Kulovoka 20:1-26
20 Kalunga ahanjikile mazu+ osena awa ngwenyi:
2 “Ami yami Yehova Kalunga kenu uze amilowele mulifuchi lyaEjipitu, muzuvo yaundungo.+
3 Kanda namukapwa natulunga vekako shina ami kaha.*+
4 “Kanda mukalitengela kaponya chipwe chuma chakufwana chuma chamwilu, chipwe chahamavu, chipwe chamumeyako.+
5 Kanda mukalifukula kuvikiko chipwe kuvizachilako,+ mwomwo ami Yehova Kalunga kenu ngwapwa nguKalunga asaka vatu valihane kuli ami namichima yavo yosena,+ kaha ngweji kuzangamisanga vana, navazukulu, natukwatambuli, hakuhenga chamasevo vaze vanguhunga.
6 Oloze ngweji kusololanga zangi yakwilila kumakombakaji avisemunwino vyavaze vanguzanga nakulama jishimbi jami.+
7 “Kanda mukazachisa lijina lyaYehova Kalunga kenu mujila yakuhengako,+ mwomwo Yehova mwakazangamisa weshowo mwakazachisa lijina lyenyi mujila yakuhenga.+
8 “Anukenunga likumbi lyaSambata nakulimona kupwa lyajila.+
9 Milimo yenu yosena mukayizatenga hamakumbi 6.+
10 Oloze likumbi lyakusokesa 7 likapwe sambata yaYehova Kalunga kenu. Kanda mukazata milimoko, chipwe enu, chipwe vana venu vamalunga navava vamapwevo, chipwe vandungo jenu vamalunga navava vamapwevo, chipwe vimuna jenu, chipwe vamwiza vaze vali nakutwama mumembo* enu.+
11 Mwomwo hamakumbi 6, Yehova atengele melu namavu, nakalungalwiji navyuma vyosena vyatwamamo, kaha anokele halikumbi lyakusokesa 7.+ Echi chikiko chalingishile Yehova akisule likumbi lyaSambata nakulilingisa kupwa lyajila.
12 “Vumbikenunga masenu namanenu+ mangana muyoyenga myaka yayivulu mulifuchi lize mwamihana Yehova Kalunga kenu.+
13 “Kanda mukajiha mutuko.+
14 “Kanda mukalinga ukojiko.+
15 “Kanda mukevako.+
16 “Kanda mukambulula unjiho wamakuli wakupayisa mukwenuko.+
17 “Kanda mukevwila lwiso zuvo yamukwenu, chipwe pwevo lyenyi,+ chipwe ndungo yenyi walunga, chipwe ndungo yenyi wapwevo, chipwe ngombe yenyi, chipwe chimbulu chenyi, chipwe cheshocho chuma ali nachoko.”+
18 Jino vatu vosena vevwile mukalateta nachivumo chaluneta, nakumona muveso nawishi wapwile nakukakumuka hapili. Kahechi chavalingishile vachikime woma nakwimanyina hahasuku.+
19 Ngocho vambile kuli Mose ngwavo: “Ove hanjika nayetu, kaha natwivwilila, oloze Kalunga kanda ahanjika nayetuko mwomwo tuli nakwivwa woma ngwetu natufwa.”+
20 Mose ahanjikile kuli vaIsalele ngwenyi: “Kanda namwivwa womako, mwomwo Kalunga wamuchano neza amyeseke+ mangana mumwivwenga lika woma nakuzeneka kulinga shili.”+
21 Ngocho vatu vemanyinyine lika hahasuku, oloze Mose apandamine kulivwi lilava kuze kwapwile Kalunga wamuchano.+
22 Yehova ambile kuli Mose ngwenyi: “Ulweza vaIsalele ngwove, ‘Munalimwena enu vavene omu ngunahanjika kuli enu kufuma mwilu.+
23 Kanda namukalitengela tulunga vapalata navava vaulu nakuvalemesa, oku nawa muli nakulemesa amiko.+
24 Mukangutungila lijiko lyakulumbila lyamavu nakungulumbilaho mawana enu akulumba, namawana akusolola kuunda, akumikoko jenu navangombe jenu. Nangukeza kuli enu kuvihela vyosena vize nangukasakula mangana mukangulemeselengako,*+ kaha nangukamikisula.
25 Kachi nge namungutungila lijiko lyakulumbila lyamalolwa, kaha malolwa namutungisa kanda namuwavatula navinomako.*+ Mwomwo nge namuwavatula nashizo, kaha namulumbilisa lijiko kana.
26 Kanda namukanyina hajindondelo hakuya kulijiko lyami lyakulumbilako, kuchina usonyi wenu naukasoloka.’
Kwinyikila Chamwishi
^ Chipwe “natulunga vekako mangana mungukane ami.” Hepe., “natulunga veka nakulikanga kumeso amiko.”
^ Hepe., “kuvikolo.”
^ Hepe., “mukanukilengako lijina lyami.”
^ Chipwe “namalolwa akwolako.”
