Kulovoka 19:1-25
19 VaIsalele vahetele mupambo yaShinai halikumbi vene lize* mukakweji wamuchitatu kufuma haze valovokele mulifuchi lyaEjipitu.
2 Vafumine kuLefwichime+ nakuheta mupambo yaShinai, kaha vatungile chilombo chavo muze mupambo kwakamwihi napili.+
3 Jino Mose akandukile kupili kuli Kalunga wamuchano, kaha Yehova ahanjikile nenyi haze hapili+ ngwenyi: “Lweza vakuzuvo yaYakova, vana vaIsalele ngwove,
4 ‘Munalimwena enu vavene vyuma ngwalingile kuli vaEjipitu+ numba ngumimbate hamavava ami ngana mwangonga.+
5 Shikaho nge namwononoka mulizu lyami nakulama lushiko lwami, kaha namupwa chikupu muvatu jami vakulipwila* havatu veka naveka vosena,+ mwomwo kaye kosena kanapu kami.+
6 Namupwanga muwangana wavapilishitu kuli ami, kaha nawa mumuyachi wajila.’+ Awa akiko mazu nauhanjika kuli vaIsalele.”
7 Shikaho Mose ayile nakusanyika vakulwane javaIsalele nakuvalweza vyuma vyosena vize amulwezele Yehova.+
8 Kaha vatu vosena vamukumbulwile hohamwe ngwavo: “Tunetavila kulinga vyuma vyosena nahanjika Yehova.”+ Hahaze vene Mose ayile nakulweza Yehova mazu vakumbulwile vatu.
9 Jino Yehova ambile kuli Mose ngwenyi: “Tala! Nangwiza kuli ove mulivwi lilava mangana vaIsalele vevwenga omu nanguhanjika kuli ove, nakukufwelelanga nayove nawa.” Ngocho Mose ambulwile kuli Yehova aze mazu vakumbulwile vatu.
10 Yehova ambile kuli Mose ngwenyi: “Yako kuli vatu uvajilike likumbi lyalelo nahamene, kaha vakose nawa uvwalo wavo.
11 Kaha valizange vyalikumbi lyamuchitatu mwomwo halikumbi kana Yehova mwakeza kuPili yaShinai kumeso avatu vosena.
12 Pulila vaIsalele ngiza kujinguluka pili, nakuvalweza ngwove, ‘Kanda namuswenya kupili chipwe kukwatako. Weshowo mwakwata kupili vamujihe.
13 Mutu kana kanda kumukwatako, oloze vamwase malolwa chipwe kumwasa mivwi. Numba apwa mutu chipwe kanyama, vamujihe.’+ Vatu navakeza kupili kuvanga kaha nge vanevu chivumo chaluneta.”*+
14 Jino Mose ashikumukile kufuma haze hapili nakuya kuli vaIsalele, ngocho ajilikile vaIsalele, kaha vakosele nawa uvwalo wavo.+
15 Mose ambile kuli vatu ngwenyi: “Lizangenu vyalikumbi lyamuchitatu. Lihendenu kukulisavala namapwevo jenu.”*
16 Jino halikumbi lyamuchitatu nachimene kwapwile mikalateta namiveso, kaha hapili hapwile livwi lilava chikuma+ nachivumo chaluneta chakutezuka chikuma, ngocho vatu vosena muchilombo vaputukile kuchikima.+
17 Mose alowele jino vaIsalele muchilombo mangana valiwane naKalunga wamuchano, kaha vemanyine kushina yapili.
18 Jino Pili yaShinai yosena yapwile nakukakumuka wishi mwomwo Yehova ejile haze hapili mukakahya,+ kaha uze wishi wakakumukile kwijiva nge wishi walilungu, ngocho pili yosena yandendele chikuma.+
19 Omu chivumo chaluneta chayilenga nakutohwelako, Mose ahanjikile, kaha Kalunga wamuchano amukumbulwile nalizu lyangolo.
20 Yehova ejile helu lyaPili yaShinai kufuma mwilu. Kaha Yehova asanyikile Mose akanduke haze helu lyapili, ngocho Mose akandukile.+
21 Yehova ambile jino kuli Mose ngwenyi: “Shikumuka hamavu ukahuhumune vaIsalele ngwove kanda vatala Yehovako, mokomoko navanonga.
22 Kaha vapilishitu vaze veji kupandamanga kuli Yehova valijilike kuchina Yehova mwavajiha.”+
23 Jino Mose ambile kuli Yehova ngwenyi: “VaIsalele kaveshi kuhasa kwiza kuno kupiliko mwomwo watuhuhumunanga lyehi hakuhanjika kuli ami ngwove, ‘Pula ngiza kujinguluka pili, nakuyijilika.’”+
24 Oloze Yehova alwezele Mose ngwenyi: “Shikumuka hamavu ukasanyike Alone wizenga nenyi kuno. Oloze kanda nawitavisa vapilishitu navaIsalele veka vakanduke kuno kuli ami Yehovako, kuchina nanguvazangamisa.”+
25 Ngocho Mose ashikumukile hamavu nakulweza vatu vyuma ahanjikile Kalunga.
Kwinyikila Chamwishi
^ Chasoloka nge mazu akwamba ngwavo, “halikumbi vene lize” atalisa kulikumbi vakatukile kuLefwichime.
^ Chipwe “muluheto lwami ngwazanga.”
^ Luneta kana lwapwile lumbinga lwakanyama.
^ Hepe., “Kanda namupandama kumapwevo jenuko.”
