Kulovoka 22:1-31
22 “Kachi nge mutu nevi ngombe umwe nakumujiha chipwe kumulanjisa, kaha afwete vangombe vatanu, oloze nge nevi mukoko umwe nakumujiha chipwe kumulanjisa, kaha afwete mikoko vawana.+
2 (“Kachi nge mwiji+ vanamuwane nengila muzuvo nakwiva, kaha hinavamuveta nakumujiha, uze namujihi keshi namulonga wamanyingako.
3 Oloze nge uze mwiji ezanga nakwiva musana weye, kaha uze namujihi mwapwa namulonga wamanyinga.)
“Uze mwiji afwete mulonga. Oloze nge vyakufweta kumulonga vyauchi, kaha vamulanjise havyuma vize evanga.
4 Kachi nge chimuna uze evanga vanamuwane nenyi wamutonyi, chipwe apwa ngombe, chipwe chimbulu, chipwe mukoko, kaha afwete kavali.
5 “Kachi nge mutu mwechelela vimuna jenyi valile muwande wambala wamivinyo chipwe wamihako yeka, kaha ashishisemo wande wenyi wamivinyo yamwaza chipwe wamihako yeka.
6 “Kachi nge mutu mwaswamika kakahya, kaha hinakakwata kuviputa nakwocha jimbuto jize vanalumbika muwande, chipwe jize jakuhona kwaha, chipwe kwocha wande wosena, kaha uze akaswamikanga afwete jimbuto jize jinaweme.
7 “Kachi nge mutu mwahana mukwavo jimbongo chipwe vikumba mangana amulamineko, kaha vyuma kana navavivila muzuvo yenyi, nge uze mwiji navivi vanamuwane, afwete kavali.+
8 Oloze nge mwiji kavamuwanyineko, kaha uze mwenyazuvo vamunehe kumeso aKalunga wamuchano+ mangana vamone numba nge ikiye evanga vyuma vyamukwavo nyi nduma.
9 Milonga yosena yakupandama kuvyuma ali navyo mutu vize kavyeshi vyenyiko, vyakufwana nge ngombe, chimbulu, mukoko, uvwalo, chipwe cheshocho chuma chinajimbala, chize mutu mukwavo mwamba ngwenyi, ‘Echi chuma chami,’ kaha ou mulonga wavatu kanava vavali vautwale kumeso aKalunga wamuchano vakausope.+ Mutu uze navamona kuli Kalunga ngwenyi ali namulonga afwete mukwavo kavali.+
10 “Kachi nge mutu mwahana mukwavo chimbulu, chipwe ngombe, chipwe mukoko, chipwe chimuna weka mangana amulamineko, oloze uze chimuna mwafwa, chipwe navamulemeka, chipwe navamuvombola,
11 kaha uze vahananga kulama uze chimuna alishinge kumeso aYehova ngwenyi keshi ikiye amwivangako. Uze mwenyachimuna etavile, ngocho uze vahananga kulama uze chimuna kanda afwetako.+
12 Oloze nge uze chimuna vanamwiviyo, kaha afwete mwenyayo.
13 Kachi nge uze chimuna vanamujihi kuli chisuma, kaha uze vahananga kumulama anehe uze chimuna wakufwa kupwa unjiho. Kanda afweta chimuna uze vanajihi kuli chisumako.
14 “Kachi nge mutu mwalomba chimuna chamukwavo, kaha uze chimuna navamulemeka chipwe mwafwa chakuzeneka mwenyayo kupwako, kaha uze mutu alombanga uze chimuna afwete.
15 Kachi nge mwenyayo kwali, kaha uze amulombanga kanda afwetako. Oloze kachi nge alinganga wakukumuna, kaha jize jimbongo ahananga hakumukumuna jikiko najipwa fweto.
16 “Kachi nge lunga mwashimba pwevo uze kanda alisavaleho lyehi nalunga, uze kanda vahuhwe, kaha himwalisavala nenyi, uze lunga afwete matemo mangana apwenga pwevo lyenyi.+
17 Oloze nge ise kate kumusombwesa, kaha uze lunga afwete jimbongo jakweseka mumatemo.
18 “Kanda muketavisa muka-kupanda ayoyeko.+
19 “Weshowo mwalisavala nakanyama vamujihe.+
20 “Weshowo mwahana vimuna vakuvatula kutulunga veka mukutela kuhana Yehova vamujihe.+
21 “Kanda namukayanjisa mwiza chipwe kumushinyinyikako,+ mwomwo nayenu mwapwile muvamwiza mulifuchi lyaEjipitu.+
22 “Kanda namukayanjisa tuliwe chipwe mwana wakuzeneka iseko.*+
23 Nge namumuyanjisa, kaha nangwivwa miteto yenyi omu mwateta kuli ami.+
24 Nangupihilila chikuma nakumijiha napoko yamukwale. Ngocho mapwevo jenu navakapwa vatuliwe, kaha vana venu nawa kaveshi kukapwa namasevoko.
25 “Kachi nge namulevanyisa jimbongo kuli muka-kuhutwa* wamuli vatu jami vaze muli nakutwama navo, kaha kanda namumulevanyisa jimbongo nakutambula sakuko.+
26 “Kachi nge mutambula chikuto chamukwenu kupwa chijikilo havyuma vyenu nambate,+ kaha mumukindulwishilacho shimbu kanda likumbi lilauke,
27 mwomwo chikiko kaha eji kulifwikanga nakwala omu mwasavala. Nyize mwalifwika ika omu mwasavala?+ Ngocho nangumwivwa omu mwateta kuli ami, mwomwo ngwapwa ngumuka-kutetela.*+
28 “Kanda mukangula* Kalunga+ chipwe mwata* wamuli vatu jenuko.+
29 “Kanda mukalangisa kuhana mawana akujimbuto jenu jajivulu navyuma vyakumbwambumuka vyakuvikamwino*+ vyenuko. Mukanguhana vana venu vamalunga vavatwatwa.+
30 Evi vikiko namukalinga kuvatwatwa vavangombe jenu, navatwatwa vamikoko jenu:+ Mwanangombe chipwe mwanamukoko akapwe kuli naye hamakumbi 7, oloze halikumbi lyakusokesa 8 mukanguhanayo.+
31 “Pwenunga vajila kumeso ami,+ kaha kanda namukalya kanyama uze vanajihi kuli chisumako.+ Oloze mukamuhana kuvatuwa vakamulye.
Kwinyikila Chamwishi
^ Chipwe “ngingako.”
^ Chipwe “muka-kuyanda.”
^ Chipwe “ngumuka-kukokweza.”
^ Chipwe “mukasaula.”
^ Chipwe “vaka-kuyula.”
^ Kulumbununa, vyuma vyamaji navyevi vyavinyo.
