavambimba kanako.’”+ Kaha Mose afumine kuli Fwalo nakuya.
7 Vangamba jaFwalo vambile kuli Fwalo ngwavo: “Ou lunga mwatuyanjisanga* lika palanga nakumwaka uka? Suula ava vatu mangana vayenga vakazachile Yehova Kalunga kavo. Uno kawamwene ngwove lifuchi lyaEjipitu lili nakulyenyekako tahi?”
8 Ngocho vaMose naAlone vavanehele cheka kuli Fwalo, kaha Fwalo avalwezele ngwenyi: “Yenu mukazachile Yehova Kalunga kenu. Olozenyi veya navaya?”
9 Mose ambile ngwenyi: “Natuya navanyike, navakulwane, navana vetu vamalunga navava vamapwevo, namikoko jetu, navangombe jetu+ mwomwo natukalingila Yehova+ chiwanyino.”
10 Jino ikiye avambile ngwenyi: “Kachi nge nangumisuula muyenga navana venu, kaha chikupu vene Yehova ali nayenu.+ Chinasoloka hatoma nge muli nakujina kulinga vyuma vyavipi.
11 Nduma. Vakulwane vamalunga kaha vakiko navaya vakazachile Yehova, mwomwo omu mukiko mwasakanga.” Ngocho vaMose naAlone vavafumishile kumeso aFwalo.
12 Yehova ambile jino kuli Mose ngwenyi: “Olola livoko lyove halifuchi lyaEjipitu mangana vambimba vezenga mulifuchi lyaEjipitu nakulya vyuma vyakusoka hamavu vyosena, navyosena vize vyasalileko omu yanokele vula yamalolwa.”
13 Hahaze vene Mose olwele mbwechi yenyi halifuchi lyaEjipitu, kaha Yehova ahuhwishile peho yakumututuko mulifuchi musana wosena naufuku wosena. Kaha lichako nachimene peho yakumututuko yahuhwile nakuneha vambimba.
14 Ngocho vambimba vejile mulifuchi lyaEjipitu lyosena nakuzalisa Ejipitu yosena.+ Vavulile nyi kuya muze.+ Vambimba kana kanda vachisolokengaho lyehi, kaha nawa kaveshi kukasoloka chekako.
15 Vazalile hamavu hosena, kaha lifuchi lyosena lyelavile wi navambimba. Valile vyuma vyakusoka hamavu vyosena vyamulifuchi lize, namihako yosena yakumitondo yize yasalileho omu yanokele vula yamalolwa. Kumitondo kakwasalile mafwoko, kaha mwila wamulifuchi lyaEjipitu wosena vaulile.
16 Jino Fwalo asanyikile Mose naAlone nakuvalweza ngwenyi: “Ngunalingi shili kuli Yehova Kalunga kenu nakuli enu.
17 Shikaho, ngukonekelenu shili yami aka vene kamakumishilo. Lembelelenu Yehova Kalunga kenu mangana afumise echi chipupu kuli ami.”
18 Ngocho afumine* kuli Fwalo nakuya nakulembelela Yehova.+
19 Yehova alumwine yize peho yihuhwe nangolo kufuminyina nawa kumulauko. Kaha yapekumwine vambimba nakuvambila muKalungalwiji Uchila. Kakwasalile mbimba numba umweko mulifuchi lyaEjipitu lyosena.
20 Oloze Yehova echelele Fwalo akaluhwise lika muchima wenyi,+ kaha kasuwile vaIsalele vayengako.
21 Yehova ambile jino kuli Mose ngwenyi: “Olola livoko lyove mwilu mangana mulifuchi lyaEjipitu mupwenga milima chikuma.”
22 Hahaze vene, Mose olwele livoko lyenyi mwilu, kaha mulifuchi lyaEjipitu mwosena mwapwile milima chikuma hamakumbi atatu.+
23 Kakwapwile mutu amwenenga mukwavoko, kaha hamakumbi aze atatu kakwapwile numba umwe ahashile kukatuka muchihela apwileko. Oloze kuze vapwilenga vaIsalele kakwapwile milimako.+
24 Jino Fwalo asanyikile Mose nakumulweza ngwenyi: “Yenu mukazachile Yehova.+ Oloze mikoko jenu navangombe jenu navasala. Vana venunyi munahase kuya navo tuhu.”
25 Oloze Mose ambile ngwenyi: “Tuhane* navimuna vaze natukahana kupwa vimuna vakuvatula namawana akulumba kuli Yehova Kalunga ketu.+
26 Navimuna jetu natuya navo. Kakweshi chimuna* numba umwe mwasalako, mwomwo vimuna vamwe natukavazachisa hakulemesa Yehova Kalunga ketu, kaha katwatachikijile vimuna muka natukahana kuli Yehova hakumulemesako kuvanga nge tunahete lyehi kuze.”
27 Oloze Yehova echelele Fwalo akaluhwise lika muchima wenyi, kaha ketavishile vaIsalele vayengako.+
28 Ngocho Fwalo ambile kuli Mose ngwenyi: “Fuma kuli ami. Kanda ukeza cheka kuli amiko, mwomwo halikumbi lize naukeza kuli ami naukafwa.”
29 Mose ambile ngwenyi: “Kangweshi kukeza cheka kuli oveko, nganomu vene unahanjika.”
Kwinyikila Chamwishi
^ Hepe., “Vaiso.”
^ Hepe., “mwapwanga muheto kuli etu.”
^ Pamo Mose.
^ Chipwe “Twitavise tupwenga.”
^ Hepe., “lusende.”
