Kulovoka 2:1-25
2 Halwola kana, lunga umwe wakumuyachi waLevi ambachile mwanaLevi wapwevo.+
2 Kaha uze pwevo emichile lijimo nakusema mwana walunga. Omu amwene ngwenyi mwana kana wamwaza, amuswekele hatukweji vatatu.+
3 Jino omu ahonene kumusweka lika,+ ambachile mutonga* wamateve nakuushila lingongwe naukokotwa, ahakilemo uze mwana nakuusweka mumahongo kungenge yaKalwiji Nyile.
4 Kaha ndumbwakemba wapwevo+ emanyine hahasuku nakutala vyuma navisoloka kuli uze kemba.
5 Jino mwanaFwalo wapwevo ejile nakusana kuKalwiji Nyile, kaha vangamba jenyi vamapwevo vapwile nakutambwojoka kungenge yakalwiji. Ngocho ou mwanaFwalo amwene uze mutonga mumahongo, kaha hahaze vene atumine ngamba yenyi mangana akamumbachilewo.+
6 Omu amunehelelewo, apandumwinemo, awanyine muli mwana walunga ali nakulila. Kaha amwivwilile keke, oloze ambile ngwenyi: “Ou mwana wavaHepeleu.”
7 Jino ndumbu yayauze kemba ambile kuli uze mwanaFwalo ngwenyi: “Naungwitavisa nguyenga nakusanyika pwevo wakaHepeleu mangana ezenga nakukwamwishila ou mwana tahi?”
8 Ngocho uze mwanaFwalo amukumbulwile ngwenyi: “Yako.” Hahaze vene uze kanyike wapwevo ayile nakusanyika naye yayauze kemba.+
9 Kaha uze mwanaFwalo ambile kuli naye yayauze kemba ngwenyi: “Mbata ou mwana ungwamwishilengayo, kaha nangukufwetanga.” Uze pwevo ambachile uze mwana nakumwamwisanga.
10 Jino omu akolele uze mwana, naye amunehele kuli uze mwanaFwalo, kaha amulingishile kupwa mwanenyi.+ Amulukile lijina ngwenyi Mose,* nakwamba ngwenyi: “Ngunamuluku lijina kaneli mwomwo ngwamunonele hameya.”+
11 Kahomu Mose alingile hanakolo lyehi,* ayile kuli vandumbwenyi nakumona omu vapwile nakuvayanjisa chikuma namilimo.+ Amwene ndumbwenyi wakaHepeleu vali nakumuveta kuli kaEjipitu.
12 Mose atalile noku noku, kaha kamwene mutu numba umweko. Ngocho ajihile uze kaEjipitu nakumuvumbika muusekeseke.+
13 Lichako omu ayileko cheka, amwene vaHepeleu vavali vali nakuliveta mwavomwavo. Ngocho ambile kuli uze aluwishile ngwenyi: “Mwomwo ika uli nakuvetela mukwenu?”+
14 Uze kaHepeleu amukumbulwile ngwenyi: “Iya akutongola kupwa umuka-kutuyula, umuka-kutusopesa? Uli nakusaka ungujihe ngana muze wajihanga uze kaEjipitu tahi?”+ Mose evwile woma nakulyamba mumuchima wenyi ngwenyi: “Echi chihande kumana vanachitachikiza.”
15 Jino Fwalo evwile chihande kana, kaha asakile kujiha Mose. Oloze Mose achinyine, ayile akatunge kulifuchi lyaMichane.+ Kahomu ahetele kuze, atwamine kulishima.
16 Kapilishitu wakuMichane+ apwile navana vamapwevo 7 vaze vejile nakuswita meya nakuzalisa mangolengole mangana vanwise vimuna jasevo.
17 Oloze ngana mwamakumbi osena, tufunga vejile nakuhanga vaze mapwevo navimuna javo. Kaha Mose akatukile nakupululula* vaze mapwevo nakuvakafwa kunwisa meya vimuna javo.
18 Omu vakindulukile hembo, sevo Leule*+ avahulishile ngwenyi: “Mwomwo ika lelo munakindulukila washi?”
19 Vakiko vamukumbulwile ngwavo: “KaEjipitu+ umwe atupulululanga kutufunga, kaha atuswichilanga meya nakunwisa vimuna jetu.”
20 Ikiye ambile kuli vaze vana venyi ngwenyi: “Mutu kana ali kulihi? Ika mwachinanga kwiza nenyi? Yenu mukamusanyike tulyenga nenyi vyakulya.”
21 Ngocho Mose etavilile kutwama nauze lunga, kaha uze lunga ahangishile mwanenyi wapwevo Jipola+ kuli Mose.
22 Kutwala muze, Jipola asemene mwana walunga, kaha Mose amulukile lijina ngwenyi Ngeleshome,*+ mwomwo ambile ngwenyi: “Ngunapu ngumwiza mulifuchi lino.”+
23 Omu mwahichile myaka yayivulu, mwangana waEjipitu afwile,+ oloze vaIsalele valyonyingilenga lika nakuteta miteto mwomwo yakuyanda muundungo. Miteto yavo yahetele kuli Kalunga wamuchano.+
24 Jino Kalunga amwene kulyonyinga chavo,+ kaha anukile lushiko alishikile naApalahama, naIsaka, naYakova.+
25 Ngocho Kalunga atalile vaIsalele nakumona ukalu vapwile nakuhitamo.
Kwinyikila Chamwishi
^ Chipwe “chikasha.”
^ Ulumbunwiso, “Wakuzambula,” kulumbununa wakuyovola mumeya.
^ Chipwe “Kahomu Mose alingile hanakwate lyehi ngolo.”
^ Chipwe “nakukinga.”
^ Ikiye Yetelo.
^ Ulumbunwiso, “Apwa Mwiza Kuze.”