Kulovoka 13:1-22
13 Yehova ahanjikile cheka kuli Mose ngwenyi:
2 “Ngujilikile* vatwatwa vamalunga* vosena muli vaIsalele. Vatwatwa vamalunga vosena vanapu vami, navatu natunyama.”+
3 Mose alwezele jino vatu ngwenyi: “Anukenunga likumbi lino namulovoka muEjipitu+ muzuvo yaundungo, mwomwo Yehova mwamifumisa kuno nalivoko lyenyi lyangolo.+ Shikaho kanda namulya vyuma vili nachimbalwilako.
4 Likumbi lyalelo mukakweji uno waAvive*+ namukatuka nakuya.
5 Kalingenunga echi chilika mukakweji vene uno omu Yehova mwakamingisa mulifuchi lyavaKanane, navaHete, navaAmole, navaHivi, navaYevuse,+ lize alishingile kuhana vakakuluka jenu,+ lifuchi lyakumbwambumuka mavele nauchi.+
6 Kalyenu mbolo yakuzeneka chimbalwila+ hamakumbi 7, jino halikumbi lyakusokesa 7, kalingilenu Yehova chiwanyino.
7 Mukalyenga mbolo yakuzeneka chimbalwila hamakumbi 7,+ kaha kanda navakamiwana navyuma vili nachimbalwilako,+ chipwe kuwana muunga uli nachimbalwila mungalila* yenu yosenako.
8 Halikumbi lize, mutu himutu akalweze mwanenyi ngwenyi, ‘Nguli nakulinga vyuma kanevi mwomwo yavyuma angulingilile Yehova omu ngwalovokele mulifuchi lyaEjipitu.’+
9 Echi chilika nachikapwa nge hichinjikizo vanasoneka hamavoko enu nahajiholo*+ jenu chize nachikamyanukisanga vyuma amilingilile Kalunga, mangana jishimbi jaYehova jipwenga mutunwa twenu, mwomwo Yehova amilowele muEjipitu nalivoko lyenyi lyangolo.
10 Mukalingenga echi chilika mwaka himwaka halwola vatongola.+
11 “Omu Yehova mwakamingisa mulifuchi lyavaKanane lize alishingile kuli enu navakakuluka jenu kumihana,+
12 mukahana Yehova vatwatwa* vavatu vosena, navatwatwa vavimuna vosena vaze muli navo. Malunga vosena, navatu natunyama vanapu vaYehova.+
13 Vimbulu vavatwatwa vosena mukavasokole nakuvashishisa namikoko. Oloze nge kamweshi kukavasokolako, kaha mukavahokole jishingo. Mukasokole nawa vana venu vavatwatwa vamalunga vosena.+
14 “Jino nge kulutwe vana venu navakamihulisa ngwavo, ‘Uno echi chalumbununa ika?’ kaha mukavalweza ngwenu, ‘Yehova atulowele muEjipitu, muzuvo yaundungo,+ nalivoko lyenyi lyangolo.
15 Omu Fwalo akaluhwishile muchima wenyi nakukana kutusuula tuyenga,+ Yehova ajihile vana vavatwatwa vosena mulifuchi lyaEjipitu, kuputukila vene kuvatu swi nakutunyama.+ Shikaho tuli nakuhanyina Yehova vatwatwa vavilunga* vakuvimuna vosena kupwa vimuna vakuvatula, nakusokola nawa vana vetu vavatwatwa vamalunga vosena.’
16 Echi chikapwe nge hichinjikizo vanasoneka hamavoko enu nahajiholo*+ jenu, mwomwo Yehova atulowele nalivoko lyenyi lyangolo muEjipitu.”
17 Omu Fwalo asuwile vaIsalele vayenga, Kalunga kavahichishile jila yakupulasana mulifuchi lyavaFwilishiteko, numba tuhu jila kana yapwile yakavatu. Mwomwo Kalunga ambile ngwenyi: “VaIsalele vanahase kwalumuna vishinganyeka vyavo nakukinduluka kuEjipitu omu navamona jita.”
18 Ngocho Kalunga alingishile vatu vazachise jila yakulikonda yakuhita mupambo kuKalungalwiji Uchila.+ Omu vaIsalele vafumine muEjipitu, vatambukile mumazavu akulongesa kanawa ngana mwamaswalale.
19 Kaha Mose ambachile navifuwa vyaYosefwe mwomwo Yosefwe ashingishile vana vaIsalele ngwenyi: “Mukafumise vifuwa vyami kuno.+ Kalunga mwakamyalakana chikupu.”
20 Ngocho vakatukile kufuma kuSukote, vakasavalilile kuEtame kusembwa yapambo.
21 Yehova avatetekelelenga+ napanda yalivwi namusana, kaha naufuku avatetekelelenga napanda yakakahya, mangana vatambuke musana naufuku.+
22 Yize panda yalivwi kayafuminenga kulutwe lwavo namusanako, kaha naufuku nawa yize panda yakakahya kayafuminenga kulutwe lwavoko.+
Kwinyikila Chamwishi
^ Hepe., “vatwatwa vakusokolola mujimo.”
^ Chipwe “Nguhandwile.”
^ Tala Chihande B15.
^ Hepe., “mujingiza.”
^ Hepe., “namukachi kameso.”
^ Hepe., “weshowo wakusokolola mujimo.”
^ Hepe., “vatwatwa vakusokolola mujimo.”
^ Hepe., “namukachi kameso.”
