Kulovoka 15:1-27
15 Jino Mose navaIsalele vembilile Yehova mwaso uno ngwavo:+“Nangwimbila Yehova mwaso mwomwo ikiye nazezuka chikuma helu.+Kavalu namuka-kumutambukisa navambili mukalungalwiji.+
2 Ya* ikiye ngolo jami mwomwo ikiye nangulwili.+Ou ikiye Kalunga kami, nangumwalisanga.+ Ikiye Kalunga katata,+ nangumuzezulanga helu.+
3 Yehova apwa muka-kwasa jita wangolo.+ Lijina lyenyi ikiye Yehova.+
4 Matemba aFwalo namazavu enyi avaka-jita navimbili mukalungalwiji,+Vaka-kwasa jita vaFwalo vangolo chikuma navambili muKalungalwiji Uchila.+
5 Meya amavulu anavafwiki, kaha vanalondomana hamavu nge lilolwa.+
6 Ove Yehova, livoko lyove lyachilyo likwechi ngolo chikuma,+Ove Yehova, livoko lyove lyachilyo lyeji kuchika muka-kole.
7 Vaze vali nakukufumbukila weji kuvanongesa nangolo jove jajinene.+Weji kuvasolwelanga utenu wove nakuvocha nge mwila.
8 Kuhwima chamumazulu ove chalingisanga meya alikungulwile hamwe.Meya emananga hamwe.Meya amavulu alikondanga hakalungalwiji.
9 Muka-kole ambile ngwenyi, ‘Nanguvakavangiza. Nanguvawana.Nangumbata vikumba vyavo palanga nomu nangusuuluka.*Nangusolomona poko yami yamukwale. Livoko lyami nalivanongesa.’+
10 Wahwimanga peho, kaha kalungalwiji avafwikanga.+Vajiminyinanga mumeya amavulu ngana mwasumbu.
11 Ove Yehova,+ iya apwa nge yove hatulunga vosena?Iya apwa nge yove uze eji kulisololanga ivene kupwa wajila chikuma?+Ove yove vevwa vatu woma nakukwimbila myaso yakukwalisa, ove yove weji kulinganga vyuma vyakukomwesa.+
12 Wololanga livoko lyove lyachilyo, kaha mavu avafwikanga.+
13 Vatu jove vaze unasokola+ unavatetekela nazangi yove yakwilila.Unavatwaminyina nangolo jove kuchihela chove chajila kuze naukatwama nayove.
14 Vatu navevwa vyuma kanevi,+ kaha navalichikimina nawoma.VaFwilishite navalyonyinga.*
15 Halwola luze, vamyata* vamuEtome navakevwa woma.Kaha vaka-kuyula vangolo vakuMowave+ navakiko nawa navakevwa woma.VaKanane vosena navakalizuzukila nawoma.+
16 Navakevwa woma namuzuzu.+Navakemana hamwe kulu nge lilolwa mwomwo yangolo jalivoko lyove,Palanga nomu navakahita vatu jove, Ove Yehova,Palanga nomu navakahita+ vatu jove vaze unatenge.+
17 Ove Yehova, naukavaneha nakuvatumbika kupili yauswana wove,+Chihela chize unaliwahishila ove ivene kukatwama,Chihela chajila chize unatungu namavoko ove, Ove Yehova.
18 Yehova mwayulanga mwamwangana haya myaka namyaka.+
19 Omu tuvalu twaFwalo namatemba enyi ajita navaka-kuwatambukisa vengilanga mukalungalwiji,+Yehova awanyisanga meya amukalungalwiji nakuvafwika,+Oloze vaIsalele vatambukanga hamavu akuma mukachi kakalungalwiji.”+
20 Jino kapolofweto Milyame, ndumbwaAlone ambachile kangoma mulivoko lyenyi, kaha mapwevo vosena vamukavangijile natungoma twavo nakwimba oku vali nakukina.
21 Kaha Milyame atawijile malunga ngwenyi:“Imbilenu Yehova mwaso mwomwo ikiye nazezuka chikuma helu.+Kavalu namuka-kumutambukisa navambili mukalungalwiji.”+
22 Kufumaho Mose atetekelele vaIsalele kufuma kuze kuKalungalwiji Uchila nakuya mupambo yaShule. Vatambukile makumbi atatu mupambo, oloze kavawanyine meyako.
23 Kaha vahetele kuMala,*+ oloze kavahashile kunwa meya akuMalako mwomwo apwile amasasu, shikaho Mose alukililile chize chihela ngwenyi Mala.
24 Ngocho vaIsalele vaputukile kutatwokesa Mose+ ngwavo: “Natunwa ika?”
25 Jino Mose alembelelele Yehova,+ kaha Yehova amulwezele ayenga akambate kamutondo. Kahomu Mose ambilile kaze kamutondo mumeya, aze meya ayemene.
Kuze kuchihela kukiko Kalunga avahanyinyine lushimbi najindongi jakuvayulanga, kaha kukiko nawa avesekelele.+
26 Kalunga ambile ngwenyi: “Nge namwivwilila kanawa mulizu lyayami Yehova Kalunga kenu, nakulinga vyuma vyakwoloka kumeso ami, nakukavangiza jishimbi jami,+ nakulama jindongi jami josena, kaha kangweshi kukaminehela misongo yize ngwanehelele vaEjipituko+ mwomwo ami yami Yehova muka-kumyuka.”+
27 Kufumaho, vahetele kuElime kuze kwapwile tuselwoke vameya 12 namikoma 70. Kaha vatungile chilombo kuze kumeya.
Kwinyikila Chamwishi
^ “Ya” hilijina lyaYehova mukavatu.
^ Chipwe “nomu mwono wami nausuuluka.”
^ Hepe., “navevwa misongo yakusema.”
^ Ava vamyata vapwile vamyangana jamiyachi.
^ Ulumbunwiso, “Kusasa.”
