Kulovoka 11:1-10
11 Yehova ambile jino kuli Mose ngwenyi: “Kunasale chipupu chimwe kaha chize nanguneha kuli Fwalo namulifuchi lyaEjipitu. Kufumaho Fwalo mwakamisuula mukaye.+ Jino omu mwakamisuula, mwakamihanga.+
2 Shikaho lweza vatu, malunga namapwevo vosena valombe vyuma vyapalata, navyevi vyaulu kuli vakwavo muvatungila.”+
3 Yehova alingishile vaEjipitu vevwile vaIsalele uselewa. Kaha nawa vangamba jaFwalo navatu vamulifuchi lyaEjipitu vamwene Mose kupwa wamulemu chikuma.
4 Jino Mose ambile ngwenyi: “Yehova nambe ngwenyi, ‘Mukachi kaufuku nangwingila muEjipitu,+
5 kaha mwana himwana watwatwa mwafwa,+ kuputukila vene kuli twatwa yaFwalo uze ali hawangana nakuheta kuli twatwa yangamba wapwevo uze ali nakuzachila kulilolwa lyakuchekesa unga. Navatwatwa vavimuna vosena navafwa.+
6 Mulifuchi lyaEjipitu lyosena namupwa miteto yayinene yize kanda yichipwengamo lyehi, kaha nawa kayeshi kukapwamo chekako.+
7 Oloze kakweshi kukapwa kawa mwakawoza* vaIsaleleko, chipwe kuwoza vimuna javoko, mangana mukatachikize ngwenu Yehova nahase kusolola chihandwa mukachi kavaEjipitu navaIsalele.’+
8 Vangamba jove vosena navakeza kuli ami nakulifukula nakwamba ngwavo, ‘Yako navatu vosena vaze vali nakukukavangiza.’+ Kufumaho nangukaya.” Kaha Mose afumine kuli Fwalo oku napihilila.
9 Jino Yehova ambile kuli Mose ngwenyi: “Fwalo keshi kukamivwililako,+ mangana vyuma vyami vyakukomwesa vikavulileko lika mulifuchi lyaEjipitu.”+
10 Mose naAlone valingile vyuma vyosenevi vyakukomwesa kuli Fwalo,+ oloze Yehova echelele Fwalo akaluhwise lika muchima wenyi, ngocho kasuwile vaIsalele vafume mulifuchi lyenyiko.+
Kwinyikila Chamwishi
^ Hepe., “mwakahotola lilimi lyenyi kuli.”
