Kulovoka 12:1-51
12 Yehova ambile jino kuli Mose naAlone mulifuchi lyaEjipitu ngwenyi:
2 “Kakweji uno mwapwa kakweji wakulivanga kuli enu kutukweji vamumwaka.+
3 Hanjikenu kulizavu lyavaIsalele lyosena ngwenu, ‘Halikumbi lyakusokesa 10 mukakweji uno, tanga hitanga yakufuma kuli kakuluka umwe yikanehe mukoko umwe.+
4 Oloze nge tanga yinapu yayindende kulya uze mukoko, kaha tanga kana yikalipangile navakwavo valihata navo kweseka nakuvula chavatu.* Hakulipangila mukoko kana, mukamone chazano mwakalya mutu himutu.
5 Chimuna kana akapwe chizamba walambwe,+ wamwaka umwe. Mukanehe mwanamukoko chipwe mwanapembe.
6 Mukamulame palanga nakulikumbi lyakusokesa 14 lyakakweji kana,+ kaha tanga hitanga mulizavu lyavaIsalele lyosena yikajihe chimuna kana hakajimbavenyi.*+
7 Mukambate manyinga ayauze chimuna, mukawasapwile havipamba vyakujihachi nahavipamba vyahelu lyavikolo vyajizuvo jize namulila yize nyama.+
8 “‘Mukalye yize nyama haufuku vene uze.+ Mukayoche hakakahya nakuyilya nambolo yakuzeneka chimbalwila+ namafwo amasasu.+
9 Kanda namukayilya yauvisu chipwe yakutelekako, oloze mukayoche hakakahya, namutwe, namikono, navyamujimo.
10 Kanda namukalama yize nyama palanga nakuchimeneko. Yeshoyo nayikasalaho palanga nakuchimene, vakayilumbe hakakahya.+
11 Hakulya yize nyama, mukalikase mihya mujimbunda jenu,* nakuvwala mendelo kuvilyachilo vyenu, nakukwata jimbwechi mumavoko enu. Kaha mukayilye mulumbushi mwomwo hiPaseka yaYehova.
12 Mwomwo haufuku vene uze, nangukahita mulifuchi lyaEjipitu nakujiha vatwatwa vamulifuchi kana vosena, kuputukila vene kuvatu swi nakutunyama.+ Kaha nangukazangamisa tulunga vamuEjipitu vosena.+ Ami yami Yehova.
13 Manyinga nawakapwa hichinjikizo chakutachikijilaho jizuvo jenu, kahomu nangukawamona, nangukazomboka jizuvo jenu. Ngocho chipupu kacheshi kukeza hali enuko omu nangukajiha vaEjipitu.+
14 “‘Likumbi kaneli nalikapwa lyakwanukilangaho kuli enu. Mukalingilanga Yehova chiwanyino halikumbi kana muvisemunwino vyenu vyosena. Mukalingenga chiwanyino kana, kaha elu nalupwanga lushimbi myaka namyaka.
15 Mukalye mbolo yakuzeneka chimbalwila+ hamakumbi 7. Halikumbi lyakulivanga mukafumise chimbalwila mujizuvo jenu mwomwo weshowo mwakalya chimbalwila kana, kufuma kulikumbi lyakulivanga swi nakulikumbi lyakusokesa 7, mutu* kana navakamujiha muli vaIsalele.
16 Halikumbi kaneli lyakulivanga mukapwa nakukunguluka chajila, kaha halikumbi lyakusokesa 7 mukapwa nakukunguluka chajila chikwavo. Kanda namukazata milimo hamakumbi kana awako.+ Milimo namukazata shina yakuwahisa kaha vyuma namukalya.
17 “‘Mukalingenga Chiwanyino chaJimbolo Jakuzeneka Chimbalwila,+ mwomwo halikumbi kana hakiko nangukalovola vatu jenu mulifuchi lyaEjipitu. Kalamenunga likumbi kana muvisemunwino vyenu vyosena kupwa hilushimbi myaka namyaka.
18 Mukakweji wakulivanga, halikumbi lyakusokesa 14 nachingoloshi, mukalyenga jimbolo jakuzeneka chimbalwila swi nakulikumbi lyakusokesa 21 lyakakweji kana nachingoloshi.+
19 Mujizuvo jenu kanda navakawanamo chimbalwila hamakumbi 7 koko, mwomwo weshowo mwakalya vyuma vili nachimbalwila, numba apwa mwiza chipwe wakusemukila mulifuchi,+ mutu* kana navakamujiha muli vaIsalele.+
20 Kanda namukalya vyuma vili nachimbalwilako. Mukalye kaha mbolo yakuzeneka chimbalwila hamembo enu osena.’”
21 Hahaze vene Mose asanyikile vakulwane javaIsalele+ vosena nakuvalweza ngwenyi: “Yenunga mukasakwile jitanga jenu vimuna vavandende* nakuvajiha kupwa vimuna vakuvatula vaPaseka.
22 Mukatupika mukamo wahusope* mumanyinga ali hambashiya nakuwasapwila havipamba vyahelu nahavipamba vyakujihachi vyavikolo. Kanda nakukapwa mutu mwakalovoka hawelukako palanga nakuchimene.
23 Omu Yehova mwakahita nakujiha vaEjipitu, mwakamona manyinga havipamba vyahelu nahavipamba vyakujihachi vyavikolo, kaha Yehova mwakazomboka vikolo kana, keshi kukechelela chipupu* chikengile mujizuvo jenuko.+
24 “Mulamenga chuma kanechi kupwa lushimbi myaka namyaka kuli enu navana venu.+
25 Kahomu namukaheta mulifuchi lize mwakamihana Yehova ngana muze nambe, mukalingenga chilika kanechi.+
26 Omu vana venu navakamihulisa ngwavo, ‘Echi chilika chalumbununa ika?’+
27 Enu mukavalweza ngwenu, ‘Echi hichilika chakuhana chimuna wakuvatula waPaseka kuli Yehova uze azombokele jizuvo javaIsalele mulifuchi lyaEjipitu hakujiha vaEjipitu. Oloze ayowele vatu vamujizuvo jetu.’”
