Kulovoka 16:1-36
16 Jino lizavu lyavaIsalele lyosena lyakatukile kuElime, kaha kutwala muze lyahetele mupambo yaShine+ yize yatwamina hakachi kaElime naShinai halikumbi lyakusokesa 15 mukakweji wamuchivali kufuma halikumbi vafumine mulifuchi lyaEjipitu.
2 Kaha lizavu lyavaIsalele lyosena lyaputukile kutatwokesa Mose naAlone mupambo.+
3 VaIsalele vahanjikilenga kuli vakiko ngwavo: “Kumana kachi chawahile Yehova kutujihila mulifuchi lyaEjipitu muze twatwaminenga kujindeho janyama+ nakulya vyakulya vyeka vyakwikuchisa. Oloze munatunehe muno mupambo mangana lizavu lyosena lifwenga nazala yakalombolombo.”+
4 Jino Yehova ambile kuli Mose ngwenyi: “Nanguminokesela kulya chakufuma mwilu,+ kaha vatu vosena vayenganga nakukungulula kulya chavo hakumbi hakumbi+ mangana nguveseke nakumona numba nge navakavangizanga lushimbi lwami nyi chiku.+
5 Oloze halikumbi lyakusokesa 6,+ vakakungulule kulya chamakumbi avali nakuchiwahishila chimweza.”+
6 Mose naAlone vambile kuli vaIsalele vosena ngwavo: “Lelo nachingoloshi namutachikiza chikupu ngwenu Yehova ikiye amilowele mulifuchi lyaEjipitu.+
7 Hamene nachimene namukamona upahu waYehova mwomwo Yehova nevu vyuma muli nakumutatwokesa. Etu yetu veyaze numba mututatwokese?”
8 Mose ambile lika ngwenyi: “Omu Yehova mwamihana nyama yakulya lelo nachingoloshi, nakukamihana nawa kulya cheka chakwikuchisa hamene nachimene, namutachikiza chikupu ngwenu kumana Yehova nevu vyuma muli nakumutatwokesa. Etu yetu veyaze? Kamweshi nakutatwokesa etuko, oloze muli nakutatwokesa Yehova.”+
9 Jino Mose ambile kuli Alone ngwenyi: “Lweza lizavu lyavaIsalele lyosena ngwove, ‘Twayenu kumeso aYehova, mwomwo nevu vyuma muli nakutatwoka.’”+
10 Omu Alone akumishile kuhanjika kulizavu lyavaIsalele lyosena, vaIsalele valumukile nakutala mupambo, kaha vamwene upahu waYehova mulivwi.+
11 Yehova ahanjikile cheka kuli Mose ngwenyi:
12 “Ngunevu vyuma vali nakutatwoka vaIsalele.+ Shikaho valweze ngwove, ‘Hakajimbavenyi* namulya nyama, kaha hamene nachimene namukalya kulya cheka chakwikuchisa.+ Ngocho namutachikiza chikupu ngwenu ami yami Yehova Kalunga kenu.’”+
13 Jino hachingoloshi chize hachilombo hosena hejile vangwali vavavulu,+ kaha lichako nachimene muchilombo mwapwile lyume lyalivulu hamavu.
14 Omu lyakukumukile lize lyume, hamavu hapwile tuvyuma twatundende twakulikonda+ twakufwana nge mavanda.
15 Omu vaIsalele vamwene tuvyuma kana, valihulishile mwavomwavo ngwavo, “Vyuma mukaze evi?” mwomwo kavatachikijile vyuma kanako. Mose avalwezele ngwenyi: “Echi chikiko kulya+ namihane Yehova.
16 Yehova nambe ngwenyi, ‘Mutu himutu akungulule kulya kana kweseka naseteko nahase kulya. Ambate kulya chakutesa mulumele* lumwe+ kweseka nakuvula chavatu* ali navo mumbalaka yenyi.’”
17 VaIsalele valingile vene ngocho. Vakungulwile kulya kana, vamwe vakungulwile chachindende, veka chachivulu.
18 Numba tuhu vamwe vakungulwile kulya chachindende veka chachivulu, oloze omu kulya kana vachipimine mulumele, mutu himutu apwile naseteko yakutamo.+ Ngocho mutu himutu akungulwile kulya kana kweseka naseteko ahashile kulya.
