Kulovoka 17:1-16
17 Lizavu lyavaIsalele lyosena lyafumine mupambo yaShine,+ hakutambuka kufuma hachihela chimwe nakuya hachihela chikwavo kweseka namuze avalwezele Yehova,+ kaha vakatungile chilombo kuLefwichime.+ Oloze kuchihela kana kakwapwile meya akunwako.
2 Ngocho vaIsalele vakokojwesele Mose+ ngwavo: “Tuhane meya tunwenga.” Oloze Mose ambile kuli vakiko ngwenyi: “Ika muli nakungukokojwesela ngana? Ikaze muli nakumwesekela lika Yehova?”+
3 Oloze vaIsalele vevwile lipwila chikuma, kaha vatatwokesele lika Mose+ ngwavo: “Ika watulowelelele mulifuchi lyaEjipitu tufwile muno mupambo nalipwila hamwe navana vetu navimuna jetu?”
4 Mose ambile kuli Yehova ngwenyi: “Uno nangulinga ngachilihi navatu kanava? Hanasale hahandende kaha navangwasa malolwa.”
5 Jino Yehova alwezele Mose ngwenyi: “Mbata mbwechi yove yize wavetesele haKalwiji Nyile,+ kaha sakula vakulwane vamwe mangana uyenga navo kulutwe lwavaIsalele.
6 Tala! Nangwimana kulutwe lwove kulilolwa lize lili kuHoleve. Uveta kulilolwa kana, kaha nakulovoka meya mangana vaIsalele vanwenga.”+ Mose alingile vene ngocho kumeso avakulwane javaIsalele.
7 Ngocho alukile chihela kana ngwenyi Masa*+ naMeliva,*+ mwomwo kukiko vaIsalele vamukokojweselele, kaha kukiko nawa vesekelele+ Yehova hakwamba ngwavo: “Uno Yehova ali nayetu tahi, nyi nduma?”
8 Jino vaAmaleke+ vejile nakuzungisa vaIsalele kuchihela chaLefwichime.+
9 Ngocho Mose ambile kuli Yoshuwa+ ngwenyi: “Sakula malunga vayenga vakatwashile jita navaAmaleke. Ami hamene nangukemana helu lyapili nambwechi yaKalunga wamuchano mulivoko lyami.”
10 Yoshuwa alingile ngana muze vamulwezele+ kuli Mose, kaha azungile navaAmaleke. Ngocho Mose, naAlone, naHule+ vakandukile helu lyapili.
11 Omu Mose azundwile mavoko enyi mwilu, vaIsalele vakwachile ngolo kuhambakana vaAmaleke, oloze omu azewile mavoko enyi, vaAmaleke nawa vakwachile ngolo kuhambakana vaIsalele.
12 Kahomu Mose azeyele kuzundula mavoko enyi, vamumbachilile lilolwa nakulitumbika hamavu, kaha atwamineho. Alone naHule vakwachililile mavoko enyi ou kusali yimwe ou kusali yikwavo, mangana mavoko enyi apwenga lika mwilu palanga nakukulauka chalikumbi.
13 Ngocho Yoshuwa afungulwile Amaleke navatu jenyi najipoko jamikwale.+
14 Yehova ambile jino kuli Mose ngwenyi: “Soneka chuma kanechi mumukanda mangana chikapwe chakwanukilangaho, kaha lweza nawa Yoshuwa ngwove, ‘Nangukanongesa vaAmaleke ndolokoto kumavu kwosena,+ kaha naumwe wauchi mwakavanuka cheka.’”
15 Jino Mose atungile lijiko lyakulumbila nakuliluka lijina ngwenyi Yehova-nyishi,*
16 nakwamba ngwenyi: “Mwomwo vaAmaleke vemanyinyine litanda lyaYa*+ nakole, ngocho Yehova mwakalwa jita navaAmaleke kufuma kuchisemunwino chimwe nakuya kuchisemumwino chikwavo.”+
Kwinyikila Chamwishi
^ Ulumbunwiso, “Kweseka; Cheseko.”
^ Ulumbunwiso, “Kulikokojwesa.”
^ Ulumbunwiso, “Yehova Ikiye Chitondo Chami chaChinjikizo.”
^ “Ya” hilijina lyaYehova mukavatu.