Shikaho, vatu vafukamine hamavu nakulifukula.
28 VaIsalele vayile, valingile nge muze ahanjikile Yehova kuli Mose naAlone.+ Valingile vene ngocho.
29 Jino kuheta mukachi kaufuku, Yehova ajihile vatwatwa vamulifuchi lyaEjipitu vosena,+ kuputukila vene kuli twatwa yaFwalo uze apwile hawangana swi nakuli twatwa yandungo uze apwile mukamenga.* Kaha ajihile navatwatwa vavimuna vosena.+
30 Kahomu Fwalo ahindukile, navangamba jenyi vosena, navaEjipitu veka vosena haufuku uze, vevwile miteto yayinene muli vaEjipitu, mwomwo kakwapwile zuvo numba yimwe yazenekele kupwa namufuko.+
31 Haufuku vene uze, Fwalo asanyikile Mose naAlone+ nakuvalweza ngwenyi: “Katukenu, fumenu muli vatu jami, enu navaIsalele vosena. Yenu mukazachile Yehova, ngana muze munambe.+
32 Mbatenu tuhu namikoko jenu navangombe jenu muyenga navo, nganomu munambe.+ Oloze nayami nawa ngukisulenu.”
33 Shikaho vaEjipitu valwezele vaIsalele vafume washi+ mulifuchi lyavo. Vambile ngwavo, “mwomwo tuvosena natufwa.”+
34 Ngocho vaIsalele vambachile muunga wavo wakuzeneka chimbalwila najindeho* javo jakuchikila mbolo, vavivungilile hauvwalo wavo. Vavimbachilile havifwiji vyavo.
35 VaIsalele valingile vyuma avalwezele Mose, kaha valombele vaEjipitu vyuma vyapalata, navyevi vyaulu, nauvwalo.+
36 Yehova alingishile vaEjipitu vevwile vaIsalele uselewa, kaha vavahanyine vyuma vyosena valombele. Ngocho vaIsalele vatambwile vaEjipitu vyuma vyavivulu.+
37 Jino vaIsalele vafumine kuLamesese+ nakuya kuSukote.+ Malunga vosena vakutambuka hamavu vapwile kafwe 600,000, kufumisako vana.+
38 Kwapwile nawa vatu veka vavavulu*+ vaze vayile navo hamwe, navimuna vavavulu chikuma, mikoko navangombe.
39 Kaha muunga uze vafumine nawo kuEjipitu vawochele jimbolo jamujingulule jakuzeneka chimbalwila. Jimbolo kana japwile jakuzeneka chimbalwila mwomwo muEjipitu vafuminemo washiwashi, ngocho kavapwile nalwola lwakuwahisa kulya chekako.+
40 Myaka yosena yize vatwamine vaIsalele muEjipitu+ yapwile 430.+
41 Halikumbi yakumine eyi myaka 430, mayongomena avatu jaYehova vosena valovokele mulifuchi lyaEjipitu.
42 Ufuku kana naukapwanga wakulingila Yehova chiwanyino mwomwo yakuvalovola mulifuchi lyaEjipitu. Kaha vaIsalele vosena vakalingilenga Yehova chiwanyino haufuku kanou muvisemunwino vyavo vyosena.+
43 Yehova ambile jino kuli Mose naAlone ngwenyi: “Elu lukiko lushimbi lwaPaseka: Muka-lifuchi lyeka kanda akalya Pasekako.+
44 Oloze nge mutu ali nandungo yenyi walunga uze alanjile najimbongo, kaha akamujihane+ numba uze ndungo akalyeko.
45 Mwiza chipwe ngamba wakukamba kanda akalyakoko.
46 Tanga hitanga yikalile yize Paseka muzuvo. Kanda namukalovola nyama yaPaseka hawelukako, kaha nawa kanda kukahokola chifuwa chayoko.+
47 Lizavu lyavaIsalele lyosena likalingenga chilika kanechi.
48 Kachi nge mwiza uze atwama nayenu mwasaka kulingila Yehova chilika chaPaseka, kaha ikiye namalunga vosena vamutanga yenyi vakavajihane numba alinge chilika kana. Ngocho mwapwa jino ngana mwamutu wakusemukila mulifuchi lyenu. Oloze lunga wakuzeneka kujihana kanda akalya Pasekako.+
49 Kuli mutu wakusemukila mulifuchi lyenu nakuli mwiza uze ali nakutwama nayenu kukapwe lushimbi lumwe.”+
50 Ngocho, vaIsalele vosena valingile nge muze Yehova alwezele Mose naAlone. Valingile vene ngocho.
51 Halikumbi vene lize, Yehova alowele vaIsalele namayongomena avo mulifuchi lyaEjipitu.
Kwinyikila Chamwishi
^ Chipwe “chamyono.”
^ Hepe., “mukachi kavingoloshi vivali.”
^ Hepe., “mukalikase hajitungi jenu.”
^ Chipwe “mwono.”
^ Chipwe “mwono.”
^ Kulumbununa, vana vamikoko chipwe vavapembe.
^ Tala Mukana waMazu.
^ Hepe., “kukechelela kunongesa.”
^ Hepe., “apwile muzuvo yalishima.”
^ Chipwe “naviloso.”
^ Kulumbununa, vatu vaze kavapwile vaIsaleleko, kuhakilako navaEjipitu.