19 Jino Mose ambile kuli vaIsalele ngwenyi: “Kanda nakupwa mutu mwasezaho kulya kana chihete nakuchimeneko.”+
20 Oloze vaIsalele kavevwililile Moseko. Kaha malunga vamwe vasezeleho kulya chimwe kuheta nakuchimene, ngocho chize kulya chapwile namavunu nakuputuka kunuka, kaha Mose avatenukilile chikuma.
21 Ngocho mutu himutu ambachilenga kulya kana chimene hichimene kweseka naseteko ahashile kulya. Kahomu watwilenga musana, chize kulya chayengunukilenga.
22 Halikumbi lyakusokesa 6, vakungulwilenga seteko yakweseka mumakumbi avali,+ mutu himutu jimele jivali. Kaha vamyata javaIsalele vejile kuli Mose nakumulweza chihande kana.
23 Mose avalwezele ngwenyi: “Omu mukiko ambanga Yehova. Likumbi lyahamene linapu lyakunoka* mwomwo linapu hisambata yajila kuli Yehova.+ Ochenu kulya ocho namusaka kwocha, nakuteleka nawa kulya ocho namusaka kuteleka,+ nakulama cheshocho nachisalaho palanga nakuchimene.”
24 Shikaho valamine kulya kana palanga nakuchimene ngana muze avalwezele Mose. Kaha kulya kana kachanukile chipwe kupwa namavunuko.
25 Kaha Mose ambile ngwenyi: “Lyenu kulya kanechi likumbi lyalelo, mwomwo linapu sambata yaYehova. Lelo kamweshi kuwana kulya kana hamavuko.
26 Namukungululanga kulya kana hamakumbi 6, oloze halikumbi lyakusokesa 7, likumbi lyaSambata,+ kulya kana kacheshi kupwangakoko.”
27 Halikumbi lyakusokesa 7, vaIsalele vamwe vayile ngwavo vakambate kulya kana, oloze kavachiwanyineko.
28 Jino Yehova ambile kuli Mose ngwenyi: “Namukananga kulinga vyuma ngunamilweze nakuhona kulamanga jishimbi jami+ palanga nakumwaka uka?
29 Tachikizenu ngwenu Yehova namihane Sambata.+ Evi vikiko namihanyina kulya chamakumbi avali halikumbi lyakusokesa 6. Mutu himutu atwame hachihela chenyi haze ali, kanda akafumaho nakuya kwekako halikumbi lyakusokesa 7.”
30 Ngocho vatu valaminenga likumbi lyakusokesa 7+ kupwa Sambata.*
31 VaIsalele valukile chize kulya ngwavo “mana.”* Mana yapwile yitoma nge manona akolyande,* kaha hakuyilya yevwakanyinenga nge jimbolo jakuhaka uchi jakuya muupalasese.+
32 Mose ambile ngwenyi: “Yehova nambe ngwenyi, ‘Zalisenu lumele namana nakuyilama mangana vatu vamuvisemunwino vyenu vyosena+ vakamonenga kulya chize ngwamihanyinenga halwola mwapwilenga mupambo omu ngwamilowele mulifuchi lyaEjipitu.’”
33 Ngocho Mose alwezele Alone ngwenyi: “Mbata mulondo uhakemo mana yakutesa mulumele lumwe, uuhake kumeso aYehova mangana muulamine vatu vamuvisemunwino vyenu vyosena.”+
34 Alone ahakile uze mulondo kulutwe lwachikasha chaUnjiho+ mangana vaulamenga, ngana muze Yehova alwezele Mose.
35 Kaha vaIsalele valilenga mana hamyaka 40+ swi nomu vahetele mulifuchi mwatwaminenga vatu.+ Valilenga mana palanga nomu vahetele kungiza yalifuchi lyaKanane.+
36 Jino lumele lumwe lwapwile chimbwa chimwe chakusokesa muvimbwa 10 vyalifwa.*
Kwinyikila Chamwishi
^ Hepe., “Mukachi kavingoloshi vivali.”
^ Chipwe “chamyono.”
^ Lumele lumwe lwapwile jilita 2.2. Tala Chihande B14.
^ Chipwe “lyakulama sambata.”
^ Chipwe “kupwa lyakunoka.”
^ Kafwe lyafuma kumazu achiHepeleu ngwavo, “Vyuma mukaze evi?”
^ Manona akolyande alifwanako namanona amasa.
^ Lifwa limwe lyapwile kafwe jilita 22. Tala Chihande B14.
