Kulovoka 14:1-31
14 Yehova ambile kuli Mose ngwenyi:
2 “Lweza vaIsalele vakinduluke, vatunge chilombo chavo kuPihahilote mukachi kaMingitole nakalungalwiji, kwakulitalasana naMbala-zefwone.+ Mutungile chilombo chenu kukalungalwiji kwakulitalasana naMbala-zefwone.
3 Kaha Fwalo mwahanjika hali vaIsalele ngwenyi, ‘Vali nakulumbwangila mupambo, vanahono kuwana kwakulovokela.’
4 Jino nangwechelela Fwalo akaluhwise muchima wenyi,+ kaha mwahangasana vaIsalele. Ngocho nangusolola upahu wami hakufungulula Fwalo namazavu enyi avaka-jita,+ kaha vaEjipitu navatachikiza ngwavo ami yami Yehova.”+ VaIsalele valingile vene ngocho.
5 Jino mwangana waEjipitu atambwile mujimbu wakwamba ngwavo vaIsalele vanachinyi. Hahaze vene, Fwalo navangamba jenyi valumwine michima yavo+ nakwamba ngwavo: “Ika twalingilangamo tusuule vandungo jetu vaIsalele vayenga?”
6 Ngocho alongesele matemba enyi ajita, nakuya navatu jenyi.+
7 Ambachile matemba akulipwila 600 namatemba eka osena amuEjipitu, kaha litemba hilitemba lyapwile navatu.
8 Yehova echelele Fwalo mwangana waEjipitu akaluhwise muchima wenyi. Ngocho Fwalo ahangasanyine vaIsalele, oloze vakiko kwavo vapwile nakulitambukila namuchima umwe.*+
9 VaEjipitu vahangasanyine vaIsalele,+ kaha matemba aFwalo osena, navaka-kutambukisa tuvalu, namazavu enyi avaka-jita vapwile kwakamwihi nakuwana vaIsalele omu vapwile hachilombo kukalungalwiji, kuPihahilote kwakulitalasana naMbale-zefwone.
10 Omu Fwalo apwile nakuswenya kwakamwihi, vaIsalele vandwile meso avo, kaha vamwene vaEjipitu vali nakuvahangasana. Ngocho vaIsalele vevwile woma nakuputuka kuteta kuli Yehova.+
11 Vambile kuli Mose ngwavo: “MuEjipitu kamweshi jifukako numba utunehe muno mupambo tufwilemo nyi?+ Ikaze unatulingila ngana, utulovole muEjipitu?
12 Omu keshi mukiko twakulwezele omu twapwile muEjipitu ngwetu, ‘Tweche tuzachile vaEjipituko’ tahi? Mwomwo chinawahe etu kuzachila vaEjipitu kuhambakana kufwila muno mupambo.”+
13 Jino Mose ambile kuli vatu ngwenyi: “Kanda namwivwa womako.+ Imanenu mumone omu Yehova mwamilwila likumbi lyalelo.+ Mwomwo ava vaEjipitu munamono lelo kamweshi kukavamona cheka haya myaka yosenako.+
14 Yehova ikiye mwamyashila jita,+ oloze enu kwenu namwimana kaha kulu.”
15 Yehova ambile kuli Mose ngwenyi: “Mwomwo ika uli nakuteta kuli ami? Lweza vaIsalele vakatuke nakutwalilila ungeji wavo.
16 Oloze ove mbata mbwechi yove, olola livoko lyove hakalungalwiji, kaha meya nawalipangununa mangana vaIsalele vahite mukachi kakalungalwiji hamavu akuma.
17 Ami nangwechelela vaEjipitu vakaluhwise michima yavo nakukava vaIsalele mukalungalwiji. Kaha nangusolola upahu wami hakufungulula Fwalo namazavu enyi avaka-jita osena, namatemba enyi ajita, navaka-kutambukisa tuvalu.+
18 VaEjipitu navatachikiza chikupu ngwavo ami yami Yehova omu nangusolola upahu wami hakufungulula Fwalo namatemba enyi ajita, navaka-kutambukisa tuvalu.”+
19 Kaha kangelo kaKalunga wamuchano+ uze apwilenga nakutetekela vaIsalele afumine kulutwe lwavo nakuya kunyima yavo, kaha nawa yize panda yalivwi yafumine kulutwe lwavo nakuya nakwimana kunyima yavo.+
20 Ngocho yize panda yalivwi yapwile jino mukachi kavaEjipitu navaIsalele.+ Kusali yimwe yanehele milima, oloze kusali yikwavo yapwile nakumunyika naufuku.+ Shikaho ufuku wosena vaEjipitu kavahashile kuswenya kuli vaIsaleleko.
21 Mose olwele jino livoko lyenyi hakalungalwiji,+ kaha Yehova ahuhwishile peho yangolo yakumututuko ufuku wosena. Jino meya akalungalwiji alipangunwine,+ kaha hamavu homine chau.+
22 Ngocho vaIsalele vatambukile tunda yayisuku mukachi kakalungalwiji hamavu akuma,+ oku meya anemana nge jimbango, kuchilyo nakuchimoswe.+
23 Jino vaEjipitu vahangasanyine lika vaIsalele, kaha tuvalu twaFwalo, namatemba enyi ajita, navaka-kutambukisa tuvalu vaputukile kwingila mukachi kakalungalwiji.+
24 Kaha hachilo chamakumishilo,* Yehova apwile mupanda yakakahya namupanda yalivwi,+ kaha aluwanganyishile lize lizavu lyavaEjipitu.
25 Asokwele tufumbo kumatemba avo mangana chipwenga chachikalu kuwatambukisa. Ngocho vaEjipitu vambile ngwavo: “Tuvachinenu vaIsalele, mwomwo Yehova ali nakuvashila jita nakulwa nayetu.”+
26 Yehova ambile jino kuli Mose ngwenyi: “Olola livoko lyove hakalungalwiji mangana meya aliwane cheka nakufwika vaEjipitu, namatemba avo ajita, navaka-kutambukisa tuvalu.”
27 Hahaze vene, Mose olwele livoko lyenyi hakalungalwiji, kahomu kwapwile nakucha, aze meya amukalungalwiji aputukile kuliwana cheka. Omu vaEjipitu vapwile nakuchina aze meya, Yehova avachitwilile mukachi kakalungalwiji.+
28 Ngocho aze meya aliwanyine, afwikile mazavu aFwalo avaka-jita osena, namatemba avo ajita, navaka-kutambukisa tuvalu. Kaha vosena vaze vakavangijile vaIsalele mukalungalwiji vanongele.+ Kakwapwile numba umwe ayovokeleko.+
29 Oloze vaIsalele vatambukile mukachi kakalungalwiji hamavu akuma,+ kaha meya emanyine nge jimbango, kuchilyo nakuchimoswe.+
30 Ngocho halikumbi lize Yehova alwilile vaIsalele kuli vaEjipitu,+ kaha vaIsalele vamwene vaEjipitu vanafu kungenge yakalungalwiji.
31 VaIsalele vamwene cheka ngolo jajinene* jaYehova jize asolwele hakufungulula vaEjipitu. Ngocho vatu vaputukile kwivwa woma Yehova nakufwelela jino Yehova nangamba yenyi Mose.+
Kwinyikila Chamwishi
^ Hepe., “namavoko akuzundula mwilu.”
^ Kafwe kufuma na 2:00 yaufuku nakuheta ku 6:00 yachimene.
^ Hepe., “livoko.”
