Kulovoka 21:1-36
21 “Lweza vaIsalele mazu ano akuyula ngwove:+
2 “Kachi nge mutu nalande ndungo+ wakaHepeleu, kaha akamuzachise hamyaka 6, oloze mumwaka wakusokesa 7 akamusuule akaye chakuzeneka kumufwetesa.+
3 Kachi nge alijilile ivene, kaha akaliyile tuhu ivene. Nge ambata, kaha akaye napuwenyi.
4 Nge kaka yenyi namuhane pwevo, kaha himwasema nenyi vana vamalunga chipwe vamapwevo, uze pwevo navana venyi vakasale kuli kaka yavo, oloze uze ndungo akaye uka wenyi.+
5 Jino nge uze ndungo mwakamba ngwenyi, ‘Ngwazanga kaka yami, napwevo lyami, navana vami, ngocho kangweshi nakusaka kungusuula nguyengako,’+
6 kaha kaka yenyi akamunehe kumeso aKalunga wamuchano mangana chikapwe unjiho. Kufumaho akamutwale kuchikolo chipwe kuchipamba nakumutuva kulitwitwi namukumbo. Ngocho uze ndungo mwakazachilanga kaka yenyi mukuyoya chenyi chosena.
7 “Kachi nge mutu mwalanjisa mwanenyi wapwevo kupwa ndungo, kaha uze mwana kaveshi kukamusokola nge muze navasokola ndungo walungako.
8 Kachi nge uze mwanapwevo kavamuzangile kuli kaka yenyi nakuzeneka kumulingisa kupwa pwevo lyenyi wakanyike, ngocho mwasaka kumulanjisa kumutu weka,* kaha kanda akamulanjisa kumutu wakulifuchi lyekako, mwomwo namulingi mwamupi.
9 Jino nge mwamusombwesa kuli mwanenyi, kaha akamulingile vyuma vyosena vize mwalingila mwanenyi wapwevo.
10 Kachi nge uze mwanenyi walunga* mwambata pwevo mukwavo, kaha kanda akalitwamina kuhana uze pwevo wakulivanga vyakulya, nauvwalo, navyuma atela kumuhana muuloko.+
11 Oloze nge mwahona kutesamo vyuma kanevi vitatu, kaha akamusuule akaye chakuzeneka kumufwetesa jimbongo.
12 “Weshowo mwaveta mutu nakumujiha, naikiye vamujihe.+
13 Oloze nge nalingi chuma kana chakuzeneka kuchisakula, kaha nawa Kalunga wamuchano nechelela chuma kana chisoloke, kaha nangukamiwahishila chihela mwakachinyina.+
14 Jino kachi nge mutu napihilila chikuma namukwavo nakumujiha chakuchisakula,+ numba nge mutu kana nachinyina kulijiko lyami lyakulumbila, mukamufumisako nakumujiha.+
15 Weshowo mwaveta ise chipwe naye vamujihe.+
16 “Kachi nge mutu mweva mukwavo+ nakumulanjisa, chipwe nge mutu vanamuwane namutu wakwiva,+ mutu kana vamujihe.+
17 “Weshowo mwangula* ise chipwe naye vamujihe.+
18 “Kachi nge vatu navalikokojwesa, kaha umwe mwasa mukwavo lilolwa chipwe kumuveta konyi,* jino uze vanase chipwe vanavete kafwileko, oloze ali muluuta, kaha mukalinga vyuma vino:
19 Kachi nge uze vanalemeka ali nangolo jakutambuka haweluka namukombo wenyi, kaha uze amulemekanga kanda vamuzangamisako. Oloze amufwete halwola luze mwahona kuzata milimo yenyi palanga nomu mwalikangula.
20 “Kachi nge mutu mwaveta ndungo yenyi walunga chipwe wapwevo namutondo nakumujiha, kaha vamuzangamise.+
21 Oloze nge uze ndungo kafwileko halikumbi lize vanamuvete chipwe lize nalikavangizaho, kaha uze kaka yenyi kanda vamuzangamisako mwomwo amulanjile najimbongo jenyi.
22 “Kachi nge malunga navalizungisa mwavomwavo nakukuka pwevo ali nalijimo, kaha uze pwevo himwasema mwana wamuvisu,*+ oloze ikiye namwanenyi kavafwileko,* uze namukuku afwete mulonga navamutomena kuli lunga lyayauze pwevo. Mulonga kana aufwete kuhichila muli vaka-kuyula.+
23 Oloze nge umwe* nafu, kaha mukalinge mwono namwono ndwa.+
24 Kachi nge vanamulemeka, kaha mukalinge liso naliso ndwa, lizo nalizo ndwa, livoko nalivoko ndwa, lihinji nalihinji ndwa,+
25 kuwemesa nakuwemesa ndwa, mbandu nambandu ndwa, mukiki namukiki ndwa.
26 “Kachi nge mutu natuu liso lyandungo yenyi walunga chipwe wapwevo, kaha amusokole ayenga mangana chipwenga nge namufwete kuliso namutuu.+
27 Kachi nge napukula lizo lyandungo yenyi walunga chipwe wapwevo, kaha amusokole ayenga mangana chipwenga nge namufwete kulizo namupukula.
28 “Kachi nge ngombe mwajiha mutu, vamwase malolwa afwenga,+ oloze nyama yenyi kanda vayilyako. Uze mwenyangombe nawa kanda vamuzangamisako.
29 Jino nge ngombe atwama natato yakulemeka vatu, kaha mwenyayo vamuhuhumwine oloze ikiye amwechelela, nge uze ngombe mwajiha mutu, kaha vamwase malolwa afwenga nakujiha nawa mwenyayo.
30 Oloze nge uze mwenyangombe vanamulweze afwete ndando yakusokola kuyoya* chenyi, kaha afwete ndando vanamutomena.
31 Kachi nge uze ngombe nalemeka mwana walunga chipwe wapwevo, kaha mwenyangombe vamulinge kweseka namwaya mazu awa akuyula.
32 Kachi nge ngombe nalemeka ndungo walunga chipwe wapwevo, kaha mwenyangombe afwete kaka yauze ndungo jishekele* 30. Uze ngombe nawa vamwase malolwa afwenga.
33 “Kachi nge mutu mwafwikununa hawina chipwe mwafula wina nakuzeneka kuufwika, kaha ngombe chipwe chimbulu chamukwavo mwaholokelamo,
34 uze aufulanga afwete.+ Fweto kana ayihane kuli mwenyachimuna, kaha uze chimuna wakufwa mwapwa wenyi.
35 Kachi nge ngombe nalemeka mukwavo nakumujiha, kaha valanjise uze ngombe wamutonyi nakulipangila jimbongo, nakulipangila nawa nyama yangombe uze nafu.
36 Kachi nge ngombe atwama natato yakulemeka vakwavo, oloze mwenyayo hanga amwechelela, jino nge najihi mukwavo, kaha uze mwenyayo afwete uze mwenyangombe hakumuhana ngombe weka. Oloze ikiye ambate uze ngombe wakufwa.
Kwinyikila Chamwishi
^ Hepe., “mwasaka kumusokola.”
^ Chipwe pamo, “Kachi nge kaka yauze mwanapwevo.”
^ Chipwe “mwashinga.”
^ Chipwe pamo, “chitwa.”
^ Chipwe “kavalemanyine chikumako.”
^ Hepe., “kaha vana vayauze pwevo hinavalovoka.”
^ Kulumbununa, uze pwevo chipwe mwana.
^ Chipwe “mwono.”
^ Shekele yimwe yapwile jingalamu 11.4. Tala Chihande B14.
